Read Batak Toba PANURIRANG SAKARIA 1 Bible Online

PANURIRANG SAKARIA 1 - Batak Toba bible

PANURIRANG SAKARIA 1

¹I. [1] Dibulan sipaha ualu, * paduataonhon hinarajahon ni si Darius ro ma hata ni Jahowa tu panurirang + Sakaria, anak ni si Berekia, tubu ni si Ido, songon on: [1†]

²Marronirimas situtu do Jahowa mida ompumuna.

³Alai dok ma tu nasida: Songon on do hata ni Jahowa Zebaot * sai mulak ma hamu tu ahu, ninna Jahowa Zebaot, asa mulak ahu tu hamu, ninna Jahowa Zebaot. [2†]

⁴Unang hamu songon ompumuna angka naung jinou ni angka panurirang parjolo i, ninna do: Songon on do hata ni Jahowa Zebaot: Ua * mulak ma hamu sian dalanmuna, angka na jahat dohot sian pambahenanmuna angka na roa i. Alai ndang ditangihon, jala ndang dipardulihon nasida ahu, ninna Jahowa. [3†]

⁵Ia ompumuna, didia nasida nuaeng? Jala angka panurirang i, tung ro di salelenglelengna ma nasida mangolu?

⁶Antong angka hatangki dohot patikki, angka na hutonahon tu na naposongku, angka panurirang i, nda nunga mangonai tu angka ompumuna? Gabe mulak nasida jala angka didok do: Songon na sinangkap ni Jahowa Zebaot naeng bahenonna tu hita, hombar tu angka dalanta dohot pambahenanta songon i do tongon dibahen tu hita. II.

⁷Di ari duapulu opat di bulan Li, i ma bulan Sebat, paduataonhon hinarajahon ni si Darius, ro ma hata ni Jahowa tu panurirang Sakaria, anak ni si Berekia, tubu ni si Ido, songon on:

⁸Maralatan ahu bornginna i, gabe ida ma sada halak marsihundul di atas sada hoda na rara, jala sulon ibana di holangholang ni dulang, angka na di rura, jala di pudina hoda angka na rara, sihuning dohot siapaspili. [4†]

⁹Jadi ningku ma: Dia do lapatan ni angka on, ale tuangku? Jadi didok suruan donganku mangkatai ma tu ahu: Hupabotohon pe tu ho lapatan ni angka nasida i.

¹⁰Dung i ninna baoa na sulon di holangholang ni angka dulang i mangalusi: I ma angka na sinuru ni Jahowa laho mangaliati tano on.

¹¹Dung i didok angka nasida ma mangalusi suruan ni Jahowa na sulon di holangholang ni angka dulang i: Nunga huliati hami tano on, jadi ida ma, sandok tano on mardemak jala sonang.

¹²Jadi didok suruan ni Jahowa ma mangalusi: Ale Jahowa Zebaot, sadia leleng on * so marpangulahi roham mida Jerusalem dohot mida angka huta ni Juda, angka na nirimasanmu + na pitupulu taon on. [5†]

¹³Jadi dialusi Jahowa ma suruan, donganku mangkatai, angka hata na denggan dohot hata apulapul didok.

¹⁴Dung i didok suruan donganku mangkatai ma tu ahu: Martingting ma ho songon on: Boti hata ni Jahowa Zebaot: Nunga * marronirimas situtu ahu humongkop Jerusalem dohot Sion. [6†]

¹⁵Alai tarrimas situtu ma ahu mida parbegu, angka na jungkat, ala tarrimas ahu otik, gabe manolongi tu hamagoan ianggo nasida. [7†]

¹⁶Dibahen i songon on do hata ni Jahowa: * Nunga marpangulahi rohangku tu Jerusalem; ingkon paulion muse bagashu di bagasan huta i ninna Jahowa Zebaot, jala sintahan ma hotang panuhati humaliang Jerusalem. [8†]

¹⁷Ulahi muse martingting mandok: Songon on do hata ni Jahowa Zebaot: Marrarahan dope angka hutangku bahenonku jala lobian dipasupasu, jala ulahan ni Jahowa * mangapuli Sion + ulahanna huhut mamillit Jerusalem. [9†]