Read Batak Toba MARKUS 10 Bible Online

MARKUS 10 - Batak Toba bible

MARKUS 10

¹I. [1] Dung i borhat ma Jesus sian i jala sahat ma tu luat Judea na di ipar ni batang aek Jordan. Jadi dirongomi natorop i muse Ibana, gabe diulahi ma mangajari nasida songon na somal. [158†]

²Laos ro ma angka Parise mangunjuni Ibana; on do sungkunsungkunnasida: Beha, na jadi do sirangkonon ni baoa dongan saripena?

³Alai dialusi Ibana ma nasida: Ai aha dipatikkon si Musa tu hamu?

⁴Gabe didok nasida ma: Dioloi si Musa do mambahen surat sirang laho paulakkon. [159†]

⁵Alai dialusi Jesus ma nasida: Ala ni tangkang ni rohamuna do, umbahen na disurathon tu hamu aturan na songon i. [160†]

⁶Alai sian mulana i dope, di hatotompana i, baoa dohot boruboru nasida dibahen. [161†]

⁷Ala ni i tadingkonon ni baoa do amana dohot inana, patophon dirina tu niolina. [162†]

⁸Na gabe sada daging do nasida na dua i; asa ndada dua be nasida, tung sada daging do. [163†]

⁹Onpe, naung pinadomu ni Debata, ndang jadi sirangon ni jolma! [164†]

¹⁰Asa dung muli nasida, diulahi siseanna ma manungkun Ibana taringot tusi.

¹¹Gabe ninna ma mandok nasida: Na paulakkon dongan saripena, dung i dioli na asing, pangalangkup do ibana disi. [165†]

¹²Boruboru i pe, molo disirang dirina sian sinondukna jala dibuat na asing, pangalangkup do. II.

¹³Dung i adong ma na mamboan angka anakkonna tu Ibana, asa dijama; alai dipinsang angka siseanna do nasida.

¹⁴Marnida i Jesus, sogo ma rohana, didok ma tu nasida: Loas hamu ma ro angka dakdanak i sahat tu Ahu; unang orai hamu nasida, ai di angka sisongon i do harajaon ni Debata!

¹⁵Situtu do hatangkon tu hamu: Na so manjalo harajaon ni Debata songon dakdanak, ndang saut bongot tusi. [166†]

¹⁶Dung i dihaol ma nasida, diampehon ma tanganna tu nasida laho mamasumasu. [167†] III.

¹⁷Dung i, laho ruar Ibana tu dalan i, ro ma sahalak marlojong, laos marsinggang ma manungkun Ibana: O Guru, na denggan roha! Dia do sipatupaonku, asa hutean hangoluan na salelenglelengna? [168†]

¹⁸Alai didok Jesus ma tu ibana: Boasa didok ho Ahu na denggan roha? Ndang adong na denggan roha, dungkon ni sasada Debata!

¹⁹Diboto ho do angka patik i: “Unang ho mangalangkup! Unang ho mambunu! Unang ho manangko! Unang ho olo mangkatindangkon na so tutu! Unang ho mandaho! Ingkon pasangaponmu amangmu dohot inangmu!” [169†]

²⁰Alai ninna ma mandok Ibana: O Guru! Sasudena i huradoti do, sian sieteketehonku dope!

²¹Jadi mamereng ibana, holong ma roha ni Jesus di ibana, huhut ma didok: Sada do na hurang di ho: Laho ma ho jolo manggadis nasa na di ho, parlehon ma tu angka na pogos, asa mararta ho di banua ginjang. Dung i ro ma ho, (porsan silang i), ihuthon Ahu! [170†]

²²Alai habot do roha ni i umbege hata ondeng; marsak ma rohana sumurut, ai parsinamot godang do ibana.

²³Dung i dibereng Jesus ma angka siseanna na humaliang, didok ma tu nasida: Maolna i bongot angka paradongan tu bagasan harajaon ni Debata!

²⁴Ia angka sisean i, tarsonggot do di na nidokna i. Alai ninna Jesus ma muse mangalusi nasida: O angka anaha! Maolna i (angka na pos roha di panamotan) bongot tu harajaon ni Debata! [171†]

²⁵Gumabur do boluson ni gaja pinggol ni jarum, unang halak na mora bongot tu bagasan harajaon ni Debata!

²⁶Jadi lam tarhalomong ma nasida, gabe masipandohan ma: Molo boti, ise ma tarbahen malua?

²⁷Dibereng Jesus ma nasida huhut ma didok: Anggo di jolma ndang tarbahen; alai ndang songon i di Debata! Ai saluhutna do tarbahen anggo di Debata! [172†]

²⁸Dung i dipanghulingi si Petrus ma Ibana: Ia hami, saluhutna do hutadingkon hami mangihuthon Ho!

²⁹Gabe didok Jesus ma: Na tutu do hatangkon na tu hamu: Nasa na tumadingkon jabuna, manang hahaanggina, manang ibotona, manang inana, manang amana, manang ianakhonna, manang haumana pe, ala ni Ahu dohot ala ni barita na uli, [173†]

³⁰ingkon silompit saratus jaloonna nuaeng di hasiangan on angka bagas, angka hahaanggi, iboto, ina, ianakhon ro di angka hauma mardongan buruburu, angkup ni i: Di hasiangan sogot hangoluan na salelenglelengna.

³¹Alai lan do angka naung parjolo hian gabe parpudi, jala parpudi hian gabe parjolo. [174†] IV.

³²Alai di tongandalan laho nangkok tu huta Jerusalem, di jolonasida do Jesus, gabe tarsonggot do nasida, laos mabiar do nasida mangihuthon. Jadi diarahon muse ma na sampuludua i, dipungka ma muse paboahon tu nasida na naeng masa tu Ibana:

³³Na nangkok do hita tu huta Jerusalem, jadi pasahatonna ma Anak ni jolma i tu angka sintua ni malim dohot tu angka sibotosurat, jadi marutang hosa ma ibana uhumonna, jala pasahatonna ma Ibana tu angka parbegu; [175†]

³⁴insahanna, tijuranna jala linsinganna ma Ibana, laos pusaonna do; alai mulak mangolu do ibana di ari patoluhon. V.

³⁵Dung i ro ma mandapothon Ibana si Jakobus dohot si Johannes, angka anak ni si Sebedeus; ai hatanasida: Gurunami, adong do pinangido ni rohanami, silehononmu tu hami nian.

³⁶Gabe ninna ma mandok nasida: Ai aha do pinangido ni rohamu sibahenonku tu hamu?

³⁷Dung i didok nasida ma tu Ibana: Naeng bahenonmu hami hundul di hasangaponmi, na sada tu siamunmu, na sada nari tu hambirangmu. [176†]

³⁸Alai ninna Jesus ma mandok nasida: Ndang diboto hamu na pinangidomuna i. Tung tarinum hamu ma siinumonki? Tung tarparidi hamu ma paridion siparidionki? [177†]

³⁹Gabe didok nasida ma tu Ibana: Tarbahen hami do! Dung i ninna Jesus ma mandok nasida: Tutu do nian, inumonmuna do siinumonki, jala paridionmuna do paridion siparidionki. [178†]

⁴⁰Alai na mambahen hundul tu siamunhu dohot tu hambirangku, ndang guru di Ahu i; di angka naung dirade hian do i.

⁴¹Alai dung tarbege i tu na sampulu i, gabe sogo ma rohanasida di si Jakobus dohot Johannes.

⁴²Jadi dipapungu Jesus ma nasida, ninna ma mandok nasida: Diboto hamu do, dirajai angka sigomgomi bangso do parripenasida jala dipaksa angka na sangapna do nasida. [179†]

⁴³Alai unang ma songon i, anggo di hamu! Manang ise hamu na giot sangap, i ma gabe pangoloi di donganna! [180†]

⁴⁴Jala manang ise hamu, na naeng parjolo, i ma gabe naposo ni donganna saluhutna.

⁴⁵Ai nang Anak ni jolma i pe, ndada asa dioloi halak Ibana, umbahen na ro; Ibana do balik pangoloi jala mangalehon hosana bahen tobus ni torop jolma. VI.

⁴⁶Dung i dibongoti nasida ma huta Jeriko. Jadi di na ruar Ibana sian Jeriko raphon siseanna dohot halak natorop, adong ma hundul disi di pinggol ni dalan i sahalak sipanehenehe na mapitung, si Bartimeus, anak ni si Timeus.

⁴⁷Jadi dung dibege ibana, Jesus na sian Nasaret do i hape, dipungka ma manjoujouhon: O Jesus, Anak ni si Daud, asi ma roham mida ahu! [181†]

⁴⁸Lan do maminsang ibana, asa sip nian; alai lam digogo do manjouhon: Ale Anak ni si Daud, asi ma roham di ahu!

⁴⁹Jadi sulon ma Jesus, didok ma: Jou hamu ma ibana! Gabe dijou ma na mapitung i, didok ma mandok ibana: Pos ma roham! Hehe ma ho! Dijou do ho!

⁵⁰Jadi hatop ma ibana hehe, laho mandapothon Jesus; laos tading do anggo ulosna.

⁵¹Dipanghulingi Jesus ma ibana: Aha dipangido roham sibahenonku tu ho? Jala didok na mapitung i ma tu ibana: Gurunami, naeng marnida ma nian matangku!

⁵²Dung i didok Jesus ma tu ibana: Laho ma ho! Dipangolu haporseaonmi do ho. Jala mamintor marnida ma matana, laos diihuthon ma Jesus di sidalananna i.