Read Batak Toba MATEUS 22 Bible Online

MATEUS 22 - Batak Toba bible

MATEUS 22

¹I. [1] Dung i diulahi Jesus ma marumpama tu nasida songon on:

²Tarpatudos do harajaon banua ginjang i tu sada raja na mamestahon anakna na mangoli. [355†]

³Jadi disuru ma angka naposona, manjou angka na ginokkonna hian tu pestana i, hape ndang olo nasida ro.

⁴Dung i diulahi ma, disuru ma naposo na asing, ninna ma: Paboa hamu ma tu angka naung ginokkon: Nunga huparade panganon pesta i, nunga hupotong angka horbo dohot lombu; nunga rade saluhutna. Ipe, ro ma hamu tu pesta i! [356†]

⁵Alai na laho be do nasida di tois ni rohanasida: Na sada tu haumana, na sada tu partigatigaonna.

⁶Alai ditangkup na deba angka naposona, dipasipalsipal jala dipusa.

⁷Jadi tarrimas ma raja i, disuru ma soldaduna mangalengsehon angka pamunu i jala manurbu hutanasida. [357†]

⁸Dung i ninna ma mandok angka naposona: Nunga rade nian na hasea tu pesta i, alai ndang tau angka na pinio i.

⁹Onpe, laho ma hamu tu angka dalan balobung, arahon hamu ma tu haroan on nasa na dapot hamu! [358†]

¹⁰Jadi saut ma laho angka naposo i tu angka dalan, ditogihon ma saluhut na jumpang nasida, angka na jahat dohot na denggan, gabe gok tamue ma parpestaan i.

¹¹Alai laho bongot raja i mamereng angka tamuena, dapot matana ma disi sada halak na so marpangkean pesta.

¹²Jadi didok ma tu ibana: Na beha do parmasukmu tuson, amang, ai ndang marpangkean pesta ho? Gabe mangkohom ma ibana.

¹³Dung i didok raja i ma tu angka naposona: Tali hamu ma patna dohot tanganna, laos pabali hamu ma ibana tu na holom marimpotimpot; disi ma masa angguhangguk dohot na patungoripon. [359†]

¹⁴Ai lan do na jinou; alai otik do na tarpillit. [360†] II.

¹⁵Dung i laho ma angka Parise martuptup sama nasida, manang na beha bahenonnasida padapothon Ibana di hatana.

¹⁶Jadi disuru nasida ma angka siseannasida rap dohot angka naposo ni si Herodes tu Ibana, angka ninna ma: Gurunami, huboto hami, na tigor Ho; ai sintongsintong dipodahon Ho dalan ni Debata jala ndang dihabiari Ho manang ise, ai so siida bohi ni jolma Ho! [361†]

¹⁷Ipe, paboa ma tu hami: Beha didok roham: Na jadi do lehonon guguan (belasting) tu Kesar i, manang na so jadi tahe?

¹⁸Alai diboto Jesus do jahat ni rohanasida, jadi didok ma: E hamu pangansi! Boasa unjunanmuna Ahu?

¹⁹Patuduhon hamu ma hepeng guguan i tu Ahu! Gabe diboan nasida ma sada hupang tu Ibana.

²⁰Dung i didok Jesus ma tu nasida: Gombaran dohot surat ni ise do dison?

²¹Jadi dialusi nasida ma: Gombaran ni Kesar i do. Jadi didok ma tu nasida: Antong, lehon hamu tu Kesar, na sian Kesar i; jala lehon hamu ma tu Debata, na sian Debata! [362†]

²²Gabe longang ma rohanasida umbegesa; laos laho ma nasida, ditadingkon ma Ibana. III.

²³Di na sadari i ro ma angka Saduse, na so marhatutuhon adong haheheon sian na mate, jadi disungkun nasida ma Ibana: [363†]

²⁴Gurunami, didok si Musa: Molo adong na mate, so martinading, pareahon ni anggina ma jolmana i, pajongjongkon pomparan di hahana. [364†]

²⁵Jadi adong ma di hami pitu halak na marhahamaranggi; mangoli ma sihahaan, dung i mate ma ibana so martinading, ditinggalhon ma jolmana i di tinodohonna.

²⁶Songon i do paidua dohot paitolu ro di paipitu.

²⁷Umpudi sian nasida sasudena i mate dohot boruboru i.

²⁸Antong di ari haheheon i, ise do sian nasida na pitu i nampuna parompuan i, ai sude do nasida marniolihonsa?

²⁹Alai ninna Jesus ma mangalusi nasida: Nalilu do hamu, siala ndang diboto hamu Surat i nang hagogoon ni Debata!

³⁰Ai anggo ruhut ni angka naung mulak mangolu: Ndang mangoli, ndang muli; songon surusuruan ni Debata do nasida di banua ginjang i.

³¹Alai anggo taringot tu haheheon ni angka naung mate, ndang dung dijaha hamu ulaning na nidok ni Debata tu hamu di hatana on:

³²“Ahu do Debata ni si Abraham, Debata ni si Isak jala Debata ni si Jakkob!” Apala Debata ni angka na mate Ibana, Debata ni angka na mangolu do! [365†]

³³Jadi tarhalomong ma halak natorop i umbege pamodaionna i. IV.

³⁴Alai marpungu ma angka Parise i, dung dibege, naung dipajut Jesus angka Saduse i.

³⁵Dung i diunjuni sahalak sibotopatik sian nasida ma Ibana, disungkun ma:

³⁶Gurunami, dia do patik raja sian angka patik i?

³⁷Jadi didok Jesus ma: Sihaholonganmu do Tuhan Debatam sian nasa ateatem, sian nasa hosam dohot sian nasa roham! [366†]

³⁸I do patik raja jala parjolo.

³⁹Alai dos do arga ni na paduahon on: Sihaholonganmu do donganmi doshon dirim! [367†]

⁴⁰Patik na dua on do mangkangkam nasa patik dohot hata ni panurirang. [368†] V.

⁴¹Alai di na pungu i angka Parise, disungkun Jesus ma nasida, ninna ma:

⁴²Na beha do rohamu taringot tu Kristus i? Anak ni ise do Ibana? Jadi dialusi nasida ma Ibana: Anak ni si Daud do!

⁴³Alai didok ma tu nasida: Alai digoar si Daud do Ibana “Tuhan”, diajari Tondi i, ai didok do:

⁴⁴“Ninna Tuhan i do mandok Tuhanku: Hundul ma Ho tu Siamunhon, paima hupeakhon angka musum bahen sidegedegean ni patmu!” [369†]

⁴⁵Antong, anggo digoar si Daud do Ibana “Tuhan”, beha ma Ibana Anakna?

⁴⁶Jadi ndang adong manang ise na tarbahen mangalusi Ibana; jala olat ni na sadari i ndang adong na hum roha manungkun Ibana.