Read Batak Toba MATEUS 24 Bible Online

MATEUS 24 - Batak Toba bible

MATEUS 24

¹I. [1] Dung i borhat ma Jesus, laho ruar sian bagas joro i. Jadi didapothon angka siseanna i ma Ibana, dipatuduhon ma tu Ibana angka bagas ni joro i.

²Alai didok Jesus ma tu nasida: Diida hamu sasudena i? Situtu do na hudok on tu hamu: Ndang pasombuonna sogot disi dua batu martinditindi na so gargaronna. [389†]

³Dung i uju hundul Ibana di dolok Jetun i, pulik ma didapothon angka siseanna Ibana, mandok: Paboa ma tu hami: Andigan masa i, jala dia ma tanda ni harorom dohot ajal ni hasiangan on?

⁴Gabe dialusi Jesus ma nasida: Jaga ma hamu, so tung dililuhon halak hamu!

⁵Ai lan do na ro sogot manoluk Goarhu, angka na mandok: Ahu do Kristus i, gabe torop ma lilu bahenonnasida. [390†]

⁶Alai begeonmuna ma barita ni angka hamusuon dohot soara ni na marmusu. Manat ma hamu, unang hamu tarsonggot; ndang tarbahen so masa angka i, alai ndang i dope ujungna.

⁷Ai na hehe do sogot bangso maralohon bangso, harajaon maralohon harajaon; masa ma nang haleon dohot lalo marluatluat.

⁸Sasudena i, parmulaan ni pambebeonna i dope.

⁹Dung i pasahatonna ma hamu tu haporsuhon, pola pusaonna do hamu, gabe hosoman ni bangso saluhutna hamu ala Goarhu. [391†]

¹⁰Jadi torop ma targasip di tingki i, gabe masijehean jala masihosoman ma!

¹¹Dung i hehe ma lan panurirang pargapgap, mangaliluhon torop jolma. [392†]

¹²Jadi ala na lam rarat na so uhum, lam tu ngalina ma haholongon ni roha di jolma godangan. [393†]

¹³Alai na manahan ro di ujung, i do paluaonna. [394†]

¹⁴Laos baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso; dung pe i, asa ro ujungna. [395†]

¹⁵Antong, molo diida hamu di inganan na badia i hagagaor na so uhum i, na nilumbahon ni panurirang Daniel (diparateatehon na manjaha on ma i!): [396†]

¹⁶Disi ma maporus hamu na di Judea tu dolok!

¹⁷Na di bilut parginjang ni jabuna, unang ma dialap angka ugasan na di jabu i, di na mijur. [397†]

¹⁸Na di ladang, unang ma pola humusor mambuat ulosna!

¹⁹Alai marjea ma angka na gabegabean dohot angka panarusan di angka ari i!

²⁰Alai martangiang ma hamu, asa unang pola maporus hamu di partaonan ngali manang jumpa ari Sabbat. [398†]

²¹Ai mansai balga do haporsuhon i; sian mula ni hasiangan on rasirasa nuaeng ndang adong dope masa na songon i, tu jolo on pe ndang masa be. [399†]

²²Jala aut unang diorui angka ari i, ndang tagamon malua agia sada jolma; alai ala ni angka na pinillit i do umbahen na diorui.

²³Molo dipandok disi tu hamu: Ida ma, disi, disan do Kristus i, unang porsea hamu!

²⁴Ai na hehe do sogot angka Kristus pargapgap dohot angka panurirang pargapgap, patupahon tanda na balga dohot halongangan, laho mangaliluhon nang angka na pinillit, ia na tarbahen. [400†]

²⁵Jaga ma hamu! Nunga hupalumba hamu hian.

²⁶Antong, anggo didok nasida tu hamu: Di halongonan an do Ibana, unang hamu laho tusi; ia didok: Di bilut do Ibana, unang haporseai!

²⁷Ai songon hilap na mullop di habinsaran marnalanala ro di hasundutan, songon i do sogot haroro ni Anak ni jolma i. [401†]

²⁸Ai ia disi bangke, tusi do marumbal angka lali. [402†]

²⁹Alai dung salpu haporsuhon ondeng, pintor mangkolom ma mata ni ari i, ndang marsinondang be bulan i, mardabuan ma angka bintang sian langit, jadi humuntal ma angka hagogoon ni parlangitan. [403†]

³⁰Di tingki i ma binsar di langit i tanda ni Anak ni jolma i, gabe mangangguhi ma sude bangso na di tano on, ai idaonnasida ma Anak ni jolma i ro di atas ombun ni langit, mantat hagogoon dohot hasangapon godang. [404†]

³¹Jadi suruonna ma angka surusuruan na marsarune mansai gogo, jadi sian desa na ualu i ma papunguonnasida angka na pinillitna, sian suhi ni langit na sada ro di na sada nari i. [405†]

³²Alai sian hau ara i ma guruhon hamu tudosanna: Molo martunasi punsuna jala rungkar angka bulungna, botoonmuna ma, naung jonok partaonan las.

³³Suang le songon i, jumpa diida hamu masa angka ondeng, botoonmuna ma, naung jonok hasosonggopna. [406†]

³⁴Situtu do na hudok on tu hamu: Na so tupa salpu bangso on, so jolo songgop sasudena i.

³⁵Ai laho salpu pe sogot langit dohot tano on, anggo angka hatangki ndang na olo salpu! [407†] II.

³⁶Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i! [408†]

³⁷Alai songon uju di ngolu ni si Noak i, songon i do sogot haroro ni Anak ni jolma i! [409†]

³⁸Ai tagan so ro aek na sumar i, marmangani nasida jala minumminum, mangoli dohot pabolihonsa, paima dapot ari habobongot ni si Noak tubagasan parau i. [410†]

³⁹Laos so mamoto nasida, paima ro aek na sumar i mangaupi nasida saluhutna. Suman tusi do sogot haroro ni Anak ni jolma i!

⁴⁰Rap ma disi dua halak di ladang; na sada do dijangkon, na sada dibolongkon. [411†]

⁴¹Rap ma disi dua panduda; na sada do dijangkon, na sada dibolongkon.

⁴²Onpe, dungo ma hamu; ai ndang diboto hamu ari haroro ni Tuhanmuna! [412†]

⁴³Alai ingot hamu ma on: Aut na diboto na mora i tingki haroro ni panangko, ndang tagamon so dungo ibana, asa unang disursari ugasanna na di bagasna i. [413†]

⁴⁴Dibahen i sai tagam ma hamu, ai na ro ma Anak ni jolma i di na so pangkirimon ni rohamu! [414†]

⁴⁵Asa didia do naposo haposan jala na marroha, na pinabangkit ni indukna mangalehon angka naposona mangan di tingkina?

⁴⁶Martua do naposo i, na mangulahon songon i didapot indukna di harorona i!

⁴⁷Situtu do na hudok on tu hamu: Pabangkitonna do ibana mangaramoti saluhutna na di ibana. [415†]

⁴⁸Alai ia na jahat naposo i, dohononna ma di bagasan rohana: Leleng dope asa ro indukhi! [416†]

⁴⁹Gabe tole ma ibana mangalinsingi angka donganna naposo; mangan minum do anggo ibana, mangangkupi angka siparmabuk.

⁵⁰Dung i ro ma induk ni naposo ondeng di ari na so panagamanna jala di sadihari na so pamotoanna.

⁵¹Jadi agoonna ma ibana, laos lehononna ma tu ibana tohap ni angka pangansi. Disi ma masa angguhangguk dohot na patungoripon! [417†]