Read Batak Toba MATEUS 19 Bible Online

MATEUS 19 - Batak Toba bible

MATEUS 19

¹I. [1] Asa dung dipaujung Jesus pamodaionna ondeng, borhat ma Ibana sian Galilea, gabe sahat ma tu luat Judea na di ipar ni aek Jordan.

²Jadi mansai torop halak mangihuthon Ibana, laos dipamalum ma nasida disi.

³Dung i ro ma angka Parise mangunjuni Ibana, ninna do: Beha, na jadi do sirangkonon ni baoa jolmana, asal adong alana? [309†]

⁴Alai ninna ma mangalusi nasida: Ndang dung dijaha hamu huroha: Sian mulana i do ditompa Panompa i nasida baoa dohot boruboru? [310†]

⁵Ai didok do: “Dibahen i tadingkonon ni baoa do amana dohot inana, laho patophon dirina tu dongan saripena, gabe sada daging do nasida na dua i.” [311†]

⁶Asa ndada dua be nasida, tung sada daging do. Onpe, naung pinadomu ni Debata, ndang jadi sirangon ni jolma. [312†]

⁷Dung i didok nasida ma tu Ibana: Molo boti, boasa patikkonon ni si Musa, lehonon surat sirang laho paulakkon? [313†]

⁸Gabe didok ma tu nasida: Ala ni tangkang ni rohamuna do, umbahen na diloas si Musa hamu paulakkon jolmamuna; alai nda tung i songon i sian mulana.

⁹Alai hudok ma tu hamu: Pangalangkup do nasa na paulakkon jolmana, dung i dioli na asing, anggo so ala hata parmainanon. [314†]

¹⁰Dung i ninna angka sisean i ma mandok Ibana: Molo songon i do hape ruhut pardongansaripeon, tagonan unang marnioli.

¹¹Alai didok ma tu nasida: Nda tung saluhut halak tarbahen manjalo hata on, holan angka hasahatanna hian do! [315†]

¹²Ai adong do jolma na ias: Na deba na songon i hian sian hatutubuna; na deba nari na pinaias ni jolma; jala na deba muse na paias dirina ala ni harajaon banua ginjang i. Manang ise na tarbahen manjalo hata i, dijalo ma! II.

¹³Dung i diboan na mamboan ma angka dakdanak tu Ibana, asa diampehon tanganna tu nasida laho tumangiangkonsa. Alai dirimasi angka sisean i ma nasida.

¹⁴Alai ninna Jesus ma: Loas hamu ma ro angka dakdanak i, unang ambat hamu nasida ro tu Ahu; ai di angka sisongon i do harajaon banua ginjang i! [316†]

¹⁵Jadi diampehon ma tanganna tu nasida, laos laho ma sian i. III.

¹⁶Dung i didapothon sada halak ma ibana, didok ma: Gurunami, na denggan dia do patupaonku, asa dapot ahu hangoluan saleleng ni lelengna?

¹⁷Alai didok ma tu ibana: Boasa Ahu sungkunonmu taringot tu na denggan? Holan Sada do parroha na denggan! Alai molo naeng ho bongot tu hangoluan, angka patik i ma radoti! [317†]

¹⁸Jadi didok ma: Angka dia? Gabe didok Jesus ma: On do: “Unang ho mambunu! Unang ho mangalangkup! Unang ho manangko! Unang ho mangkatindangkon gapgap!” [318†]

¹⁹“Pasangap amangmu dohot inangmu! Jala: Haholongi ma donganmu songon dirim!” [319†]

²⁰Dung i ninna dolidoli i ma mandok Ibana: Nunga huradoti sasudena i sian sietehetehonki. Aha dope hahuranganku?

²¹Jadi ninna Jesus ma mandok ibana: Molo naeng sun denggan ho, laho ma ho manggadis artami, parlehon tu angka na pogos, asa mararta ho di banua ginjang; dung i ro ma ho mangihuthon Ahu! [320†]

²²Umbege i, mulak ma dolidoli i saor habot ni rohana, ai paradongan situtu do ibana. [321†]

²³Alai didok Jesus ma tu angka siseanna: Situtu do na hudok on tu hamu: Tung maol do habongotan halak na mora harajaon banua ginjang i.

²⁴Lam dohononku do tu hamuna: Gumabur do bongotan ni gaja pinggol ni jarum, unang halak na mora masuk tu harajaon banua ginjang i.

²⁵Umbege i angka sisean i, tarsonggot situtu ma nasida, angka ninna ma: Ise nama malua, molo boti?

²⁶Alai diberengi Jesus ma nasida, huhut ma didok: Sandok ndang tarpatupa jolma i, alai anggo Debata, saluhut do tarpatupasa. IV.

²⁷Dung i ninna si Petrus ma mangalusi Ibana: Ia hami, saluhut do hutadingkon hami mangihuthon Ho. Aha ma balos ni i tu hami?

²⁸Jadi didok Jesus ma tu nasida: Na tutu do na hudok on tu hamuna: Di ari sogot, di haimbaruon i, di na hundul Anak ni jolma i di habangsa hasangaponna i, dohot ma hamu juguk disi di sampuludua habangsa, manguhumi halak Israel na sampuludua marga i. [322†]

²⁹Jala ganup na manadingkon hahaanggina, ibotona, amana, inana, anakkonna, haumana manang jabuna pe ala ni Goarhu, manjalo ma i marlompitlompit, angkup ni i teanonna hangoluan na saleleng ni lelengna i. [323†]

³⁰Alai lan do angka naung parjolo hian gabe parpudi, jala parpudi hian gabe parjolo. [324†]