Read Batak Toba MATEUS 25 Bible Online

MATEUS 25 - Batak Toba bible

MATEUS 25

¹I. [1] Disi ma tarpatudos harajaon banua ginjang i tu sampulu anak boru, angka na borhat manomunomu pangoli i, masiboan parpalitoanna be. [418†]

²Alai na oto do na lima sian nasida, na pantas marroha do na lima.

³Ianggo angka na oto i, diboan do nian parpalitoanna, alai ndang mantat miak nasida.

⁴Alai anggo na pantas marroha i, diboan do miak di ingananna i rap dohot parpalitoannasida.

⁵Alai di na leleng so ro pangoli i, mondokondok ma nasida sasude, laos tarpodom ma.

⁶Alai tonga borngin i, adong ma na joujou: Na ro ma pangoli i; hehe ma hamu manomunomu!

⁷Jadi hehe ma angka anak boru i saluhutna, dipature be ma parpalitoanna.

⁸Dung i didok angka na oto i ma tu angka na pantas marroha: Lehon hamu ma tu hami deba sian miakmuna, ai na mintop ma palitonami.

⁹Alai dialusi angka na pantas marroha i ma: Ndang sae maon di hami dohot di hamu; tu angka panggadis ma hamu laho tagonan, manuhor di hamu!

¹⁰Alai di tongandalan i dope nasida laho manuhor, nunga ro pangoli i; jadi bongot ma angka naung hobas hian rap dohot ibana tu hasampuran rea i, dung i tarsordak ma pintu i.

¹¹Alai ro ma sian pudi anak boru na lima nari, angka ninna ma: Tuannami, ungkap ma di hami! [419†]

¹²Alai ninna ma mangalusi: Situtu do na hudok on tu hamu: Ndang na hutanda hamu! [420†]

¹³Antong, jaga ma hamu, ai ndang diboto hamu arina manang sadiharina! [421†] II.

¹⁴Umpamana: Adong ma sada halak na naeng marhutasada, jadi dijou ma angka naposona, laho palumehon artana tu nasida. [422†]

¹⁵Jadi dilehon ma tu na sada lima bagian, tu na asing dua, tu na asing muse sada dilehon, ganup marguru tu gogona; dung i borhat ma ibana. [423†]

¹⁶Mamintor ma laho na manjalo na lima bagian i, ditigatigahon ma i, jadi diomo ma lima bagian nari.

¹⁷Na manjalo na dua bagian i pe, tong songon i do; dohot do ibana mangomo dua nari.

¹⁸Alai anggo na manjalo na sada i, dihali ma tano mambunihon hepeng ni indukna i tusi.

¹⁹Alai dung leleng, mulak ma induk ni angka naposo ondeng, jadi mardabudabu ma ibana dohot nasida.

²⁰Jadi ro ma na manjalo na lima bagian i, diboan ma na lima bagian nari, ninna ma: Tuannami, lima bagian pinasahatmi tu ahu; ida ndi on, lima bagian nari huomo.

²¹Dung i didok indukna i ma tu ibana: Taho ma i, ale naposo na denggan roha jala haposan! Haposan do ho di na otik, pasahatonku ma tu ho godang. Bongot ma ho tu halasan ni roha ni tuanmu! [424†]

²²Dung i ro ma na manjalo na dua bagian i, didok ma: Tuannami, dua bagian pinasahatmi tu ahu; ida ndi on, dua bagian nari huomo.

²³Dung i didok indukna i ma tu ibana: Taho ma i, ale naposo na denggan roha jala haposan; haposan do ho di na otik, pasahatonku ma tu ho godang. Bongot ma ho tu halasan ni roha ni tuanmu! [425†]

²⁴Jadi ro ma nang na manjalo na sada bagian i, ninna ma: Tuannami, nunga huboto hian, ho parroha na pir, na manggotil di na so panuananmu, jala na papunguhon di na so panaburanmu.

²⁵Jadi ala na mabiar ahu, laho do ahu mambunihon bagianki tubagasan tano; na, ndi on, ugasanmon!

²⁶Alai ninna indukna i ma mangalusi ibana: Oe, ho naposo na jahat roha jala na losok! Diboto ho do hape, ahu manggotil di na so panuananku jala papunguhon di na so panaburanku!

²⁷Antong, nda tama ma nian boanonmu hepengki tu sianahi hepeng, gabe jaloonku ma di ahu rap dohot bungana di harorongkon?

²⁸Onpe, buat hamu ma bagianna i; lehon hamu ma i tu na mameop na sampulu bagian i!

²⁹Ai di ganup paradongan lehonon do, asa marlobilobi ibana. Alai sibuaton do sian na so paradongan nang na di ibana hian. [426†]

³⁰Laos pabali hamu ma naposo na so hasea i tu na holom marimpotimpot! Disi ma masa angguhangguk dohot na patungoripon. [427†] III.

³¹Alai dung ro sogot Anak ni jolma i marhasangapon rap dohot saluhut surusuruanna, hundulanna ma disi habangsa hasangaponna i. [428†]

³²Dung i marluhut ma tu jolona nasa bangso, jadi sirangonna ma nasida songon binahen ni parmahan na manirang birubiru boruboru sian birubiru tunggal. [429†]

³³Jadi pajongjongonna ma boruboru i tu siamunna, alai anggo tunggal i tu hambirangna. [430†]

³⁴Dung i dohonon ni Raja i ma tu angka na di siamunna i: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on!

³⁵Ai na male do Ahu, dilehon hamu do Ahu mangan; na mauas do Ahu, dilehon hamu do Ahu minum; na buro do Ahu, gabe dijangkon hamu do Ahu. [431†]

³⁶Na marsangkotbulung do Ahu, jadi diparulosi hamu do ahu; na hansitan do Ahu, jala ditingkir hamu do Ahu; na tarhurung do Ahu jadi ro hamu mandulo Ahu.

³⁷Dung i dohonon ni angka partigor i ma mangalusi: Tuhan, nandigan huida hami Ho male, gabe hulehon hami Ho mangan; manang mauas, gabe hulehon hami Ho minum? [432†]

³⁸Nandigan huida hami Ho na buro, gabe hujangkon hami Ho; manang marsangkotbulung, gabe huparulosi hami Ho?

³⁹Nandigan huida hami Ho marsahit manang tarhurung, gabe hudulo hami Ho?

⁴⁰Dung i alusan ni Raja i ma nasida: Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu! [433†]

⁴¹Dung i dohononna ma tu angka na di hambirangna: Laho ma hamu sian jolongkon, hamu angka na binuraan tu api sisalelenglelengna, na pinature di sibolis i dohot di angka surusuruanna! [434†]

⁴²Ai na male do Ahu, ndang dilehon hamu Ahu mangan; na mauas do Ahu, ndang dilehon hamu Ahu minum.

⁴³Na buro do Ahu, ndang dijangkon hamu Ahu; na marsangkotbulung do Ahu, ndang diparulosi hamu Ahu; na marsahit do Ahu, na tarhurung do Ahu, ndang didulo hamu Ahu.

⁴⁴Dung i dohononnasida ma mangalusi Ibana: Tuhan, nandigan huida hami Ho male, manang mauas, manang na buro, manang marsangkotbulung, manang marsahit, manang tarhurung, so hupatureture hami Ho?

⁴⁵Dung i dohononna ma mangalusi nasida: Situtu do na hudok on tu hamu: Di na so niantoanmuna sahalak sian angka na metmet on, sandok Ahu do na so niantoanmuna disi.

⁴⁶Dung i laho ma nasida tu na bernit salelenglelengna; alai anggo partigor i tu hangoluan sisalelenglelengna do. [435†]