Read Batak Toba MATEUS 20 Bible Online

MATEUS 20 - Batak Toba bible

MATEUS 20

¹I. [1] Ai tudos do harajaon banua ginjang i tu sada na mora, na laho sogot di torang ni ari mangarahon pangula tu porlak anggurna. [325†]

²Jadi dung mardos ni roha ibana dohot angka pangulana taringot tu upanasida, i ma sahupang sadari, disuru ma nasida tu porlakna.

³Dung i, laho tu balian di pungkul sia, diida ma halak na asing na ngongong di onan i.

⁴Gabe didok ma tu nasida: Ua, dohot ma hamu tu porlakki! Hulehon pe tu hamu na tama. Jadi laho ma nasida.

⁵Dung i laho muse ma ibana di pungkul sampuludua dohot di pungkul tolu, laos songon i do dibahen.

⁶Dung i laho muse ma ibana di pungkul lima, jadi jumpangsa ma halak na asing jongjong boti disi, jadi didok ma tu nasida: Boasa ngongong sambing hamu manipat sadari on?

⁷Jadi didok nasida ma tu ibana: Ndang adong na mangarahon hami. Dung i didok ma tu nasida: Dohot ma hamu laho tu porlakki!

⁸Asa dung bot ari, didok parporlak anggur i ma mandok juaratulisna: Jou ma angka pangula i, parlehon ma upanasida, jojor sian na parpudi sahat ro di na parjolo i!

⁹Jadi ro ma angka na masuk di pungkul lima, dijalo be ma sahupang.

¹⁰Alai di na ro angka na parjolo i, hirim ma rohanasida, gumodang jaloonna; hape nang nasida, sahupang be do dijalo.

¹¹Alai manjalo i, marmungutmungut ma nasida dompak na mora i,

¹²ninna ma: Ia halak an na parpudi masuk, holan sajom do i mulaulaon, gabe dos do dibahen ho nasida tu hami, angka na tumaon renge ni ulaon ro di mohop ni ari!

¹³Dung i ninna ma mangalusi sada sian nasida: Ndang adong hubahen tu ho na so tigor, amang! Nda mardos ni roha hita di na sahupang i?

¹⁴Jalo ma na tu ho i; dung i laho ma! Alai naeng do ahu mangalehon tu na parpudi on songon na tu ho.

¹⁵Ai nda tama guru di ahu ugasanki? Somor do matam, ala basa ahu? [326†]

¹⁶Songon i ma gabe parjolo angka na parpudi hian, jala angka na parjolo hian gabe parpudi. (Ai lan do na jinou; alai otik do na tarpillit.) [327†] II.

¹⁷Dung i laho nangkok tu huta Jerusalem, pulik ma diarahon Jesus na sampuludua i, dipanghulingi ma nasida di tongandalan i:

¹⁸Na nangkok ma hita tu Jerusalem, pasahatonna ma disi Anak ni jolma i tu angka sintua ni malim dohot tu sibotosurat, gabe uhumonnasida ma Ibana, ingkon marutang hosa. [328†]

¹⁹Dung i pasahatonnasida ma Ibana tu parbegu, asa diinsahi, dilinsingi jala diparsilangkon. Dung i mulak mangolu ma Ibana di ari patoluhon. III.

²⁰Dung i didapothon ina ni anak ni si Sebedeus rap dohot angka anakna i ma Ibana, disomba ma, laho pasahathon pangidoanna. [329†]

²¹Jadi ninna Jesus ma mandok ibana: Aha dipangido rohamu? Dung i didok ma tu Ibana: Loas ma hundul sogot anakku na dua on, na sada di siamunmu, na sada nari di hambirangmu, di harajaonmi! [330†]

²²Alai ninna Jesus ma mangalusi: Ndang diboto hamu na pinangidomuna. Tung tarinum hamu ma siinumon na naeng inumonku (jala tarparidi hamu ma paridion siparidionku)? Jadi didok nasida ma: Tarbahen hami do! [331†]

²³Dung i didok ma tu nasida: Tutu nian, inumonmuna do siinumonki; jala paridihononmuna do pandidion siparidihononki; alai ndang guru di Ahu na mambahen hundul di siamunhu dohot di hambirangku. Damang i do padirihon i tu angka panahatanna i.

²⁴Umbege i na sampulu i, sogo ma rohanasida mida donganna na dua i.

²⁵Alai dipapungu Jesus ma nasida, ninna ma: Dirajai angka sigomgomi bangso do anak buana, jala dipatunduk angka na sangapna do nasida; diboto hamu do i.

²⁶Unang ma songon i anggo di hamu! Manang ise hamu na naeng sangap, i ma gabe pangoloi di donganna. [332†]

²⁷Jadi manang ise hamu, na naeng parjolo, i ma gabe naposo ni donganna. [333†]

²⁸Songon Anak ni jolma i pe, ndada asa dioloi halak Ibana, umbahen na ro; Ibana balik pangoloi jala mangalehon hosana bahen tobus ni torop jolma. [334†] IV.

²⁹Jadi laho ruar sian Jeriko, torop ma halak mangihuthon Ibana.

³⁰Jala hundulhundul ma dua halak na mapitung di pinggol ni dalan i; jadi dung dibege mamolus Jesus, joujou ma nasida, ninna ma: Asi ma roham di hami, Anak ni si Daud!

³¹Alai dipinsang angka natorop i ma nasida, asa sip nian: Alai lam gogo ma nasida manjoujou: Asi ma roham di hami, Tuhan, Anak ni si Daud!

³²Jadi mangulon ma Jesus, dipanghulingi ma nasida: Aha dipangido rohamuna sibahenonku tu hamu?

³³Dung i didok nasida ma: Naeng ma mungkap matanami, Tuhan!

³⁴Gabe asi ma roha ni Jesus, dijama ma matanasida jadi pintor marnida ma. Jadi diihuthon nasida ma Ibana.