Read Batak Toba MATEUS 12 Bible Online

MATEUS 12 - Batak Toba bible

MATEUS 12

¹I. [1] Dung i mamolus ma Jesus sian tonga ni hauma, tongon di ari Sabbat i, jala digotili angka siseanna ma eme i, ala naung male dihilala, laos digugut.

²Marnida i angka Parise, ninna nasida ma mandok Ibana: Bereng! Indi, siseanmi! Diulahon nasida do na so jadi di ari Sabbat! [197†]

³Dung i ninna ma mandok nasida: Ndang dung dijaha hamu huroha na binahen ni si Daud, uju male ibana rap dohot angka donganna sauduran? [198†]

⁴Ai dibongoti do joro ni Debata, gabe dipangan nasida do roti na marhadohoan, na so jadi panganonna manang panganon ni angka donganna pe, nda holan angka malim i do nian. [199†]

⁵Manang na so dung ulaning dijaha hamu di buku patik i, na so sala hape angka malim jumpa ari Sabbat di bagasan joro i, nang pe dilaosi patik ari Sabbat i? [200†]

⁶Alai hudok ma tu hamu: Na sumurung sian bagas joro i do On!

⁷Alai ndang tagamon uhumonmuna nasida na so marsala i, aut na diboto hamu na nidok ni hata on: “Asi ni roha do huhalomohon, ndada anggo pelean.” [201†]

⁸Ai guru di Anak ni jolma i do nang ari Sabbat i! II.

⁹Jadi hehe ma Ibana sian i, dibongoti ma parguruannasida.

¹⁰Jala adong ma disi sada halak naung mate tanganna sambariba, jala disungkun nasida ma Ibana: Ai na jadi do pamalumon sahit di ari Sabbat? Alai na naeng aluhononnasida do Ibana nian. [202†]

¹¹Alai ninna ma mandok nasida: Ise sian hamu na marbirubiru sada, na so laho manahopi i jala manaiti tu ginjang, ia tung targodung i di ari Sabbat? [203†]

¹²Nda andul sumurung ma antong jolma sian birubiru! Asa na jadi do mambahen na denggan di ari Sabbat.

¹³Dung i ninna ma mandok jolma i: Patoltol ma tanganmi! Jadi dipatoltol ma, gabe sumuang ma hisar songon tanganna na sada nari.

¹⁴Jadi ruar ma angka Parise i martuptup i, manang beha bahenonnasida mambunu Ibana. [204†]

¹⁵Dung diboto Jesus tahinasida, sumurut ma Ibana sian i. Anggo natorop i, diihuthon do Ibana, jadi dipamalum ma sahitnasida saluhutna. [205†]

¹⁶Jala gomos ma nasida dipopai, asa unang dipaboaboa nasida Ibana. [206†]

¹⁷Asa jumpang na nidok ni panurirang Jesaya: [207†]

¹⁸“Ida ma naposongku na hupillit i, haholonganku jala hasoloan ni rohangku do Ibana; ampehononku do Tondingku tu Ibana, jala lumbahononna ma uhum tu angka bangso. [208†]

¹⁹Ndang olo Ibana mangkuling tomputompu, jala ndang dipagogo soarana; ndang tarbege Ibana di adaran na bidang.

²⁰Ndang ponggolhononna arung naung marosak, jala ndang na intopanna sumbu na marnehetnehet; ingkon sahat do pamonangonna uhum i.

²¹Gabe tu Goarna ma marhaposan angka bangso!” III.

²²Dung i tarboan ma tu jolona sada halak partondi na hodar, na mapitung jala na ngungu; jadi malum do ibana dibahen, gabe mangkatai ma ibana huhut marnida.

²³Jadi tarhalomong ma halak natorop i saluhutna, didok nasida ma: Nda tung On Anak ni si Daud ulaning?

²⁴Umbege i angka Parise, ninna nasida ma: Si Beelsebul, induk ni angka sibolis, do dipangasahon Ibana, laho pabalihon angka tondi na hodar. [209†]

²⁵Alai diboto Jesus do pingkiran ni rohanasida, jadi ninna ma mandok nasida: Pesan do ganup harajaon na marsalisi sama dirina, jala ndang na hot be manang huta manang bagas na marsalisi dohot dirina.

²⁶Asa molo dipabali sibolis i donganna sibolis, marsalisi nasida sama nasida.

²⁷Jala molo tung Ahu pabalihon angka sibolis mangasahon si Beelsebul, na mangasahon ise do huroha angka anakmuna laho pabalihonsa? Onpe, nasida do manguhumi hamu disi.

²⁸Alai anggo Ahu pabalihon angka sibolis i mangasahon Tondi ni Debata, naung songgop ma tahe harajaon ni Debata tu hamu! [210†]

²⁹Tung habongotan halak ma jabu ni ulubalang jala mangarampas ugasanna, anggo so jumolo diihoti ulubalang i? Nda dung pe i, asa tarbuatsa ugasanna? [211†]

³⁰Na so mandongani Ahu, alongku do i; jala na so donganku papunguhon, na paserakkon do i. [212†]

³¹Dibahen i hudok ma tu hamu: Tarsesa do sogot nasa dosa ni halak ro di panginsahion, alai ndang sesaon anggo panginsahion dompak Tondi i. [213†]

³²Asa molo adong na mandok hatana mangalo Anak ni jolma i, hasesaan do i; alai molo adong na mandok hatana mangalo Tondi Parbadia i, ndang na sesa anggo i, manang di hasiangan on, nang di na ro sogot. [214†]

³³Molo hau na denggan sinuan, na denggan ma antong parbuena; molo hau na roa sinuan, gabe roa do parbuena, ai matua sian parbuena do tandaon hau. [215†]

³⁴E hamu anak ni ulok, tung tarbahen hamu angka na jahat i ma mangkatahon hata na denggan? Ai ia i na manggohi roha, matua i do hatahonon ni pamangan.

³⁵Dirungkari halak na denggan roha do angka hadengganon sian arta na denggan na pineopna i; jala anggo halak na jahat roha, angka hajahaton do rungkaranna sian na jat na pineopna hian.

³⁶Alai hudok ma tu hamuna: Ingkon maralus do jolma sogot di ari uhum i taringot tu nasa hata na so gabeak na hinatahonna i.

³⁷Ai marguru tu angka hatami do ho pintoranna manang uhumonna sogot.

³⁸Dung i ninna na deba sian angka Parise dohot sibotosurat ma mangalusi: Ale Guru, naeng idaonnami do sada tanda sipatupaonmu! [216†]

³⁹Alai ninna ma mangalusi nasida: Na mangido tanda do bangso na jahat jala na mangalangkup on; alai ndang lehonon tanda tu nasida, ia so holan tanda na masa tu panurirang si Jonas:

⁴⁰Ai songon si Jonas i tolu ari tolu borngin di bagasan butuha ni dengke na bolon, songon i ma muse Anak ni jolma i di bagasan tano, tolu ari tolu borngin lelengna. [217†]

⁴¹Na hehe do sogot halak Ninive di paruhuman i dompak bangso na sansundut on, mangkonahon uhum tusi, ai dipauba do rohanasida, umbege jamita ni si Jonas. Jala ida ma, On do na sumurung sian si Jonas i! [218†]

⁴²Na hehe do sogot di paruhuman i raja boruboru na sian dangsina i dompak halak na sansundut on, mangkonahon uhum tusi, ai na ro do nasida sian luat na sai dao mananginangi hamaloon ni si Salamo. Ida ma, On do na sumurung sian si Salomo! [219†]

⁴³Alai dung bali tondi na hodar sian jolma, didalani ma angka inganan na hasang, mangalului paradianan, jala ndang jumpangsa.

⁴⁴Gabe didok ma: Mulak nama ahu tu ingananku na hutadingkon i! Jadi di na ro ibana, rumar ma i didapot, nunga disapu jala dipalehet.

⁴⁵Dung i borhat ma ibana mangarahon pitutondi na asing, angka na jumahat sian ibana, laos dibongoti ma laho maringanan tusi; jadi jumahat ma pangalaho ni jolma i di ujungna sian di mulana i. Songon i nama songgop tu bangso na jahat on! [220†] IV.

⁴⁶Jadi di na mangkatai dope Ibana dohot natorop i, nunga jongjong di duru inana rap dohot angka anggina, naeng mangkatai dohot Ibana. [221†]

⁴⁷Dung i adong ma na paboahon: Di balian an do inangmu dohot angka anggim, naeng mangkatai dohot Ho!

⁴⁸Alai ninna ma mangalusi na paboahon i: Ise do goaron dainang, jala ise do dohonon anggingku? [222†]

⁴⁹Jadi dipaherbang ma tanganna tu ginjang ni angka siseanna, huhut ma didok: Angka on do dainang dohot anggingku!

⁵⁰Ai na mangulahon lomo ni roha ni Damang na di banua ginjang, i do anggingku, i do ibotongku, i do dainang! [223†]