Read Batak Toba MATEUS 23 Bible Online

MATEUS 23 - Batak Toba bible

MATEUS 23

¹I. [1] Dung i dipanghulingi Jesus ma halak natorop dohot angka siseanna,

²ninna ma: Dihunduli angka sibotosurat dohot angka Parise do habangsa ni si Musa.

³Onpe, ula jala radoti hamu ma sasude na pinodahonnasida tu hamu; alai unang ma tiru hamu ia pambahenannasida! Ai na ripe mamodai do nasida, so adong diulahon. [370†]

⁴Boban angka na dokdok do dirahuti nasida jala diampehon tu abara ni jolma i, alai ndang olo nasida manjamasa, nanggo dohot sada jarijarina.

⁵Nasa pambahenannasida, asa dipaberengbereng halak, umbahen na diula, ai dipabidang do tali partangiangannasida, laos dipaganjang do rambuna. [371†]

⁶Sai hundulan na sumangap do ditodo, uju di parpestaan, songon i bangku jolojolo di angka parguruan. [372†]

⁷Dipangido, naeng tabion nasida di onan jala naeng goaron ni jolma i nasida guru.

⁸Alai anggo hamu, unang ma margoar guru, ai Sada do Gurumuna; saluhutna hamu marhahamaranggi.

⁹Ndang jadi goaronmuna manang ise sian hamu “Ama” di tano on, ai Sada do Amamuna, i ma na di banua ginjang i!

¹⁰Jala ndang jadi goaron hamu Partogi, ai Sada do Partogimuna, i ma Kristus i!

¹¹Alai na sumangap sian hamu, i ma gabe songon naposomuna! [373†]

¹²Ai sipaoruon do ganup na patimbo dirina; alai sipatimboon do na paoru dirina. [374†]

¹³Marjea ma hamu sibotosurat dohot Parise, hamu pangansi! Ai disordak hamu do harajaon banua ginjang i di jolo ni jolma i. Ndang masuk hamu; angka na giot bongot pe, ndang diloas hamu masuk.

¹⁴Marjea ma hamu sibotosurat dohot Parise, hamu pangansi! Ai dipolgak hamu do jabu ni boruboru na mabalu jala tangiang na ganjang dibahen hamu mangkuphupisa. Uhum na lobi dokdok do jaloonmuna ala ni i. [375†]

¹⁵Marjea ma hamu sibotosurat dohot Parise, hamu pangansi! Ai diliati hamu do laut dohot tano manaiti tu agamamuna nanggo sada halak. Jadi dung saut ibana masuk, gabe anak ni roko ibana dibahen hamu, silompit sian hamu!

¹⁶Marjea ma hamu partogi na mapitung, angka na mandok: Na manolon tu bagas joro, ndang marguna; alai na manolon tu sere na di bagas joro, i do na marguna. [376†]

¹⁷E hamu na oto jala na mapitung! Ai dia do na ummangat, sere i manang bagas joro i, na pabadiahon sere i?

¹⁸Angkup ni i didok hamu: Na manolon tu langgatan, ndang marguna; alai na manolon tu pelean na di atas langgatan i, i do na marguna.

¹⁹E hamu na mapitung! Ai dia do na ummangat, pelean i manang langgatan i, na pabadiahon pelean i? [377†]

²⁰Nda songon on: Na manolon tu langgatan i, manolon tusi do, padohot tu saluhut na diatasna.

²¹Jala na manolon tu bagas joro, manolon tusi do, nang tu Ibana na manginganhonsa.

²²Na manolon tu banua ginjang, manolon tu habangsa ni Debata do, nang tu Ibana na mangkundulisa. [378†]

²³Marjea ma hamu sibotosurat dohot Parise, hamu pangansi! Ai diparsampulu hamu do angka suansuanan na metmet, alai tading do angka patik na ummaol dibahen hamu, songon hatigoran, parasinirohaon dohot haburjuon. Siulaon do na sada on, alai unang ma tading na sada an! [379†]

²⁴Hamu partogi na mapitung! Dipasisi hamu do rongit; alai ia gaja dibondut hamu do!

²⁵Marjea ma hamu sibotosurat dohot Parise, hamu pangansi! Ai dipaias hamu do panginuman dohot mangkuk sian duru, hape marisi pandoboon do dohot pargadombuson. [380†]

²⁶E ho, Parise na mapitung! Parbagasan ni panginuman i ma jolo paias, asa gabe ias nang duruna! [381†]

²⁷Marjea ma hamu sibotosurat dohot Parise, hamu pangansi! Ai suman do hamu tu tanoman na hinapur, angka na denggan berengon sian duru, hape marisi holiholi ni na mate do dohot nasa na rotak! [382†]

²⁸Tongon songon i hamu: Tigor hamu nian idaon ni halak sian duru, alai anggo di bagasan, gok pangansion do hamu dohot na so uhum.

²⁹Marjea ma hamu sibotosurat dohot Parise, hamu pangansi! Ai dipauli hamu do tanoman ni angka panurirang, jala dipalehet hamu tambak ni angka partigor.

³⁰Pola didok hamu: Aut hami uju di ngolu ni angka ompu, ndang tagamon dohot hami parsala di mudar ni angka panurirang i!

³¹Asa dihatindangkon hamu do hape, anak ni sibunu panurirang i do hamu! [383†]

³²Onpe, haru gohi hamu ma suhatsuhat ni ompumuna!

³³Hamu angka ulok jala anak ni ulok dari, tung beha ma bahenonmuna maporus pasidingkon uhuman na roko? [384†]

³⁴Dibahen i, ida ma, Ahu marsuru tu hamu angka panurirang dohot parroha dohot sibotosurat: Bunuonmuna jala parsilangkononmuna ma deba sian nasida, na deba linsinganmuna do di parguruanmuna jala leleanmuna sian huta tu huta.

³⁵Asa mandatang tu hamu mudar ni saluhut angka partigor na so marpipot, na use di tano on olat ni mudar ni si Abel na tigor i ro di mudar ni si Sakarias, anak ni si Berekia, na pinusamuna di holangholang ni bagas joro dohot langgatan i. [385†]

³⁶Situtu do na hudok on tu hamu: Sasudena i mandatang sogot tu bangso on! II.

³⁷Jerusalem! Jerusalem! Dibunu ho do angka panurirang jala didangguri ho do angka na sinuru manopot ho. Nunga piga hali naeng papunguonku do nian angka anakmi, sobokkon pidong na papunguhon anakna tu toru ni habonghabongna; alai ndang dung olo hamu! [386†]

³⁸Ida ma, ingkon tarulang do sogot bagasmuna! [387†]

³⁹Ai hudok ma tu hamu: Na so idaonmuna be Ahu olat ni on, paima dohononmuna: Pinasupasu ma na ro marhitehite Goar ni Tuhan i! [388†]