Read Batak Toba MATEUS 26 Bible Online

MATEUS 26 - Batak Toba bible

MATEUS 26

¹I. [1] Asa dung sahat dihatahon Jesus sude angka jamita ondeng, ninna ma mandok angka siseanna:

²Diboto hamu do, haduan ma dapot pesta Paska; disi ma pasahatonna Anak ni jolma i, asa diparsilangkon. [436†]

³Marpungu ma uju i angka sintua ni malim dohot angka sintua ni bangso i tu godung ni sintua ni malim na margoar si Kayapas,

⁴laho martuptup, manang bisuk dia bahenonna manangkup Jesus dohot mamusa Ibana.

⁵Alai didok nasida ma: Unang ma di pesta i, so tung guntur natorop i. II.

⁶Alai uju di Betania Jesus di bagas ni si Simon na huliton i,

⁷didapothon sada parompuan ma Ibana, mantat guriguri na marisi miak na arga situtu, i ma diusehon tu Uluna, tagan mangan nasida.

⁸Marnida i angka siseanna, sogo ma rohanasida, angka ninna ma: Magoponai, antong!

⁹Aut ginadis i nian arga jala nilehon tu na pogos!

¹⁰Umboto i Jesus, ninna ma mandok nasida: Boasa arsahanmuna parompuan i? Ai na uli do na binahenna i tu Ahu.

¹¹Ai tongtong do adong na pogos di tongatongamuna, alai anggo Ahu ndang manongtong di hamuna. [437†]

¹²Ai diusehon pe miak i tu Dagingki, hira na mambahen adat pananomon do nasida disi tu Ahu.

¹³Situtu do na hudok on tu hamu: Manang didia di liat portibi on dijamitahon sogot barita na uli on, hatahononna do nang na binahenna ondeng gabe baritana.

¹⁴Dung i laho ma sada sian na sampuludua i, na margoar Judas Iskariot, manopot angka sintua ni malim,

¹⁵mandok: Sadia ma lehononmuna tu ahu, asa hupasahat Ibana tu hamu? Gabe tolupulu rupia ma dibilang nasida tu jolona. [438†]

¹⁶Olat ni i ma dilului rohana tingki halehetanna laho pasahathon. [439†] III.

¹⁷Alai di ari parhobasan parjolo ni pesta Paska i didapothon siseanna ma Jesus, angka ninna ma: Tudia ma patureonnami di Ho panganon Paska i, dipangido roham? [440†]

¹⁸Gabe didok ma: Laho ma hamu tu huta i, manopot si anu, dok hamu ma tu ibana: Tona ni Guru i: Na dapot ne ma tingkingku, di ho ma Ahu sorang, laho mangan Paska i rap dohot siseanku. [441†]

¹⁹Dung i dibahen angka sisean i ma songon na nidokkon ni Jesus tu nasida, jadi dihobasi ma panganon Paska i.

²⁰Adong dung bot ari, mangan ma Ibana rap dohot siseanna na sampuludua i.

²¹Jadi di na mangan i nasida, ninna ma: Situtu do na hudok on di hamu: Sada sian hamu naeng pasahathon Ahu!

²²Dung i marsak situtu ma rohanasida, gabe dipandok be ma tu Ibana: Nda tung ahu i, Tuhan?

²³Alai ninna ma mangalusi: Ia i na rap dohot Ahu manurdukkon tanganna tu paringkauan, i do na pasahathon Ahu!

²⁴Tong do nian ujung ni Anak ni jolma i, songon na tarsurat hian; alai marjea do halak na pasahathon Anak ni jolma i? Tagonan unang ma sanga tubu ibana tu hasiangan on!

²⁵Dung i ro ma si Judas, parjehe i, didok ma: Nda tung ahu i, Guru? Jadi didok Jesus ma tu ibana: Ho do tutu!

²⁶Jadi di na mangan i nasida, dihindat Jesus ma roti, dipasupasu ma, diponggoli jala diparlehon ma tu angka siseanna, huhut ma didok: Jalo hamu ma, pangan hamu; Dagingku do on! [442†]

²⁷Dung i dihindat ma panginuman, didok ma mauliate, dilehon ma tu nasida, huhut ma didok: Sude ma hamu manginum sian i!

²⁸Ai Mudarhu do on, mudar parpadanan i, na niusehon humongkop torop, bahen hasesaan ni dosa. [443†]

²⁹Alai hudok ma tu hamu: Na so tupa be inumonku olat ni on sian parbue ni hau anggur i sahat ro di ari sogot; disi ma inumonku na imbaru rap dohot hamu di harajaon ni Damang.

³⁰Jadi dung diendehon nasida ende pujipujian i, ruar ma nasida laho tu dolok Jetun. [444†]

³¹Disi ma didok Jesus tu nasida: Saluhut do hamu naeng targasip mida Ahu di na saborngin on, ai na tarsurat do: “Lombutanku ma parmahan i, gabe marserak ma birubiru na sapunguan i.” [445†]

³²Alai dung hehe Ahu sian na mate, joloananku ma hamu tu Galilea. [446†]

³³Alai ninna si Petrus ma mangalusi Ibana: Agia sude nasida targasip mida Ho, anggo ahu, na so tupa targasip.

³⁴Dung i didok Jesus ma mandok ibana: Situtu do na hudok on tu ho: Tolu hali do soadahononmu Ahu di na saborngin on, tagan so martahuak dope manuk. [447†]

³⁵Dung i didok si Petrus ma tu Ibana: Nang mate pe ahu rap dohot Ho, ndang soadahononku Ho. Laos songon i do hata ni saluhut sisean i. [448†] IV.

³⁶Dung i sahat ma Jesus rap dohot nasida tu porlak sada na margoar Getsemane. Jadi didok ma tu angka sisean i: Hundul ma hamu jolo dison, saleleng disan Ahu martangiang.

³⁷Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. [449†]

³⁸Jala didok ma tu nasida: Mansai marsak situtu do rohangku, hira na mate do. Dison ma hamu, dungo rap dohot Ahu! [450†]

³⁹Dung i laho ma Ibana saotik tujolo, dipatungkap ma bohina tu tano martangiang, ninna ma: Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do! [451†]

⁴⁰Dung i mulak ma Ibana tu angka siseanna, jala tarpodom do nasida didapot, jadi didok ma tu si Petrus: Ndang margogo hamu hape dungo rap dohot Ahu nanggo sangombas?

⁴¹Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging! [452†]

⁴²Dung i laho ma Ibana paduahalihon martangiang, ninna ma: Ale Amang, molo so tarbahen salpu on, nda ingkon huinum, sai saut ma lomo ni Roham!

⁴³Dung i di na ro i Ibana, tarpodom muse ma nasida didapot, ai mansai dokdok do salibonnasida.

⁴⁴Jadi ditadingkon ma nasida, diulakkon ma laho martangiang patoluhalihon, mandok hata ondeng. [453†]

⁴⁵Dung i didapothon ma muse angka siseanna jadi didok ma tu nasida: Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa.

⁴⁶Hehe ma hamu, laho ma hita! Ndi, nunga, ro na pasahathon Ahu! V.

⁴⁷Mangkatahon i dope Ibana, nunga ro si Judas, sada sian na sampuludua i, rap dohot torop halak, angka na marpodang jala marlombutlombut, sinuru ni angka sintua ni malim dohot sintua ni bangso i.

⁴⁸Alai nunga dipabotohon parjehe i hian partinandaan tu nasida, ai didok do: Ia i na huumma, Ibana ma i; i ma tangkup hamu!

⁴⁹Asa pintor didapothon ma Jesus, didok ma: Tabi di Ho, Guru! Laos diumma.

⁵⁰Alai ninna Jesus ma mandok ibana: Marhua ho tuson, anggia? Dung i ro ma nasida, dilaluhon ma tangannasida tu Jesus manangkup Ibana.

⁵¹Dung i adong ma sada sian angka dongan ni Jesus mangalaluhon tanganna, disintak ma podangna, ditampulhon ma tu naposo ni sintua ni malim sahalak, dipisikkon ma pinggolna.

⁵²Jadi didok Jesus ma tu ibana: Pasarung podangmi, ai na manintak podang, mago ma bahenon ni podang! [454†]

⁵³Ai na so tarbahen Ahu do di roham mangido sian Damang, asa dipadiri di Ahu saonari lobi sian sampuludua loksa surusuruan?

⁵⁴Alai songon dia ma disi saut hata ni Surat i na mandok: Ingkon masa do na songon i?

⁵⁵Uju i ma didok Jesus tu angka natorop i: Hira na dompak panamun do hamu hehe, marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu.

⁵⁶Alai na masa do sudena on, asa jumpang hata ni angka panurirang i. Dung i ditadingkon saluhut sisean i ma Ibana laho maporus. [455†] VI.

⁵⁷Asa dung ditangkup nasida Jesus, ditogihon ma Ibana tujolo ni sintua ni malim si Kayapas, ai nunga pungu disi angka sibotosurat ro di pangituai. [456†]

⁵⁸Alai sai mangihut do si Petrus mandaodao sahat ro di alaman ni sintua ni malim i. Laos bongot ma ibana tubagasan, laho hundul tusi rap dohot angka naposo marnida ujungna.

⁵⁹Alai anggo angka sintua ni malim ro di sandok rapot godang mangalului panindangion gapgap dompak Jesus, na tuk mambahen Ibana marutang hosa.

⁶⁰Alai nang pe hehe torop sitindangi gapgap, ndang adong jumpangsa.

⁶¹Alai parpudi ro ma dua halak, ninna ma: Didok Halak on: Tarbahen Ahu do mangalohai joro ni Debata jala pajongjong i sumuang di bagasan tolu ari. [457†]

⁶²Dung i hehe ma sintua ni malim i, mandok tu Ibana: Ndang alusanmu na hinatindangkonnasida dompak Ho?

⁶³Alai sai hohom do anggo Jesus. Dung i dipanghulingi sintua ni malim i ma Ibana: Hupatolon ma Ho tu Debata Siparngolu i, asa dipaboa Ho tu hami, manang na tutu Ho Kristus, Anak ni Debata! [458†]

⁶⁴Dung i didok Jesus ma tu ibana: Songon na nidokmi ma tutu! Alai hudok ma tu hamu: Olat ni on ma idaonmuna Anak ni jolma i, hundul di siamun ni Hagogoon jala ro di atas ombun ni langit. [459†]

⁶⁵Gabe diribakkon sintua ni malim ma pangkeanna mandok: Na mangaleai Debata do Ibana! Pola luluan dope sitindangi? Nunga dibege hamu pangaleaina i! [460†]

⁶⁶Beha do di rohamu? Dung i ninna nasida ma mangalusi: Marutang hosa ma Ibana! [461†]

⁶⁷Jadi ditijuri nasida ma bohina, na deba manompuk, na deba mangalinsingi, [462†]

⁶⁸huhut mandok: Surirangi hami, Kristus, ise do na mambunu Ho? VII.

⁶⁹Alai na hundul do anggo si Petrus di alaman i, jadi didapothon sada parompuan ma ibana mandok: Dohot do ho dongan ni Jesus, na sian Galilea i!

⁷⁰Jadi disoadahon ma di jolonasida saluhutna, ninna ma: Ndang huboto na nidokmi!

⁷¹Dung i di na naeng haruar ibana, diida parompuan na asing ma ibana, didok ma tu angka na disini: On do sada dongan ni Jesus na sian Nasaret!

⁷²Jadi diulahi ma mansoadahon, pola manolon: Tung na so hutanda do Halak i!

⁷³Alai dung satongkin nari, didapothon angka na jongjong disi ma si Petrus mandok: Sintong tahe, dohot do ho sada sian nasida, ai pangkulingmi do patandahon ho!

⁷⁴Dung i dipambuburahon ma dirina huhut manolonnolon: Tung na so hutanda do Halak i, ninna. Jadi pintor martahuak ma manuk.

⁷⁵Jadi diingot si Petrus ma na hinatahon ni Jesus tu ibana: Tolu hali soadahononmu Ahu, tagan so martahuak dope manuk. Dung i laho ma si Petrus tu balian tumatangis situtu. [463†]