Read Batak Toba PANURIRANG SAKARIA 8 Bible Online

PANURIRANG SAKARIA 8 - Batak Toba bible

PANURIRANG SAKARIA 8

¹I. [1] Dung i ro ma hata ni Jahowa Zebaot, ninna ma:

²Songon on do hata ni Jahowa Zebaot: * Mangiburu situtu do ahu humongkop Sion jala marpiarpiar situtu rimashu humongkop nasida. [52†]

³Songon on do hata ni Jahowa: * Marpangulahi ma rohangku mida Sion, jala maringanan ahu di parsitongaan ni Jerusalem, jadi targoar ma Jerusalem huta hasintongan, jala dolok ni Jahowa Zebaot, dolok habadiaon. [53†]

⁴Songon on do hata ni Jahowa Zebaot: Ingkon hundul dope sogot baoa angka na ubanon dohot boruboru di angka alaman ni Jerusalem, angka na patioptiop tungkotna be di bagasan tanganna dibahen tuana. [54†]

⁵Jala angka alaman ni huta i gok dolidoli dohot na marbaju, angka na marmeammeam di angka alamanna.

⁶Songon on do hata ni Jahowa Zebaot: Ala longang roha ni pasipasi ni bangso on disi di angka ari nasida, tung dohot ma * ahu huroha longang disi, ninna Jahowa Zebaot. [55†]

⁷Songon on do hata ni Jahowa Zebaot: Ida ma, ahu ma paluahon bangsongku sian tano tungkan habinsaran dohot sian tano tungkan hasundutan ni mata ni ari.

⁸Jala ahu mamboan nasida mulak, asa maringanan nasida di parsitongaan ni Jerusalem, jadi * bangsongku ma nasida, jala ahu Debatanasida di bagasan hasintongan dohot hatigoran. [56†] II.

⁹Songon on do hata ni Jahowa Zebaot: * Pagomos hamu ma tanganmuna, hamu angka na umbege hata on na sian pamangan ni panurirang, angka na nidokna + di ari haoojak ni bagas ni Jahowa Zebaot laho paulihon joro i. [57†]

¹⁰Ai di jolo ni angka ari on, * ndang taruli halak di gogona, hangoluan di pinahan pe soada, ndang marhasonangan sian na manosak na marmeang muli, jadi masisosahan nasida sama nasida hubahen. [58†]

¹¹Alai anggo nuaeng ndang be ahu songon di angka ari na jolo tu pasipasi ni bangso on, ninna Jahowa Zebaot.

¹²Ingkon adong do boni hadameon. Lehonon ni hau anggur do parbuena jala tano on mangalehon gogona, jala langit i mangalehon namburna, asa ditean pasipasi ni bangso on saluhutna i hubahen.

¹³Jadi masa ma sogot songon i hamu pinompar ni Juda dohot Israel gabe sipaburaburaan di tongatonga ni angka parbegu nasailaon, suang songon i ma ahu manumpak di hamu, asa * manjadi pasupasu hamu sogot; unang hamu mabiar, pagomos hamu ma tanganmuna. [59†]

¹⁴Ai songon on do hata ni Jahowa Zebaot, songon sangkap ni rohangku na jolo naeng manorui hamu, uju marronirimas ahu mida ompumuna ninna Jahowa Zebaot, jala ndang marpangulahi rohangku.

¹⁵Suang songon i sangkaphu di angka ari on naeng marpangulahi rohangku mambahen na denggan tu Jerusalem dohot tu pinompar ni Juda. Dibahen i unang hamu mabiar.

¹⁶Alai on ma hata angka sibahenonmuna. * Ganup ma mandok hata hasintongan tu donganna, hasintongan dohot uhum! Hadameon ma panguhumonmuna di partungkoanmuna. [60†]

¹⁷Jala * unang dipingkiri roha ni manang ise bahen hamagoan ni donganna, jala unang mangapian hamu di tolontolon sipaotooto, ai luhut angka sisongon i huhagigihon do, ninna Jahowa. [61†] III.

¹⁸Dung i ro ma muse hata ni Jahowa Zebaot tu ahu:

¹⁹Songon on do hata ni Jahowa Zebaot: Parpuasaon di bulan sipaha opat dohot parpuasaon di bulan sipahalima dohot parpuasaon di bulan sipaha pitu dohot parpuasaon di bulan sipaha sampulu ingkon manjadi las ni roha do i dohot hasonangan tu pinompar ni si Juda, dohot manjadi angka pararirayaon bolon; asal dihaholongi hamu hasintongan dohot hadameon. [62†]

²⁰Songon on do hata ni Jahowa Zebaot: Ro dope anggo sogot angka bangso dohot pangisi ni angka huta bolon.

²¹Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi! [63†]

²²Tongon tahe ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa.

²³Songon on do hata ni Jahowa Zebaot: I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna. [64†]