Read Batak Toba MATEUS 17 Bible Online

MATEUS 17 - Batak Toba bible

MATEUS 17

¹I. [1] Dung i salpu onom ari, diarahon Jesus ma si Petrus, si Jakobus dohot anggina si Johannes, ditogihon ma nasida tu sada dolok na timbo, tu na suhi.

²Dung i muba ma rupana diida nasida, gabe marsinondang ma bohina songon mata ni ari i, mamontar ma ulosna songon na tiur. [283†]

³Jadi tarida ma di nasida si Musa dohot si Elia, na mangkatai dohot Ibana.

⁴Jadi dipanghulingi si Petrus ma Jesus: Tuhan, sonangna i dison! Molo na une di roham, hupauli ma dison tolu inganan, sada di Ho, sada di si Musa, sada di si Elia.

⁵Mandok i dope ibana, ro ma sada ombun na tiur mangalinggomi nasida jadi mangkuling ma soara sian bagasan ombun i: On do Anak haholonganku, lomo do rohangku mida Ibana; tangihon hamu ma Ibana! [284†]

⁶Umbege i angka sisean i, manungkap ma nasida jala mabiar situtu.

⁷Gabe didapothon Jesus ma nasida laos dijamai, huhut ma didok: Hehe ma hamu; unang ma mabiar!

⁸Alai laho manaili tu ginjang, sasada Jesus nama dapot matanasida disi.

⁹Jadi laho tuat sian dolok i, dipatihi Jesus ma nasida, na so jadi paboaon tu manang ise pe na niidanasida, saleleng so hehe dope Anak ni jolma i sian na mate. [285†]

¹⁰Dung i disungkun angka siseanna ma Ibana: Beha do pandok ni angka sibotosurat: Ingkon jumolo ro si Elia? [286†]

¹¹Gabe dialusi Jesus ma nasida: Ro ma tutu si Elia pajongjongkon saluhutna.

¹²Alai hudok ma tu hamu: Nunga sahat ro si Elia, alai ndang ditanda nasida ibana; roharohanasida do dibahen tu ibana. Laos songon i ma mangae Anak ni jolma i bahenonnasida. [287†]

¹³Dung pe i asa diboto siseanna i, si Johannes pandidi na nidokna i disi. [288†] II.

¹⁴Dung sahat nasida tu natorop i, ro ma sada halak sumomba Ibana huhut mandok:

¹⁵Tuhan, sai asi ma roham di anakki; na solpoton do ibana, mansai bernit diae; jotjot ibana somsam tu api, jotjot tu aek.

¹⁶Huboan do ibana nian tu angka siseanmi alai ndang tarpamalum nasida ibana.

¹⁷Dung i ninna Jesus ma mangalusi: E bangso na so porsea jala na sumalin on! Sadia leleng on angkupanku hamu? Sadia leleng nari anjuonku hamu? Boan hamu ma ibana tuson!

¹⁸Dung i disonggahi Jesus ma ibana, gabe ruar ma sibolis i sian ibana, jadi hisar ma dakdanak i olat ni na sangombas i.

¹⁹Dung i pulik ma ditopot angka sisean i Jesus mandok: Boasa so tarpabali hami ibana? [289†]

²⁰Jadi didok Jesus ma tu nasida: Ala ni otik ni haporseaonmuna do! Ai situtu do na hudok on tu hamu: Nanggo na sabatu ni sabi haporseaonmuna, dohononmuna ma tu dolok on: Munsat ma ho sian on tusan!, saut do i munsat; gabe ndang adong na so tarpatupa hamu. [290†]

²¹Alai anggo na samansam on, ndang olo bali, ia so marhite sian tangiang dohot parpuasaon. III.

²²Alai di na pungu i nasida di Galilea, didok Jesus ma tu nasida: Sipasahaton ma Anak ni jolma i tu tangan ni halak. [291†]

²³Pola do mate Ibana bunuonna, dung i pangoluon do Ibana di ari patoluhon. Jadi bobonosan situtu ma rohanasida. IV.

²⁴Jadi dung sahat nasida tu huta Kapernaum, ro ma angka sijalo guguan tu si Petrus mandok: Beha, ndang digarar Gurumuna guguan i? [292†]

²⁵Digarar do, ninna. Jadi laho bongot tu jabu, manjoloani ma Jesus mandok: Beha di roham, Simon, sian ise do dijalo angka raja di tano on guguan manang beo? Sian anakna manang sian na leban?

²⁶Jadi didok si Petrus ma tu Ibana: Sian na leban i do! Gabe ninna Jesus ma: Antong, lias do ia angka anak!

²⁷Alai asa unang targasip nasida tabahen, laho ma ho tu tao, dabu ma hail i, dung i sintak ma dengke na parjolo manoro, bungka holaholana, jadi jumpang ho ma disi sada rupia; i ma buat, lehon ma i tu nasida bahen guguanta i.