Read Batak Toba MATEUS 5 Bible Online

MATEUS 5 - Batak Toba bible

MATEUS 5

¹I. [1] Asa dung diida Jesus halak na sai torop i, nangkok ma Ibana tu sada tor jadi hundul ma disi; dung i didapothon angka siseanna ma Ibana.

²Dung i marsoara ma Ibana mangajari nasida, ninna ma:

³Martua ma na pogos tondi, ai di nasida do harajaon banua ginjang i! [52†]

⁴Martua ma na marsak roha, ai siapulon do nasida! [53†]

⁵Martua ma na lambok roha, ai teanonnasida do tano on! [54†]

⁶Martua ma na mauas male mida hatigoran, ai sipabosuron do nasida!

⁷Martua ma na asi roha, ai siasian do nasida! [55†]

⁸Martua ma parroha na ias, ai idaonasida do Debata! [56†]

⁹Martua ma sibahen dame, ai goaron do nasida anak ni Debata! [57†]

¹⁰Martua ma na pinaburuburu ni halak ala ni hatigoran, ai di nasida do harajaon banua ginjang i! [58†]

¹¹Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu! [59†]

¹²Las ma rohamuna jala marolopolop, ai godang do umpamuna di banua ginjang i, ai songon i do dipaburuburu angka panurirang na jumolo sian hamu. [60†] II.

¹³Hamu do sira ni tano on! Alai molo tung gabe hambar sira i, aha ma bahenon paansimhon? Nda tung na hasea be i; sibolongkononhon nama tu balian, asa didegei halak. [61†]

¹⁴Hamu do panondang ni portibi on! Ndang tarbahen so sai patar huta na di atas dolok. [62†]

¹⁵Ndang dihungkuphon halak ampang tu palito na ginalahanna; tu ginjang ni parpalitoan do dibahen, asa disondangi saluhut na di jabu i. [63†]

¹⁶Naeng songon i ma marsinondang palitomuna di jolo ni halak, asa diida angka pambahenanmuna na denggan i, asa dipuji nasida Amamuna na di banua ginjang i. [64†]

¹⁷Unang ma dirimpu rohamuna: Ahu ro mangarumpakkon patik i, manang hata ni angka panurirang i pe. Ndang ro Ahu mangarumpakkon; na pajongjongkon do Ahu! [65†]

¹⁸Ai hata na sintong do na hudok on tu hamu: Rasirasa sega langit dohot tano on, na so tupa sega sian patik i nanggo sada sisiasia manang sanggurit pe, paima saut saluhutna i. [66†]

¹⁹Asa manang ise na mangarumpakkon sada sian angka patik na ummetmet i jala dipodahon i tu jolma, i ma goaron na ummetmet di harajaon banua ginjang i; alai na mangulahon jala mangajarhonsa, i do goaron na balga di harajaon banua ginjang i. [67†]

²⁰Ai hudok ma tu hamu: Molo so andul dumenggan hatigoranmuna sian hatigoran ni angka sibotosurat dohot Parise, ndang habongotan hamu harajaon banua ginjang i.

²¹Dibege hamu do hata na tu angka ompu na robi: “Unang ho mambunu!” Ia pamunu siuhumon do. [68†]

²²Alai Ahu do mandok tu hamu: Tu jolo ni paruhuman ma ganup na tarrimas tu donganna; jala tama hona uhum ni rapot godang do ganup na mandok tu donganna: Hurang ajar! Alai na pola mandok tu donganna: Pe ho sisoada!, tama dapot api na roko do i. [69†]

²³Asa molo diboan ho sipelehononmu tu langgatan, dung i tarsingot roham disi di sogo ni roha ni donganmu dompak ho, [70†]

²⁴tadingkon ma sipelehononmi di jolo ni langgatan i; laho ma ho jolo mardenggan dohot donganmi; dung pe i, asa ro ho pasahathon sipelehononmi!

²⁵Tung denggan ma roham maradophon alomi; alai tibu, binsan rap dope hamu di tongandalan! So tung sanga dipasahat alomi ho tu panguhum, gabe dipasahat panguhum i ho tu opasna, gabe dihurungkon ho maon. [71†]

²⁶Situtu do na hudok on tu ho: Na so tupa ho ruar sian i, anggo so sahat gararmi sude ro di na saduit! [72†]

²⁷Dibege hamu do hata na tu angka ompu na robi: “Unang ho mangalangkup!” [73†]

²⁸Alai Ahu mandok tu hamu: Manang ise na mamereng boruboru huhut marsangkap na roa, nunga saut dilangkup i di bagasan rohana. [74†]

²⁹Molo digasipi mata siamunmi ho, pulsikkon ma i jala bolongkon! Ai dengganan do mago dagingmu deba nuaeng, unang bolong dagingmi hibul sogot tu api na roko! [75†]

³⁰Jala molo digasipi tangan siamunmi ho, gotap ma i jala bolongkon! Ai dengganan mago ruas ni dagingmu sada nuaeng, unang bolong dagingmu hibul sogot tu api na roko!

³¹Angkup ni i didok do: “Manang ise na palahohon jolmana, ingkon dilehon do surat sirang tu ibana.” [76†]

³²Alai Ahu mandok tu hamu: Ganup na palahohon na niolina, ia so ala ni na marmainan, na palangkuphonsa do! Pangalangkup do nang na mambuat na sirang i! [77†]

³³Angkup ni i, dibege hamu do hata na tu angka ompu na robi: “Ndang jadi tolononmu na tutu! Naung saut diuarihon ho tu Debata, ingkon gararonmu do!” [78†]

³⁴Alai Ahu mandok tu hamu: Sandok na so tupa hamu manolon nang maruari pe: Manang tu langit i, ai habangsa ni Debata do i; [79†]

³⁵manang tu tano on, ai sidegean ni patna do i; manang tu huta Jerusalem pe, ai huta ni Raja na bolon i do i. [80†]

³⁶Angkup ni i, ndang jadi ho manolon tu ulum; ai ndang marhuaso ho mambahen bontar manang birong obukmu nanggo sada.

³⁷Songon on ma hatamuna: Olo, anggo olo; ndang, ia ndang! Nasa na ganda sian i, sian na jahat do i! [81†]

³⁸Dibege hamu do hata na mandok: “Mata do abul ni mata; ipon do abul ni ipon!” [82†]

³⁹Alai Ahu mandok tu hamu: Unang alo hamu na jahat! Molo adong na mamastap hurum siamunmi, tarehon ma nang hurummu sihambirang! [83†]

⁴⁰Molo adong na naeng mambahen sindir tu ho, laho mambuat ulosmu, atena ma dohot bajubajum di ibana! [84†]

⁴¹Molo adong manang ise na manggogoi ho mandongani ibana sapaal, oloi ma ibana dua!

⁴²Lehon na mangido tu ho! Unang tundali na naeng marsali tu ho!

⁴³Dibege hamu do hata na mandok: “Holong ma roham di donganmi; hosom ma ia di musum!” [85†]

⁴⁴Alai Ahu do mandok tu hamu: Holong ma rohamu di musumuna; tangiangkon hamu ma angka na paburuburu hamu. [86†]

⁴⁵Asa tung gabe anak ni Amamuna na di banua ginjang i hamu: Ai dipabinsar do mata ni arina tu angka parroha na jahat nang tu na bonar, diparo do udan tu parroha na tigor nang tu na geduk. [87†]

⁴⁶Ai molo holong rohamuna holan di angka na mangkaholongi hamu, dia ma upamuna? Gari angka sijalobeo, nda songon i do dibahen?

⁴⁷Dia do hasurunganmuna, molo denggan hatamuna holan tu angka donganmuna? Gari angka sipelebegu, nda songon i do dibahen?

⁴⁸Ipe, ingkon sun denggan do rohamuna songon Amamuna di banua ginjang na sun denggan roha i! [88†]