Read Batak Toba MATEUS 9 Bible Online

MATEUS 9 - Batak Toba bible

MATEUS 9

¹I. [1] Dung i bongot ma Ibana tu parau, ditaripari ma tao i, jadi sahat ma Ibana tu hutana. [137†]

²Dung i diboan na mamboan ma tu jolona sada halak na sarion, na peak di podomanna. Jadi disi diida Jesus haporseaonnasida, ninna ma mandok na sarion i: Pos ma roham, ale anaha; nunga sesa dosam!

³Alai didok deba sian angka sibotosurat ma di bagasan rohanasida: Na mangaleai Debata do Halak on!

⁴Diboto Jesus ma pingkiran ni rohanasida, jadi didok ma mandok nasida: Boasa tung dipingkiri hamu na jahat di bagasan rohamuna? [138†]

⁵Dia do ummomo? Dohonon: Nunga sesa dosam, manang dohonon: Hehe ma ho mardalani?

⁶Alai asa diboto hamu, marhuaso do Anak ni jolma i di tano on manesa dosa didompakkon ma na sarion i mandok: Hehe ma ho, boan ma podomanmi, laho ma muli!

⁷Jadi hehe ma ibana tutu laho muli.

⁸Marnida i natorop i, mabiar ma nasida jala dipuji ma Debata, na olo mangalehon huaso sisongon i tu angka jolma. II.

⁹Dung i laho ma Jesus sian i, jadi diida ma sada halak na margoar si Mateus, hundul di parbeoan, gabe didok ma mandok ibana: Ihuthon ma Ahu! Jadi hehe do ibana mangihuthon Jesus.

¹⁰Dung i uju hundul Ibana mangan di bagasna i, ro ma torop sijalobeo dohot pardosa mangangkupi Jesus dohot angka siseanna.

¹¹Marnida i angka Parise, ninna nasida ma mandok angka siseanna: Boasa tung mangan gurumuna rap dohot angka sijalobeo dohot pardosa? [139†]

¹²Alai dibege Jesus do i, jadi ninna ma: Apala ringkot di angka na hisar pandaoni, di angka na marsahit do!

¹³Alai laho ma hamu mangguruhon na nidok ni hata on: “Asi ni roha do huhalomohon, ndada pelean!” Ai ndada ro Ahu laho manjou angka partigor, asa dipauba rohana, angka pardosa do! [140†]

¹⁴Dung salpu i, didapothon angka sisean ni si Johannes ma Ibana, didok nasida do: Boasa marpuasai hami dohot angka Parise; ia angka siseanmi ndang marpuasa? [141†]

¹⁵Jadi didok Jesus ma mandok nasida: Tung tarbahen ma marsak roha ni pandongani ni pangoli, saleleng rap dope dohot nasida pangoli i? Alai na ro ma arina, buatonna ma disi Pangoli i sian lambungnasida; disi ma nasida marpuasa. [142†]

¹⁶Angkup ni i: Ndang adong na mandungkaphon abit na imbaru tu abit naung mumut, ai ribakkonon ni na nidungkaphon i do dirina sian pandungkapanna i, jadi lam tu ruakna ma na maribak i. [143†]

¹⁷Ndang dipainding jolma tuak anggur siraruan tu poting naung buruk, aik mapultak poting i gabe bolong tuak i, laos sega dohot ingananna; tu poting na imbaru do bahenon tuak siraruan i, jadi simpan be ma! III.

¹⁸Uju dihatahon dope hata ondeng tu nasida, nunga ro sada halak na sangap marsomba tu Ibana, huhut ma didok: Ipe mate borungku; alai ro ma Ho mangampehon tanganmu tu ibana, asa sumuang mangolu!

¹⁹Jadi hehe ma Jesus rap dohot siseanna, laho mangihuthon ibana.

²⁰Dung i tongon ma adong sada boruboru na tamaningon bulan on, leleng ni sampuludua taon, na ro sian pudina manjama rambu ni ulosna;

²¹ai ninna rohana di bagasan: Nanggo pala ulosna hujama, mangolu ma ahu! [144†]

²²Dung i humusor ma Jesus, dibereng ma ibana, laos ninna ma: Pos ma roham, ale inang, haporseaonmi do na pangoluhon ho! Dung i hipas ma boruboru i olat ni na sangombas i.

²³Asa dung sahat Jesus ro di bagas ni na sangap i, diida ma angka pangondasi dohot natorop oruk.

²⁴Jadi didok ma: Laho ma hamu, ai ndada na mate si betet on; na modom do! Jadi diparengkeli nasida do Ibana. [145†]

²⁵Asa dung dipalaho natorop i, bongot ma Ibana, ditangkup ma tanganna, jadi mulak mangolu ma dakdanak i.

²⁶Dung i sar ma barita i tu na saluat i. IV.

²⁷Dung i laho ma Jesus sian i, jadi adong ma dua halak na mapitung mangihutihut Ibana, huhut gogo manjoujou: Ale Anak ni si Daud! Asi ma roham di hami!

²⁸Jadi laho bongot tu jabu i Jesus, didapothon angka na mapitung ondeng ma Ibana, gabe didok ma mandok nasida: Ai dihaporseai hamu do Ahu margogo patupahon i? Jadi didok nasida ma mandok Ibana: I do, Tuhan!

²⁹Gabe dijama ma matanasida huhut ma didok: Marguru tu haporseaonmuna ma jumpang hamu! [146†]

³⁰Jadi saut ma buha matanasida. Dung i gogo ma dipopai Jesus nasida, didok ma: Jaga ma hamu! So tung adong manang ise na umbotosa! [147†]

³¹Alai laho do nasida, dipanghatahatahon ma Ibana tu sude nasida na saluat i.

³²Laho tu balian dope nasida ondeng, nunga adong na mamboan tu jolona sada halak na ngungu, hasiaran ni sibolis.

³³Jadi dung bali sibolis i, mangkatai ma na ngungu i. Longang ma antong natorop i, angka ninna ma: Ndang dung tarida dope sisongon i di bangso Israel on!

³⁴Alai didok angka Parise ma: Dipabali Halak on do angka sibolis mangasahon sintua ni sibolis i! [148†] V.

³⁵Jadi sai mardalani do Jesus mangaliati angka huta ro di angka sosor, mangajari di angka parguruannasida, manurasihon barita na uli taringot tu Harajaon i; dipamalum do nasa sahit dohot tihasnasida. [149†]

³⁶Jadi mamereng natorop i, asi ma rohana, ai maheu jala marhinamago do nasida diida songon birubiru na so marparmahan. [150†]

³⁷Laos ninna ma mandok siseanna: Bidang do nian sisabion, alai otik do anggo angka pangula. [151†]

³⁸Onpe, elehelek hamu ma Nampuna sisabion i, anggiat dipaborhat angka pangula tu sisabionna i!