Read Batak Toba MATEUS 28 Bible Online

MATEUS 28 - Batak Toba bible

MATEUS 28

¹I. [1] Alai di buhabuha ijuk, di ari parjolo dung salpu Sabbat i, ro ma si Maria Magdalena dohot si Maria na sada maningkir tanoman i.

²Alai nunga masa lalo na gogo. Ai tuat do surusuruan ni Tuhan sian banua ginjang; jala dung sahat, digulang ma batu i, laos hundul diatasna.

³Alai songon hilap do rupana idaon, saksak do ulosna songon hapur. [492†]

⁴Jadi angka dotdot ma parjaga i dibahen biar ni rohanasida, hira na mate do.

⁵Alai ninna surusuruan i ma mandok parompuan i: Unang hamu mabiar, ai huboto, dilului hamu do Jesus, naung diparsilangkon.

⁶Ndang dison Ibana. Ai nunga hehe Ibana, songon na nidokna hian. Pajonok hamu ma; ida hamu ma inganan hapeahanna i! [493†]

⁷Hatop ma hamu laho tu angka siseanna i paboahon, naung hehe Ibana sian na mate, jadi joloananna do hamu tu Galilea, disi ma idaonmuna Ibana; nunga hupaboa i tu hamu. [494†]

⁸Dung i hatop ma nasida laho sian tanoman i, mabiar huhut las situtu rohanasida; marlojong do nasida laho mamaritahonsa tu angka siseanna.

⁹Disi ma ro Jesus mandapothon nasida, ninna ma: Dame ma di hamu! Dung i dipajonok nasida ma, dihaol ma patna, huhut manungkap tu jolona.

¹⁰Jadi didok Jesus ma tu nasida: Unang hamu mabiar, laho ma hamu mandokkon angka anggingku tu Galilea, disi ma idaonnasida Ahu! [495†] II.

¹¹Alai di na laho i nasida, nunga sahat deba sian angka parjaga i tu huta, dibaritahon ma saluhut na masa i tu angka sintua ni malim.

¹²Jadi marluhut ma nasida rap dohot angka sintua ni bangso i martahi, dilehon ma hepeng na nia tu soldadu i;

¹³laos ninna ma: Dok hamu ma: Tagan tarpodom hami, ro do angka siseanna bornginna i, manangko Ibana. [496†]

¹⁴Jadi molo tung tarbege i tu panguhum, hami pe mandamedamei ibana huhut sumarihon, unang susa hamu.

¹⁵Dung i dijalo nasida ma hepeng i, dibahen ma songon na pinodahonna tu nasida, gabe mehet ma hata ondeng di halak Jahudi ro di sadari on. III.

¹⁶Alai na laho do anggo siseanna na sampulusada i tu sada dolok na di luat Galilea, songon naung tinonahon ni Jesus tu nasida. [497†]

¹⁷Jadi dung diida nasida Ibana, disomba ma Ibana; alai na ganggu do roha ni na deba.

¹⁸Dung i didapothon Jesus ma nasida, didok ma: Nunga sahat tu Ahu nasa huaso na di banua ginjang dohot na di tano on. [498†]

¹⁹Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia! [499†]

²⁰Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on! [500†]