Read Batak Toba MATEUS 6 Bible Online

MATEUS 6 - Batak Toba bible

MATEUS 6

¹I. [1] Jaga ma hamu, asa unang diulahon hamu hatigoranmuna di jolo ni halak, sitotondurannasida! Ai molo songon i, ndang marupa be hamu sian Amamuna na di banua ginjang i.

²Antong, molo diulahon ho parasinirohaon, unang ma dokkon paluon tingting songon binahen ni halak pangansi di angka parguruan dohot alaman, asa dipuji halak nasida. Na tutu do na hudok on tu hamu: Nunga sahat dijalo nasida upanasida.

³Asa jumpa dilehon ho asiasi, unang ma pola diboto tanganmu sihambirang na nilehon ni tanganmu siamun, [89†]

⁴asa buni angka asi ni roham; jadi baloson ni Amangmu, na marnida di na buni, ma i tu ho! II.

⁵Dung i, jumpa martangiang hamu, unang songon halak pangansi hamu, angka na mangkalomohon jongjong martangiang di angka parguruan dohot di dalan balobung, asa diida jolma i nasida. Na tutu do na hudok on tu hamuna: Nunga sahat dijalo nasida upanasida!

⁶Alai ia martangiang ho, tu bilut ma ho laho; sordak ma pintu i! Dung i martangiang ma ho tu Amangmu na di na buni, gabe baloson ni Amangmu, na marnida di na buni, ma i tu ho! [90†]

⁷Asa uju martangiang hamu, unang marnoninoni bahen hamu songon binahen ni sipelebegu; i dirimpu, tangihonon ni Debata nasida ala ni deak ni hatahatanasida. [91†]

⁸Ipe, unang ma doshon nasida hamu! Ai diboto Amamuna do na ringkot di hamuna, andorang so mangido dope hamu. [92†]

⁹Songon on ma tangiangmuna: Ale Amanami na di banua ginjang! Sai pinarbadia ma Goarmu! [93†]

¹⁰Sai ro ma harajaonmu! Sai saut ma lomo ni roham di banua tonga on songon na di banua ginjang! [94†]

¹¹Lehon ma di hami sadari on hangoluan siap ari!

¹²Sesa ma dosanami songon panesanami di dosa ni angka na mardosa tu hami! [95†]

¹³Unang hami togihon tu pangunjunan! Palua ma hami sian na jahat! Ai Ho do nampuna harajaon dohot hagogoon dohot hasangapon ro di saleleng ni lelengna. Amen! [96†]

¹⁴Ai ia disesa hamu sala ni halak na dompak hamu, sesaon ni Amamuna na di banua ginjang i do dohot dosamuna.

¹⁵Alai anggo so disesa hamu sala ni halak na dompak hamu, ndang tagamon sesaon ni Amamuna nang dosamuna. [97†] III.

¹⁶Uju marpuasa hamu, unang ma pola surbot panailimuna idaon songon di halak pangansi, ai dipasingki do bohinasida, asa haru tanda parpuasaonnasida diida halak Na tutu do na hudok on tu hamu: Nunga sahat dijalo nasida upanasida! [98†]

¹⁷Alai jumpa marpuasa ho, pangir ma ulum, suapi bohim,

¹⁸asa unang tanda parpuasaonmi di jolo ni halak, alai tanda di jolo ni Amangmu na di na buni, gabe baloson ni Amangmu, na marnida di na buni, ma i tu ho! IV.

¹⁹Unang papungupungu hamu arta di hamu di tano on, di na targagat tasik dohot ngitngit, di na tarhali jala tartangko panangko i!

²⁰Alai papungupungu hamu ma arta di hamu di banua ginjang, di na so targagat tasik manang ngitngit; di na so tarhali jala so tartangko panangko i! [99†]

²¹Ai ia disi artam, disi do roham!

²²Palito ni daging do mata. Molo hisar matami, tiur ma sude dagingmu! [100†]

²³Alai molo roa matami, holom ma sude dagingmu. Holomna i antong, anggo mangkolom panondang na di bagasan ho!

²⁴Ndang haoloan sada halak dua induk! Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon! [101†]

²⁵Ala ni i do umbahen na hudok tu hamuna: Unang holsohon hamu hosamuna sumarihon sipanganon, manang dagingmuna pasarisari parabiton! Nda ummarga hosa sian sipanganon? Nda ummangat daging sian parabiton? [102†]

²⁶Bereng hamu ma pidong angka na martongatonga langit, angka na so manabur, na so manggotil, na so papunguhon tu sopo; tong do diparmudumudu Amamuna na di banua ginjang i nasida! Nda godang dope hasurunganmuna sian i! [103†]

²⁷Ise hamu marhuaso pagandahon ariarina nanggo saasta ganjangna, anggo tung sian pangkolsohon ni rohana?

²⁸Boasa antong holsohononmuna parabiton! Patangkas hamu ma partubu ni bungabunga na di ladang i, angka na so mangula jala na so mangganti!

²⁹Ahu mandok tu hamuna: Gari si Salomo, uju di bungaran ni hasangaponna i ibana, gari so mamangke songon bungabunga sada. [104†]

³⁰Asa molo songon i diparulosi Debata duhutduhut na di ladang i, na jongjong songon sadari on, na tupa dipuruni marsogotna i, lam hamu ma, lam so parulosanna! Oe hamu siotik haporseaon!

³¹Antong unang ma holsoan rohamuna, mandok: Aha ma panganonnami? Aha ma inumonnami? Aha ma parabitonnami?

³²Angka sipelebegu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu.

³³Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna! [105†]

³⁴Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari. [106†]