Read Batak Toba MATEUS 7 Bible Online

MATEUS 7 - Batak Toba bible

MATEUS 7

¹I. [1] Unang hamu manguhumuhumi, asa unang hona uhum hamu, [107†]

²ai panguhumonmuna i do siuhumhononhon tu hamu, parsuhatonmuna i do sisuhathononhon tu hamu. [108†]

³Aha ma pola paberengberengonmu silbaksilbak na di mata ni donganmu; ia na satiang na di matami ndang diantoi ho!

⁴Tung patut ma dohononmu tu donganmi: Ua, huumpat ma jolo silbaksilbak i sian matami! Hape na satiang do di matami!

⁵E ho pangansi, jumolo ma umpat tiang i sian matami; dung pe i, asa pingkiranmu, manang beha pangumpatmu di silbaksilbak na di mata ni donganmi.

⁶Unang lehon hamu arta na badia i tu angka jurangga, jala unang ma danggurhon hamu mutihamuna tu jolo ni angka babi, so tung dilotloti i dohot patna, laos humusor manaroso hamu! [109†] II.

⁷Pangido hamu ma, sai na lehononna do tu hamu; lului hamu ma, sai na jumpangan do hamu; tuktuhi hamu ma, sai na ungkaponna do di hamu! [110†]

⁸Ai sai na manjalo do nasa na mangido, sai na jumpangan do na mangalului; sai na ungkapon do di na manuktuhi!

⁹Ai ise sian hamu jolma, na mangalehon batu tu anakna, molo indahan dipangido?

¹⁰Manang na olo mangalehon ulok, molo dengke dipangido?

¹¹Gari hamu angka parjahat umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana? [111†]

¹²Saluhut na pinangido ni rohamu, sibahenon ni halak tu hamu, i ma bahen hamu tu nasida, ai i do pamusatan ni patik ro di hata ni angka panurirang. [112†] III.

¹³Bongoti hamu ma harbangan na gogot i; ai ruak do harbangan jala lambas do dalan na tu hamagoan, jala torop do angka na bongot sian i. [113†]

¹⁴Alai na hopit do ia harbangan jala gogot do dohot dalan na tu hangoluan, jala otik do halak na jumpangan i. [114†]

¹⁵Jaga hamu ma angka panurirang pargapgap, ai na ro do nasida mandapothon hamu marrupahon birubiru, alai anggo rohana di bagasan, tung babiat panoro do! [115†]

¹⁶Sian parbuena do tandaonmuna nasida. Tung dapot ma putikkononhon parbue ni hau anggur sian bulu duri, manang antajau sian rimbang? [116†]

¹⁷Ai marparbuehon na denggan do nasa hau na denggan; alai matua roa do parbue ni hau na so hasea. [117†]

¹⁸Ai anggo hau na denggan ndang tarparbuehonsa na roa, jala hau na roa ndada tarparbuehonsa na denggan.

¹⁹Nasa hau na so marparbuehon na denggan, sitabaon do, gabe bolong nama tu api. [118†]

²⁰Asa sian angka parbuena do tandaonmuna nasida! IV.

²¹Ndada saluhut halak, na mandok Ahu Tuhanna, bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do! [119†]

²²Ai torop do sogot di ari parpudi na mandok tu Ahu: Ale Tuhan! Ale Tuhan! Nda manurirangi hami nahinan mangasahon Goarmu? Nda hupabali hami najolo angka sibolis mangasahon Goarmu? Nda lan angka ulaon na balga huula hami mangasahon Goarmu? [120†]

²³Dung i dohononku ma tu nasida: Ndang dung hutanda hamu; laho ma hamu sian lambungkon, hamu angka na mambahen na so jadi! [121†]

²⁴Asa na umbege hatangki jala diulahon, sipatudoson ma i tu halak na marroha, na paulihon bagasna diatas batu mamak. [122†]

²⁵Ia ro pe udan potir, mangalantap pe tangkuju jala pur pe habahaba manondong bagas i, ndang na marumpak, ai batu mamak do haojahanna.

²⁶Alai na umbege hatangki, hape ndang diulahon, i ma sipatudoson tu halak na oto, na paulihon bagasna di atas rihit.

²⁷Dung i ro ma udan potir, mangalantap ma tangkuju, pur ma dohot habahaba manondong bagas i, gabe marumpak ma, pola tung marongso. [123†]

²⁸Jadi dung sidung dihatahon Jesus angka hata ondeng, tarhatotong ma natorop i umbege podana i. [124†]

²⁹Ai na marsahala do pangajarionna di nasida, ndada songon pamodaion ni angka sibotosurat. [125†]