Read Batak Toba MARKUS 1 Bible Online

MARKUS 1 - Batak Toba bible

MARKUS 1

¹I. [1] On ma mula ni barita na uli ni Jesus Kristus. [1†]

²Hombar tu na tarsurat di panurirang Jesaya: “Husuru ma suruanki, patujolo ni bohim, sipature sidalananmi!” [2†]

³“Soara ni na manjoujou di halongonan: Pature hamu ma dalan di Tuhan i; pahornop hamu ma sidalananna i!” [3†]

⁴Di halongonan do si Johannes mandidihon jala manjamitahon pandidion hamubaon ni roha, laho pasesahon dosa. [4†]

⁵Jadi ruar ma sude pangisi ni tano Judea ro di sude halak Jerusalem manopot ibana jala dipandidihon do nasida di batang aek Jordan, dung ditopoti be dosana.

⁶Ianggo si Johannes i, imbulu ni unto do ulosna jala hulingkuling do hohosna, angka sihapor dohot situak ni loba do sipanganonna. [5†]

⁷On do jamitana; Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuna. [6†]

⁸Aek do hudidihon tu hamu; alai Tondi Parbadia do didihononna tu hamu. [7†] II.

⁹Uju i ma ro Jesus sian Nasaret, na di luat Galilea, jadi tardidi ma Ibana di aek Jordan, dididi si Johannes. [8†]

¹⁰Di na hehe Ibana sian aek i, pintor diida si Johannes ma mungkap langit, jadi songgop ma Tondi i songon darapati tu Ibana.

¹¹Jala masa ma soara sian ginjang i, na mandok: Ho do Anak haholongan ni rohangku; lomo do rohangku di Ho! [9†] III.

¹²Dung i mamintor ditogihon Tondi i ma Ibana tu halongonan.

¹³Asa di halongonan ma Ibana leleng ni opatpulu ari diunjuni sibolis i; rap dohot angka binatang do Ibana disi, dung i ro ma angka surusuruan marhobasi di Ibana.

¹⁴Alai dung dihurungkon si Johannes, ro ma Jesus tu luat Galilea manjamitahon barita na uli ni Debata. [10†]

¹⁵Ninna do: Nunga dapot tingkina; nunga songgop harajaon ni Debata. Pauba hamu ma rohamuna, jala haporseai hamu ma barita na uli i! [11†] IV.

¹⁶Dung i di na mardalani Ibana di topi ni tao Galilea, diida ma si Simon dohot si Andreas, dongan saama ni si Simon, na sumampakkon jalana tu tao i, ai panjala do nasida.

¹⁷Jadi didok Jesus ma tu nasida: Ihuthon hamu Ahu; bahenonku do hamu sijala jolma!

¹⁸Pintor ditadingkon nasida ma jala i, laos mangihuthon Ibana.

¹⁹Jadi dung dumao otik didalani sian i, diida ma si Jakobus, anak ni si Sebedeus, dohot si Johannes, donganna saama i, di bagasan parau do nang nasida patureturehon jalanasida.

²⁰Dung i manigor dijou ma nasida, gabe ditadingkon nasida ma amanasida, si Sebedeus na di parau i rap dohot angka anak gajianna, laos ro do nasida mangihuthon Ibana. V.

²¹Dung i dibongoti nasida ma huta Kapernaum, jadi manigor tu parguruan ma Ibana di ari Sabbat, laho mangajari.

²²Gabe longang do rohanasida umbege podana, ai na marsahala do pangajarionna di nasida, ndada songon angka sibotosurat. [12†]

²³Jala tongon ma adong di parguruannasida sada halak partondi na hodar na mangangguhi.

²⁴Ninna do: O Jesus, na sian Nasaret; marhua Ho tu hami! Na ro do Ho hape mangago hami! Hutanda do Ho; na badia ni Debata do Ho! [13†]

²⁵Alai disonggahi Jesus do ibana, didok ma: Sip ho! Ruar ma ho sian ibana! [14†]

²⁶Gabe disarat tondi na hodar i ma ibana, pola gogo soarana manjoujou, laho ruar sian ibana.

²⁷Jadi longang ma rohanasida saluhutna, pola masisungkunan nasida, angka didok ma: Na beha do on? Poda na imbaru do on! Ai gari angka tondi na hodar dipaksa mardongan sahala, gabe dioloi do Ibana. [15†]

²⁸Dung i pintor sar ma baritana tu sandok luat Galilea i. [16†]

²⁹Dung ruar sian parguruan i, manigor dibongoti nasida ma jabu ni si Simon dohot si Andreas raphon si Jakobus dohot si Johannes.

³⁰Alai na peak do simatua boru ni si Simon i panepaneon, jadi manigor ditaringothon ma i tu Ibana.

³¹Jadi didapothon ma ibana, dijama ma tanganna pahehehon; dung i ditadingkon panepane i ma ibana, jadi dihobasi ma di nasida.

³²Alai dung bot, dung sundut mata ni ari, masiboan na marsahitna be ma halak tu jolona, ro di na sinonggopan ni angka sibolis.

³³Gabe sude nasida na sahuta i marpungu di jolo ruma i.

³⁴Jadi torop do angka na hansitan na marragamragam sahitna dipamalum jala torop sibolis dipabali; alai ndang diloas angka sibolis i paboahon, naung ditanda nasida Ibana. [17†]

³⁵Dung i manogotna i, borngin situtu dope, hehe ma Ibana tu balian, laho martangiang tu na lungun. [18†]

³⁶Jadi diihuthon si Simon dohot angka donganna ma Ibana tusi.

³⁷Jadi dung jumpangsa, didok nasida ma mandok Ibana: Sude halak mangalului Ho!

³⁸Alai didok Ibana ma tu nasida: Beta ma hita tu na asing, tu angka lumban na humaliang an, asa dohot disi Ahu marjamita. Ai ala ni i do umbahen na ro ahu!

³⁹Laos laho ma Ibana marjamita tu parguruannasida na di liat Galilea jala dipabali angka sibolis.

⁴⁰Jadi ro ma sada halak na huliton tu jolona, dielehelek jala disomba ma Ibana huhut mandok: Molo na olo Ho, tarpamalum Ho do ahu!

⁴¹Jadi asi ma rohana, disurdukkon ma tanganna, dijama ma ibana, laos didok ma: Na olo do Ahu; ias ma ho!

⁴²Jadi pintor longkang ma hulit i sian ibana, gabe ias ma dagingna.

⁴³Dung i gogo ma ibana dipopai jala manigor dipalaho ma. [19†]

⁴⁴Ninna ma mandok ibana: Jaga ho; so tung dipaboa ho i tu manang ise! Alai laho ma ho, patuduhon ma dirim tu malim, dung i pelehon ma na pinatikkon ni si Musa, ala naung malum ho, bahen panindangion tu nasida! [20†]

⁴⁵Alai dung laho ibana, dipungka ma pararathonsa, dipasar ma hata i, pola so tarbahen Ibana be bongot tu huta i di na patar; jadi di ruar, di inganan na sumoding nama Ibana. Laos ro do halak sian desa na ualu i manopot Ibana. [21†]