Read Batak Toba MATEUS 1 Bible Online

MATEUS 1 - Batak Toba bible

MATEUS 1

¹I. [1] On ma surat partuturan ni Jesus Kristus, anak ni si Daud, anak ni si Abraham. [1†]

²Anak ni si Abraham si Isak; anak ni si Isak si Jakkob; anak ni si Jakkob si Juda dohot angka hahaanggina. [2†]

³Anak ni si Juda si Peres dohot si Jara, sian si Tamar; anak ni si Peres si Hesron; anak ni si Hesron si Ram. [3†]

⁴Anak ni si Ram si Aminadab; anak ni si Aminadab si Nahason; anak ni si Nahason si Salmon. [4†]

⁵Anak ni si Salmon si Boas sian si Rahab; anak ni si Boas si Obed sian si Rut; anak ni si Obed si Isai. [5†]

⁶Anak ni si Isai raja Daud; anak ni si Daud si Salomo, sian jolma ni si Uria. [6†]

⁷Anak ni si Salomo si Rehabeam; anak ni si Rehabeam si Abia; anak ni si Abia si Asa. [7†]

⁸Anak ni si Asa si Josapat; anak ni si Josapat si Joram; anak ni si Joram si Usia. [8†]

⁹Anak ni si Usia si Jotam; anak ni si Jotam si Ahas; anak ni si Ahas si Hiskia.

¹⁰Anak ni si Hiskia si Manasse; anak ni si Manasse si Amon; anak ni si Amon si Josia.

¹¹Anak ni si Josia si Jekonya dohot angka hahaanggina; i ma di tingki habubuangnasida na tu huta Babel. [9†]

¹²Jadi dung tarbuang nasida, tubu ma si Sealtiel, anak ni si Jekonya, dung i si Serubabel, anak ni si Sealtiel. [10†]

¹³Anak ni si Serubabel si Abihud; anak ni si Abihud si Eliakim; anak ni si Eliakim si Asor.

¹⁴Anak ni si Asor si Sadok; anak ni si Sadok si Akim; anak ni si Akim si Eliud.

¹⁵Anak ni si Eliud si Eleasar; anak ni si Eleasar si Mattan; anak ni si Mattan si Jakkob.

¹⁶Anak ni si Jakkob si Josep, dongan saripe ni si Maria, na tumubuhon Jesus, na margoar Kristus.

¹⁷Sampulu opat do torop ni sundut ni si Abraham ro di si Daud; laos sampulu opat sundut do olat ni si Daud ro di habubuangnasida tu huta Babel, jala sampulu opat sundut do muse olat ni habubuangnasida sahat ro di Kristus i. II.

¹⁸Ianggo hatutubu ni Jesus Kristus songon on do: Uju oroan ni si Josep i dope inana, si Maria i, gabegabean do ibana sian Tondi Parbadia, andorang so masipadonohan dope nasida. [11†]

¹⁹Ala parroha na bonar si Josep, na mangoro si Maria, ndang adong rohana paurakkon nasida, gabe ditahi rohana nama, naeng sirangkononna songon i.

²⁰Alai di na songon i dope tahi ni rohana, diida ma di nipina surusuruan ni Tuhan i, na mandok tu ibana: O Josep, anak ni si Daud, unang alang roham mangalap si Maria, gabe donganmu saripe muse, ai na sian Tondi Parbadia do na naeng tubu di ibana. [12†]

²¹Tumubuhon Anak ma ibana; Jesus do Goarna, bahenonmu, ai paluaonna do bangsona sian angka dosanasida be. [13†]

²²Masa pe sudena i, asa jumpang na hinatahon ni Tuhan i marhite sian panurirangna na mandok: [14†]

²³“Ida hamu ma, gabegabean do na marbaju i, tubuan Anak ma ibana; jala bahenon do Goarna Immanuel, lapatanna: Donganta ma Debata!”

²⁴Jadi dung tarsunggul si Josep, dioloi ma hata ni surusuruan ni Tuhan i: Saut ma dialap na niolina i.

²⁵Alai laos so ditanda, paima tubu buhabajuna i; jadi digoar ma Ibana Jesus. [15†]