Read Batak Toba MATEUS 21 Bible Online

MATEUS 21 - Batak Toba bible

MATEUS 21

¹I. [1] Dung i laho mandapothon huta Jerusalem, sahat ma nasida tu sosor Betpage, mardonokkon dolok Jetun. Sian i ma disuru Jesus siseanna dua halak.

²Ninna ma: Laho ma hamu tu sosor na di jolomuna an, mamintor jumpang hamu ma disi tambat halode sada rap dohot anakna; harhari jala togu hamu ma i tu Ahu!

³Jadi molo tung adong na mandok hatana tu hamu, alusi hamu ma: Na ringkot do i di Tuhan i! Dung i pintor loasonna ma. [335†]

⁴Alai masa pe sisongon i, asa jumpang na hinatahon ni panurirang i:

⁵“Paboa hamu ma tu boru Sion: Ida ma, na ro ma Rajami manopot ho, na lambok do rohana; halode do hundulanna dohot anak ni halode boban.” [336†]

⁶Dung i laho ma angka sisean i patupahon na nidokkon ni Jesus tu nasida.

⁷Diboan nasida ma halode i dohot anakna, diampehon ma ulosnasida tu ginjangna, laos dipahundul ma Jesus tu atasna i. [337†]

⁸Deba sian natorop i pahembangkon ulosnasida tu dalan i, na deba nari manalliki angka ranting ni hau jadi dipanserakkon tusi.

⁹Alai sude natorop i, angka na di jolona nang na mangihut sian pudi pe, mangolopolophon: Hosianna di Anak ni raja Daud! Pinasupasu ma na ro marhitehite Goar ni Tuhan i! Hosianna ma di ginjang! [338†]

¹⁰Jadi di na bongot i Ibana tu huta Jerusalem, gaor ma na sahuta i, angka ninna ma: Ise do halak i?

¹¹Jadi dipandok natorop i ma: Jesus, Panurirang i do i, na sian huta Nasaret, na di luat Galilea! II.

¹²Dung i dibongoti Jesus ma bagas joro ni Debata, dipabali ma sian i saluhut angka na manggadisi dohot na manuhori disi, ditunggalingkon do meja ni angka situngkari hepeng ro di bangku ni angka sigadis darapati. [339†]

¹³Laos didok ma tu nasida: “Bagas partangiangan do goar ni bagashu” ninna Surat i; alai gabe liang ni pandobo do i dibahen hamu! [340†]

¹⁴Dung i didapothon angka na mapitung dohot na lumpuon ma Ibana tu bagas joro i, jadi dipamalum ma nasida. [341†]

¹⁵Alai sogo situtu ma angka sintua ni malim dohot sibotosurat marnida halongangan na pinambahenna i, nang umbege dakdanak angka na manjoujou di bagas joro: Hosianna di Anak ni raja Daud!

¹⁶Laos didok ma tu Ibana: Dibege Ho do hatanasida on? Jadi didok Jesus ma tu nasida: Hubege do! Ndang dung dijaha hamu huroha: “Soara ni angka dakdanak dohot posoposo dipature Ho gabe pujipujian”? [342†]

¹⁷Dung i ditadingkon ma nasida, ruar ma Ibana sian huta i dompak Betania, laos disi ma marborngin. III.

¹⁸Alai torang ni arina i, laho mulak tu huta i, male ma dihilala.

¹⁹Dung i diida ma di dalan i hau ara sangkambona jadi didapothon ma, hape holan bulung sambing do jumpangsa disi, gabe didok ma tu hau i: Na so jadi be ho marparbue olat ni on! Jadi pintor rahar ma hau ara i. [343†]

²⁰Marnida i angka sisean i, tarhalomong ma rohanasida, angka ninna ma: Ndi, tompuna i rahar hau ara i!

²¹Jadi dialusi Jesus ma nasida: Na tutu do na hudok on tu hamu: Aut na porsea hamu, so ganggu rohamu, ndada holan songon na tu hau ara ondeng patupaonmuna. Sandok gari tu dolok an dohononmuna: Munsat ma ho jala madabu tu laut, gari saut do! [344†]

²²Ai jaloonmuna do saluhut nasa na pinangidomuna di tangiangmuna, anggo na porsea hamu! IV.

²³Jadi dung bongot Ibana tu bagas joro i, laho mangajari disi, didapothon angka sintua ni malim dohot sintua ni bangso i ma Ibana, angka ninna ma: Huaso dia dipangasahon Ho? [345†]

²⁴Dung i ninna Jesus ma mangalusi nasida: Ahu ma jolo manungkun hamu; dung pe dialusi hamu Ahu, asa paboaonku tu hamu, manang huaso dia hupangasahon di pambahenanki:

²⁵Ia pandidion ni si Johannes, sian dia do i? Sian banua ginjang do manang sian jolma manisia? Dung i marpingkir ma nasida sama nasida, songon on:

²⁶Ia ninta: Sian banua ginjang, dohononna ma: Boasa so dihaporseai hamu ibana? Anggo tadok annon: Sian jolma, sihabiaranta ma natorop i, ai panurirang do si Johannes di roha ni jolma saluhutna. [346†]

²⁷Gabe ninna nasida ma mangalusi Jesus: Ndang huboto hami i. Laos ro ma hatana tu nasida: Antong, Ahu pe, ndang paboaonku tu hamu, manang huaso dia hupangasahon patupahon ulaonki.

²⁸Alai beha do di rohamuna? Adong ma dua anak di na sahalak; jadi ditopot ma sihahaan, didok ma tu ibana: Laho ma ho, anaha, sadari on mangula tu porlakta!

²⁹Alai ro ma alusna: Ndang olo ahu! Hape disolsoli do rohana muse, gabe saut ma ibana laho.

³⁰Ia amaama i ditopot ma sianggian i, laos songon i do hatana, gabe didok i ma mangalusi: Olo, tuan! Hape, ndang saut laho. [347†]

³¹Ise sian nasida na dua i mangulahon pinangido ni amanasida? Jadi didok nasida ma tu Ibana: Sihahaan i do! Dung i didok Jesus ma tu nasida: Situtu do na hudok on tu hamu: Tagonan do halak sijalobeo dohot boru na jahat bongot tu harajaon ni Debata, unang hamu! [348†]

³²Ai na ro do si Johannes tu hamu di dalan hatigoran, ndang dihaporseai hamu ibana; alai anggo angka sijalobeo dohot angka boru na jahat porsea do. Diida hamu do i nian; laos tong so disolsoli hamu rohamuna, laho mangkaporseai ibana. [349†]

³³Bege hamu ma sada umpana na asing: Adong ma sahalak na mora, na mamungka porlak anggurna, dihandangi, dihali ma pangilangan di bagasan, dipauli ma gudangna, dipasahat ma tu angka pangula, dung i marhutasada ma ibana. [350†]

³⁴Dung jumpang tingkina mambuat parbuena, disuru ma angka naposona manopot pangula i manjalo parbuena.

³⁵Jadi ditangkup angka pangula i ma naposona, na sada dilombuti, na sada dibunu, na sada didangguri dohot batu.

³⁶Dung i diulahi na mora i ma marsuru naposona angka na asing, tumorop sian na parjolo i; laos songon i do dipambahen pangula i tu nasida.

³⁷Parpudi ma disuru tu nasida anakna, ai ninna rohana: Ra biar ma rohanasida mida anakki!

³⁸Alai marnida anak i, didok angka pangula i ma sama nasida: On do sitean porlak i! Beta ma, tapusa ibana, asa di hita siteanonna i! [351†]

³⁹Jadi ditangkup nasida ma ibana, dionjar ma sian porlak i, laos dipusa.

⁴⁰Molo ro sogot parporlak i, aha ma bahenonna tu angka pangula i?

⁴¹Gabe ninna nasida ma mandok Ibana: Tung jorbut do pamununa di angka parjahat i, jadi pasahatonna ma porlak anggurna tu pangula na asing, angka na mangalehon parbuena di tingkina i.

⁴²Dung i didok Jesus ma tu nasida: Beha, ndang dung dijaha hamu di Surat i: “Ia batu na binolongkon ni angka pande bagas i, apala i do gabe batu parsuhisuhi (partunggul). Pinamasa ni Tuhan do i, jala halongangan do i diida matanta”? [352†]

⁴³Dibahen i ma umbahen na hudok tu hamu: Buaton do harajaon ni Debata sian hamu jala lehonon ma tu bangso na olo mamboan parbuena.

⁴⁴Marosak ma ganup na tinggang tu batu on, jala magopu ma ganup na tiningganganna. [353†]

⁴⁵Jadi dung dibege angka sintua ni malim dohot Parise umpamana i, dianto ma, nasida do hinatahonna disi.

⁴⁶Jadi dilului nasida ma dalan manangkup Ibana; alai mabiar do nasida mida natorop i, ai panurirang do Ibana di rohanasida. [354†]