Read Batak Toba MATEUS 27 Bible Online

MATEUS 27 - Batak Toba bible

MATEUS 27

¹I. [1] Torang ni arina i martuptup ma sude angka sintua ni malim dohot sintua ni bangso i dompak Jesus, laho mamusa Ibana. [464†]

²Ditali jala ditogu nasida ma Ibana laho pasahathon tu panguhum si Latus. [465†] II.

³Jadi dung diida si Judas, parjehe i, na naeng hona uhum nama Ibana, disolsoli ma rohana, dipaulak ma na tolupulu rupia i tu angka sintua ni malim dohot tu sintua ni bangso i; [466†]

⁴ninna ma: Sala do ahu! Hujehehon do hape na so marpipot! Alai didok nasida ma: Ndang ro di hami i! Ho do na sari disi!

⁵Jadi ditimpalhon ma perak i tu bagasan joro i, laos sumurut sian i laho maningkot. [467†]

⁶Alai dibuat angka sintua ni malim ma hepeng i, ninna ma: Ndang jadi padomuon i tu arta ni joro, ai tuhor ni mudar do i! [468†]

⁷Jala mardos ni roha nasida manuhorhonsa tu ladang ni pande hudon, bahen parbandaan ni halak dagang. [469†]

⁸Ala ni i do umbahen na margoar i ladang mudar ro di sadari on.

⁹Disi ma jumpang hata ni panurirang Jeremia na mandok: “Dibuat nasida do na tolupulu rupia i, asam ni na niasam, diasam deba anak Israel. [470†]

¹⁰Dung i dilehon ma i manuhor ladang ni pande hudon, songon na nidokkon ni Tuhan i tu ahu.” III.

¹¹Asa dipajongjong do Jesus tujolo ni panguhum i. Jadi disungkun panguhum i ma Ibana, ninna ma: Atehe, Ho do raja ni halak Jahudi? Alus ni Jesus: Songon na nidokmi ma tutu!

¹²Dung i dialuhon angka sintua ni malim dohot sintua ni bangso i ma Ibana; alai ndang dialusi manang aha. [471†]

¹³Jadi didok si Latus ma tu Ibana: Ndang dibege Ho godang ni na hinatindangkonnasida dompak Ho?

¹⁴Alai ndang dialusi Ibana nanggo sada hata, pola longang situtu roha ni panguhum i. [472†]

¹⁵Alai peam do dipalua panguhum i di pesta i sada halak na tarhurung, marguru tu na tinodo ni natorop.

¹⁶Alai adong ma tarhurung uju i sada parjahat na sumalin, na margoar si Barabas.

¹⁷Jadi di na pungu i nasida, didok si Latus ma tu nasida: Ise do dipangido hamu paluaonku, si Barabas manang Jesus na targoar Kristus?

¹⁸Ai diboto do, late ni rohanasida do umbahen na dipasahat nasida Ibana. [473†]

¹⁹Alai di na hundul i ibana di habangsa paruhuman i, ditonahon jolmana ma tu ibana: So tung dihahua ho halak na tigor i, ai susa situtu do ahu naborngin di nipingku ala Ibana.

²⁰Alai sai disosoi angka sintua ni malim rap dohot sintua ni bangso i natorop, asa dipangido nasida, malua si Barabas, alai pusaon do anggo Jesus.

²¹Dung i ninna panguhum i ma mandok nasida: Ise sian na dua i dipangido hamu paluaonku? Jadi didok nasida ma: Si Barabas!

²²Dung i didok si Latus ma tu nasida: Antong, aha ma bahenonku tu Jesus, na targoar Kristus? Gabe saluhut nasida, mandok: Parsilangkon ma!

²³Alai ninna panguhum i ma: Ai aha na jahat dibahen? Jadi lam gogo ma dipanjoujouhon: Parsilangkon ma!

²⁴Asa dung diida si Latus, na so marguna hatana, lam ganda tabe gaorna, dibuat ma aek mamburi tanganna di jolo ni natorop i, huhut mandok: Lias do ahu sian mudar ni On! Hamu do na sari disi! [474†]

²⁵Dung i ninna sude natorop i ma: Marsapata tu hami dohot tu ianakhonnami ma mudarna i! [475†]

²⁶Dung i saut ma dipalua si Barabas; alai anggo Jesus dilinsingi, dung i dipasahat ma, asa diparsilangkon. IV.

²⁷Jadi diboan angka soldadu ni panguhum i ma Jesus tu bagas paruhuman, diarahon ma sude dongannasida manahopi Ibana.

²⁸Ditanggal ma abitna, disolukkon ma tu Ibana baju dapdap.

²⁹Didandani nasida ma sungsang duri bahen tumpalna, diampehon ma i tu uluna; dilehon ma tolong tu tanganna siamun, dung i marsomba ma nasida tu jolona mangaleai Ibana, angka ninna ma: Tabi ma di Ho, ale Raja ni Jahudi!

³⁰Huhut ditijuri nasida Ibana, dibuat ma tolong i sian tanganna, dilotakkon tu uluna. [476†]

³¹Jadi dung sun dileai nasida Ibana, ditanggal ma sian Ibana baju dapdap i, disolukkon ma muse tu dagingna abitna hian, dung i ditogihon ma Ibana, asa diparsilangkon.

³²Alai laho tu balian jumpang nasida ma sahalak Kirene na margoar si Simon; i nama digogoi nasida mamorsan hau na pinarsilang i.

³³Jadi sahat ma nasida tu inganan na margoar Golgata (lapatanna: Partangkurahan).

³⁴Disi ma dipainum nasida tu Ibana tuak anggur na marsaor pogu; jadi dung didai, ndang olo Ibana manginum. [477†]

³⁵Alai dung diparsilangkon nasida Ibana, martondung ma nasida taringot tu angka abitna. [478†]

³⁶Jadi hundul ma nasida disi jumaga Ibana.

³⁷Jadi dilohothon nasida ma tu ginjang ni uluna surat paboa salana, hatana: Jesus do On, Raja ni Jahudi!

³⁸Rap dohot Ibana diparsilangkon nasida dua halak panamun; sada di siamunna, sada di hambirangna. [479†]

³⁹Alai dilealeai angka na mamolus i Ibana, angka dipaelengeleng uluna mandok: [480†]

⁴⁰E Ho, na mangalohai joro i jala na pajongjongkonsa di bagasan tolu ari! Palua dirim, molo na tutu Ho Anak ni Debata; mijur ma Ho sian hau pinarsilang i! [481†]

⁴¹Suman tusi do pangaleai ni angka sintua ni malim sibotosurat dohot sintua ni bangso i, ai didok be:

⁴²Ia na asing dipalua, dirina so tarpaluasa. Raja ni Israel do Ibana! Antong, mijur ma Ibana sian hau pinarsilang i, asa porsea hami di Ibana!

⁴³Naung dihaposi Debata; antong, I ma paluahon Ibana nuaeng, molo na lomo rohana, ai ninna do: Anak ni Debata do Ahu! [482†]

⁴⁴Laos songon i do pangaleai ni panamun i, na rap diparsilangkon dohot Ibana.

⁴⁵Alai olat ni hos ni ari ro di pungkul tolu holom ma sandok tano i.

⁴⁶Alai tar di pungkul tolu dipangiar Jesus ma soarana, dianggukhon ma: Ale Debatangku, Debatangku, boasa tung tadingkononmu Ahu (Eli, Eli, lama sabachtani)? [483†]

⁴⁷Alai umbege i, ninna na deba sian angka na jongjong disi: Na manjou si Elia do I.

⁴⁸Dung i pintor marlojong ma sada sian nasida mangalap limut, dibutongi ma i tu na asom, dipalohot ma tu tolong painumhon Ibana. [484†]

⁴⁹Alai na deba nari mandok: Pasombu jolo: Taida ma, manang na olo ro si Elia paluahon Ibana! V.

⁵⁰Alai diulahi Jesus ma marsoara na gogo; dung i tos ma hosana.

⁵¹Laos di na satongkin i maribak ma hirehire na di bagasjoro sian ginjang ro di toru. Dung i humuntal ma tano i, marigat ma dohot angka batu mamak. [485†]

⁵²Mungkap ma angka tanoman, dung i hehe ma daging ni torop na badia angka na modom disi,

⁵³gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak. [486†]

⁵⁴Alai dung diida induk ni soldadu i rap dohot angka donganna, na jumaga Jesus, lalo i ro di angka na masa i, mabiar situtu ma nasida, ninna ma: Tutu do On Anak ni Debata!

⁵⁵Alai adong ma disi torop boruboru, na manatapnatap mandaodao, i ma angka naung mangihuthon Jesus sian Galilea, patureturehon Ibana. [487†]

⁵⁶Si Maria Magdalena ma sada sian nasida dohot si Maria, ina ni Jakobus dohot Josep, dohot ina ni angka anak ni si Sebedeus. VI.

⁵⁷Alai dung bot ari, ro ma sada halak na mora, na margoar si Josep, na sian huta Arimatea, naung gabe sisean ni Jesus. [488†]

⁵⁸Ibana ma laho tu si Latus mangido bangke ni Jesus. Jadi didokkon si Latus ma na pasahathonsa tu ibana.

⁵⁹Dung i dijalo si Josep ma bangke i, dibaluti ma tu dagangan na ias.

⁶⁰Dung i dipeakkon ma tu bagasan tanomanna na imbaru dope, na tinuhil tu bagasan batu, digulang ma batu na bolon tu baba ni tanoman i; dung i laho ma ibana. [489†]

⁶¹Alai hundulhundul do disi tondongkon tanoman i si Maria Magdalena dohot si Maria na sada.

⁶²Alai torang ni arina i, na mangihut tu ari parhobasan i, marluhut ma angka sintua ni malim ro di Parise.

⁶³Huingot hami, Tuannami, naung didok Pangansi i, di na mangolu dope Ibana: “Na hehe ma Ahu di ari patoluhon!” [490†]

⁶⁴Antong, dokkon ma na manjaga tanoman i sahat ro di ari patoluhon, asa unang ro angka siseanna manangko Ibana, jadi dohononnasida ma tu natorop: Naung hehe Ibana sian na mate; gabe rumoa maon sipaotooto parpudi sian na parjolo i.

⁶⁵Jadi didok si Latus ma tu nasida: Togihon hamu ma parjaga i! Laho ma hamu mangaramotisa sian nasa rohamuna!

⁶⁶Dung i laho ma nasida mangaramoti tanoman i, dipajagahon, huhut ma disahapi batu i. [491†]