Read Batak Toba MATEUS 18 Bible Online

MATEUS 18 - Batak Toba bible

MATEUS 18

¹I. [1] Uju i didapothon angka sisean i ma Jesus mandok: Ise ulaning na umbalga di harajaon banua ginjang?

²Jadi dijou Jesus ma sada dakdanak, dipajongjong ma i tu tongatonganasida, dung i ninna ma:

³Situtu do na hudok on tu hamu: Molo so mulak rohamu, gabe songon dakdanak, tung na so bongot hamu tu harajaon banua ginjang i. [293†]

⁴Asa na paoru dirina songon dakdanak on, i do na umbalga di harajaon banua ginjang i. [294†]

⁵Jala na manjangkon dakdanak na songon on marhitehite Goarhu, Ahu do na jinangkonna disi. [295†]

⁶Alai na manggasipi sada sian na metmet on, angka na porsea di Ahu, dengganan ma ginantungkon losung batu tu rungkungna, laho mangalonongkon ibana tu laut na umbagas i. [296†]

⁷Oe, jea ni portibi on, nialap ni gasip! Ndang tarbahen so ro nian gasip; alai marjea ma jolma na parohonsa!

⁸Alai molo tung digasipi tanganmu manang patmu ho, gotap jala bolongkon, ai dumenggan mate bariba manang lumpuon ho bongot tu hangoluan, sian na mardua tangan dohot mardua pat, bolong tu api sisalelenglelengna. [297†]

⁹Molo tung digasipi matami ho, pulsikkon jala bolongkon, ai dumenggan marmata sada ho, bongot tu hangoluan, sian na marmata dua, bolong tu api na roko.

¹⁰Jaga ma hamu, so tung marhu ni roha hamu mida sada sian na metmet on, ai hudok ma tu hamu: Diida angka surusuruannasida na di banua ginjang i do tongtong bohi ni Damang na di banua ginjang i. [298†] (

¹¹Ai naung ro do Anak ni jolma i, paluahon na mago.) [299†]

¹²Beha do rohamuna: Adong ma di sahalak saratus birubiru, gabe mago sada sian i; nda tadingkononna ma na siapulu sia i di tor, laho mangalului na mago i?

¹³Na sintong ma na hudok tu hamu: Anggo dung jumpangsa, lasan ma rohana mida i, asa mida na siapulu sia na so mago i.

¹⁴Suang songon i do roha ni Amamuna na di banua ginjang i, ai dipangido do, naeng unang mago agia sada sian na metmet on. II.

¹⁵Alai molo mardosa donganmi, topot jala ajari ibana, holan hamu padua. Molo ditangihon ho, dapot ho do ibana gabe donganmu muse. [300†]

¹⁶Alai anggo so ditangihon ho, arahon ma donganmu sada manang dua, asa hinatindangkon ni dua manang tolu halak nasa hata. [301†]

¹⁷Alai molo so ditangihon nang nasida, paboa ma tu na sahuria i. Molo so ditangihon nang huria i, etong ma ibana songon parbegu jala sijalobeo. [302†]

¹⁸Situtu do na hudok on tu hamu: Nasa na niihotanmuna di tano on, hot ma i tarihot nang di banua ginjang, jala nasa na pinaluanmuna di tano on, saut ma i malua nang di banua ginjang. [303†]

¹⁹Angkup ni i hudok ma di hamu: Molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang i. [304†]

²⁰Ai anggo pungu dua manang tolu pe marhitehite Goarhu, sai dongananku do nasida. [305†] III.

²¹Dung i didok si Petrus ma mandok Ibana: Tuhan, sintap piga hali do sesaonku sala ni donganku na dompak ahu? Pola do pitu hali?

²²Gabe didok Jesus ma tu ibana: Ndada pitu hali dohononku tu ho, tung sintap pitupulu hali pitu do! [306†]

²³Onpe, tudos ma harajaon banua ginjang i tu sada raja, na laho mardabudabu dohot angka naposona.

²⁴Jadi di na manungka mangetong ibana, tarboan ma tu jolona sada halak, na marutang tu ibana saloksa talenta.

²⁵Jadi dibahen na so adong gararna, didokkon raja i ma gadison ibana dohot jolmana ro di anakkonna ro di saluhut na di ibana, asa adong gararna.

²⁶Jadi marsomba ujung ma naposo i tu adopanna, ninna ma: Palambas ma roham, hugarar pe tu ho saluhutna i!

²⁷Jadi asi do roha ni raja i di naposona, dipalua ma ibana, ba disesa ma utangna i.

²⁸Alai laho tu balian naposo ondeng, tongon ma dapotsa donganna naposo sahalak, na marutang tu ibana saratus hupang, gabe ditangkup ma i jala dipongkihi, ninna ma: Garar ma utangmi!

²⁹Dung i marsomba ujung ma i, sumomba donganna naposo mandok: Palambas ma roham mida ahu, hugarar pe tu ho saluhutna i!

³⁰Alai ndang olo, laho do ibana mangkurungkon donganna, paima digarar utangna i.

³¹Jadi dung diida angka donganna naposo na masa i, marsak situtu ma rohanasida, jadi laho ma nasida tu raja i paboahon sude na masa i.

³²Gabe dijou raja i ma ibana, didok ma: Ho naposo na jahat, sude utangmi husalesehon, ala dielehelek ho ahu.

³³Nda ingkon songon i ma ho nian marasi ni roha di donganmu naposo, songon ahu na marasi ni roha di ho!

³⁴Jadi tarrimas ma raja i, dipasahat ma ibana tu pamongkihi, paima digarar sude utangna i. [307†]

³⁵Songon i do bahenon ni Damang na di banua ginjang i tu hamu, anggo so disesa hamu be sian rohamuna sala ni donganmuna! [308†]