Read Batak Toba PANURIRANG MALEAKI 2 Bible Online

PANURIRANG MALEAKI 2 - Batak Toba bible

PANURIRANG MALEAKI 2

¹I. [1] Nuaeng pe hamu ale angka malim, tu hamu do tona on!

²Molo so ditangihon hamu, jala molo so olo hamu marateatehon hata i mangalehon hamuliaon di goarhu, ninna Jahowa Zebaot, tongosonku ma * bura tu tongatongamuna, jala toruanku ma pasupasu na tu hamu, nunga tahe hutorui, ala soadong sian hamu na olo marateatehon hata i. [9†]

³Ida ma, ala hamu ahu mangago na sinaburhonmuna, jala ahu manirihon napa tu bohimuna, napa ni ari rayamuna, laos tarboan dohot hamu tu atasna.

⁴Jadi botoonmuna ma, ahu do tongon manongos tona on tu hamu bahen padan naung hubahen tu halak Lepi, ninna Jahowa Zebaot. [10†]

⁵Padan na hubahen i tu ibana, padan hangoluan dohot hasonangan do nian. * Hulehon pe angka i tu ibana bahen biar nian, asa dihabiari ahu jala manonditnondit ibana maradophon goarhu. [11†]

⁶Patik hasintongan do nian di bagasan pamanganna, jala hageduhon, ndang adong jumpang di bibirna; di bagasan hadameon dohot hapitaon ibana marpangalaho rap dohot ahu, jala torop halak mulak sian hajahaton dibahen ibana. [12†]

⁷Ai anggo * angka bibir ni malim, ingkon ramotanna parbinotoan, jala sian pamanganna usousoan patik, ai + suruan ni Jahowa Zebaot do ibana. [13†]

⁸Alai anggo hamu nunga manimbil sian dalan i, gabe lan halak targasip dibahen hamu mangalaosi patik; nunga diose hamu padan tu halak Lepi, ninna Jahowa Zebaot.

⁹Ahu pe antong, bahenonku do hamu marlea jala tarjepol maradophon sandok bangso i, hombar tu naung binahenmuna, na so niradotanmuna angka dalanku, gabe marnida bohi hamu mangaradoti patik i. II.

¹⁰Nda * sada do ama ni hita on luhut? Nda + sada do Debata na tumompa hita? Boasa ma tung masiosean hita ganup tu donganna laho paleahon padan na tu ompunta i? [14†]

¹¹Halak Juda nunga mangose, jala nunga diulahon halak Israel biasbias nang di Jerusalem; ai nunga diramuni halak Juda bagas habadiaon na hinaholongan ni Jahowa, jala nunga martuan laen nasida tu * boru ni halak pardebata sileban. [15†]

¹²Ingkon siap sogot bahenon ni Jahowa bao na mangulahon sisongon i, sian undungundung ni Jakkob, nang pangaririt nang pangolopi ro di na mamboan pelean sipanganon tu Jahowa Zebaot.

¹³Pambahenanmuna angkupni on do: Dihungkupi hamu do langgatan ni Jahowa dohot iluilu, partangison dohot hoihoi, alani ndang adong be rohana manailihon * pelean sipanganon, manang marlomo ni roha manjangkon manang aha sian tanganmuna. [16†]

¹⁴Lam didok hamu dope: Ala ni aha do? Ala Jahowa do sitindangi di holangkolangmi dohot jolmam di haposoonmu, naung tinoisanmi, atik pe nasida tuan laenmu jala jolma ni parjanjianmu. [17†]

¹⁵Jala ndang anggo ibana * na sasada i mambahen songon i, laos tading dope di ibana pasipasi ni tondi. Alai aha do diulahon na sasada i? + Na mangalului pinompar sian Debata do ibana. Dibahen i jaga hamu ma tondimuna, unang tung ditoisi manang ise jolma ni haposoonna. [18†]

¹⁶Ai huhagigihon do * parsirangan, ninna Jahowa Debata ni Israel, nang halak na manghungkupi pangarupaon marhite sian ulosna, ninna Jahowa Zebaot. Dibahen i jaga hamu ma tondimuna, unang datdati hamu mangose! [19†]

¹⁷Tung na loja do Jahowa dibahen hamu marhitehite * pangkataionmuna! Hape lam didok hamu dope: Marhitehite aha hulojai hami ibana? Marhitehite na nidokmuna i: Nasa siulahon hajahaton, denggan do roha ni Jahowa marnidasa, jala marlomo ni roha ibana mida nasida. Manang tung didia ma Debata na mandabu uhum? [20†]