Read Batak Toba MATEUS 16 Bible Online

MATEUS 16 - Batak Toba bible

MATEUS 16

¹I. [1] Dung i ro ma angka Parise dohot Saduse mangunjuni Ibana, mangido tanda sian banua ginjang sipatuduhononna tu nasida. [264†]

²Alai ninna ma mangalusi nasida: Jumpa botari somal didok hamu: Logo ma ari, ai manariur do langit. [265†]

³Ia manogotnogot: Na ro ma ari sadari on, ai habut do langit jala halindo. Malo do hamu nian manjujur rupa ni langit; ia manjujur na tinudu ni na masa nuaeng, ndang diboto hamu? [266†]

⁴Bangso parjahat jala pangalangkup mangido tanda; alai holan tanda ni si Jonas do sipamasaon tu nasida. Dung i laho ma Ibana, ditadingkon ma nasida. [267†]

⁵Jadi dung sahat siseanna tu bariba, lupa do nasida hape mamboan roti.

⁶Gabe didok Jesus ma tu nasida: Manat jala jaga ma hamu pasiding na niasoman na di angka Parise dohot Saduse! [268†]

⁷Dung i masipandohan ma nasida: Dibahen na so mamboan roti do hita hape!

⁸Jadi dung diboto Jesus i, didok ma: Boasa dipanghatahatahon hamu, na so mamboan roti hamu? Oe parhaporseaon na otik! [269†]

⁹Ndang dope mangantusi rohamuna? Ndang diingot hamu na lima roti i, uju di na limaribu i, dohot godang ni ebaeba pinapungumuna i? [270†]

¹⁰Manang na pitu roti i di na opatribu i ro di ebaeba pinapungumuna disi? [271†]

¹¹Beha, ndang diantusi hamu, na so taringot tu roti hatangki: Jaga ma hamu pasiding na niasoman na di angka Parise dohot Saduse? [272†]

¹²Disi pe asa dapot rohanasida: Ndada na niudi na niasoman ni halak Parise dohot Saduse hape na nidokna i sijagaon, tung podanasida do. II.

¹³Jadi sahat ma Jesus tu luat Kaesarea Pilippi, gabe disungkun ma angka siseanna: Ise do Anak ni jolma i, didok halak?

¹⁴Jadi didok nasida ma: Na deba mandok: Si Johannes pandidi, anggo na deba: Si Elia, na asing muse: Si Jeremia manang sahalak sian angka panurirang i. [273†]

¹⁵Dung i didok ma tu nasida: Ia hamu, ise do Ahu, didok hamu?

¹⁶Jadi ninna si Simon Petrus ma: Kristus (Messias), Raja na pinarbagabaga i do Ho, Anak ni Debata na mangolu! [274†]

¹⁷Dung i ninna Jesus ma mangalusi ibana: Martua do ho, Simon, anak ni si Jona, ai ndada daging dohot mudar papatarhon i tu ho, Damang na di banua ginjang i do. [275†]

¹⁸Ahu pe, hudok ma tu ho: Si Petrus (Batu mamak) do ho, jala di atas batu mamak ondeng do paojahonku huriangku, jala na so tupa talu i bahenon ni angka harbangan ni banua toru. [276†]

¹⁹Hulehon pe tu ho anak hinsu ni harajaon banua ginjang i: Nasa na niihotanmi di tano on, na tarihot ma i nang di banua ginjang; jala nasa na pinaluam i di tano on, malua ma i nang di banua ginjang. [277†]

²⁰Dung i diorai ma angka siseanna, unang dipaboa nasida tu halak, Ibana do Kristus i. [278†] III.

²¹Olat ni i ma dipatorang Jesus tu angka siseanna, na ingkon laho do Ibana tu Jerusalem manaon na porsuk sian angka sintua ni natorop, sian sintua ni malim nang sian sibotosurat pe, pola ingkon mate Ibana bunuon, jala pangoluon di ari patoluhon. [279†]

²²Dung i diarahon si Petrus ma Ibana, disaritai ma, ninna do: Asi ma roha ni Debata di Ho, Tuhan! Unang ma songgop i tu Ho!

²³Alai humusor ma anggo Ibana mandok tu si Petrus: Laho ma ne ho, bolis! Gasip do ho di Ahu, ai ndang diparrohahon ho angka na di Debata, angka na di jolma do. IV.

²⁴Dung i didok Jesus ma tu angka siseanna: Nasa na giot mangihuthon Ahu, disoadahon ma dirina, diporsan ma silang na tu ibana; diihuthon ma Ahu! [280†]

²⁵Ai na naeng paluahon hosana, mangagohonsa do; alai na agoan hosa ala ni Ahu, i do na jumpangan.

²⁶Ai aha ma antong gunana di jolma, nang liat portibi on diomo, anggo mago do tondina? Aha ma tarlehon jolma bahen tobus ni tondina?

²⁷Ai na ro ma sogot Anak ni jolma i di bagasan hasangapon ni Amana rap dohot angka surusuruanna; dung i balosonna ma tu ganup, hombar tu na niulana. [281†]

²⁸Na tutu do na hudok on tu hamu: Ndang na mangae hamatean anggo deba sian angka na jongjong dison, so jolo diida ro Anak ni jolma i di bagasan harajaonna. [282†]