Read Batak Toba MATEUS 3 Bible Online

MATEUS 3 - Batak Toba bible

MATEUS 3

¹I. [1] Dung i di laonlaon ni ari hehe ma si Johannes pandidi marjamita di halongonan Judea, [26†]

²ninna ma: Pauba hamu ma rohamuna, ai nunga songgop harajaon banua ginjang i! [27†]

³Ibana do na pinaboa ni panurirang Jesaya, uju na nidokna: “Soara ni na manjoujou di halongonan: Pature hamu ma dalan di Tuhan i; pahornop hamu ma sidalananna i!” [28†]

⁴Imbulu ni unto do ulos ni si Johannes, hulingkuling do hohosna: Angka sihapor dohot situak ni loba do sipanganonna. [29†]

⁵Dung i laho ma pangisi ni Jerusalem manopot ibana, songon i dohot sude halak Judea ro di saluhut angka na maringanan di lambung ni Jordan i.

⁶Jadi dipandidihon si Johannes ma nasida di aek Jordan i, dung ditopoti be dosanasida.

⁷Alai di na niidana torop Parise dohot Saduse manopot pandidionna i, ninna ma mandok nasida: Hamu anak ni ulok! Ise do na mangajari hamu, pasidingkon rimas na ro sogot? [30†]

⁸Parbuehon hamu ma na tama, paboa naung muba rohamuna!

⁹Jala so tung didok hamu di bagasan rohamuna: Si Abraham do amanami! Ai hudok ma tu hamu: Tarjadihon Debata do anak di si Abraham sian angka batu on! [31†]

¹⁰Ai nunga pola ampe tangke tu daling ni angka hau! Onpe, sitabaon ma nasa hau na so marparbuehon na denggan jala sidabuhononhon tu api! [32†]

¹¹Ia ahu, aek do hudidihon tu hamu mandokkon paubahon roha; alai andul gumogo do na ro sian pudingku, gari mamboan sipatuna hurang tama dope ahu. Didihonon ni I do tu hamu Tondi Parbadia dohot api! [33†]

¹²Di tanganna do purpuran; paiasonna ma pardegeanna; papunguonna do emena tu sopona; alai tutungonna do anggo hurangkam i tu api na so ra mintop. [34†] II.

¹³Uju i ma ro Jesus sian Galilea tu batang aek Jordan, laho padidihon Ibana tu si Johannes.

¹⁴Alai manjua do si Johannes, didok ma: Ahu do nian patut didionmu, hape Ho ro mandapothon ahu!

¹⁵Alai didok Jesus ma mandok ibana: Songon i ma jolo! Ai tama do tapajongjong nasa hatigoran! Dung i dioloi ma Ibana.

¹⁶Asa dung tardidi Jesus, pintor hehe ma Ibana sian aek i, jala mungkap ma langit, jadi tarida ma mijur Tondi ni Debata songon darapati sumonggopi Ibana.

¹⁷Laos mangkuling ma soara sian ginjang, didok ma: On do Anakku, Haholongan i; halomoan ni rohangku do Ibana! [35†]