Read Batak Toba MARKUS 11 Bible Online

MARKUS 11 - Batak Toba bible

MARKUS 11

¹I. [1] Dung i di na lam jonok nasida tu huta Jerusalem, tu Betpage dohot Betania, na di lambung ni dolok Jetun, disuru Jesus ma siseanna dua halak.

²Didok ma tu nasida: Laho ma hamu tu sosor na di jolomuna an; jadi disi bongot hamu tusi, dapot hamu ma tambat disi sada anak ni halode, na so dung dope hinundulan; harhari jala togu hamu ma i tuson!

³Jadi molo tung adong na mandok tu hamu: Na marhua do hamu?, dok hamu ma: Na ringkot do i di Tuhan i; jala tibu do pasuangonna i tuson. [182†]

⁴Borhat do nasida jala dapotsa do anak ni halode i, tambat dingkan harbangan di alaman i, jadi ditanggali nasida ma.

⁵Dung i adong ma halak na jongjong disi na mandok tu nasida: Na marhua do hamu na mananggali anak ni halode i?

⁶Jadi didok ma songon na tinonahon ni Jesus tu nasida, gabe dipasombu ma.

⁷Ditogu nasida ma anak ni halode i tu Jesus, diampehon ma ulosnasida tu atasna jadi marsihundul ma Jesus disi.

⁸Jala torop do halak angka na pahembangkon ulosnasida tu dalan i; na deba manalliki angka bulung rata sian ladang i, laho mangamparhon tu dalan i. [183†]

⁹Ia angka na di jolo nang angka na mangihut sian pudi, sai manjoujouhon do: Hosianna! Pinuji ma na ro marhitehite Goar ni Tuhan i! [184†]

¹⁰Pinuji ma harajaon ni amanta Daud na naeng ro! Hosianna ma di ginjang ni ginjangan! [185†] II.

¹¹Jadi bongot ma Jesus tu huta Jerusalem sahat tu bagas joro i. Jala dung tangkas dibereng sude, ruar ma Ibana muse, laho tu huta Betania rap dohot na sampuludua i, ala naung bot ari situtu.

¹²Dung i torang ni arina i, dung hehe nasida sian Betania, male ma dihilala.

¹³Jadi ditatap ma hau ara sada naung marbulung jadi didapothon ma, atik beha dapotan Ibana disi. Hape dung sahat, holan bulung sambing do jumpangsa; ai ndang dope tingkina marparbue.

¹⁴Jadi dipanghulingi ma hau i: Matua tano on, ndang jadi be agia ise manganhon parbue sian ho! Dibege angka siseanna do nidokna i. [186†] III.

¹⁵Dung i sahat ma nasida tu huta Jerusalem. Jadi dibongoti ma bagas joro i, manigor dipabali ma angka na manggadisi dohot na manuhori di joro i, ditunggalingkon ma meja ni angka panungkari ro di bangku ni angka sigadis darapati. [187†]

¹⁶Ndang diloas boluson ni na marsiboanon bagas joro i.

¹⁷Laos ninna do mangajari nasida: Nda tarsurat: “Bagas partangiangan ni saluhut bangso do goaron bagashu?” Hape gabe liang ni pandobo do i dibahen hamu. [188†]

¹⁸Jadi dibege angka sintua ni malim dohot angka sibotosurat ma i, gabe dilului ma dalan mamusa Ibana; ai nunga biar rohanasida mida Ibana, ala tarhalomong sude natorop i umbege podana i.

¹⁹Alai ganup bot ari, sai ruar do nasida tumadingkon huta i. [189†]

²⁰Di na mamolus nasida manogotna i, diida ma naung rahar hau ara i ro di uratna. [190†]

²¹Marningot hata i si Petrus, didok ma tu Ibana: Guru, bereng ma! Nunga rahar hau ara na binuraanmi! [191†]

²²Gabe didok Jesus ma mangalusi nasida: Porsea ma hamu di Debata! [192†]

²³Na tutu do hatangkon tu hamu: Molo adong na mandok tu dolok on: Hindat dirim, dabuhon ho tu laut!, sai na saut do i idaonna, anggo so ganggu ibana di bagasan rohana jala porsea, ingkon tulus na nidokna i. [193†]

²⁴Dibahen i hudok ma tu hamu: Saluhutna, manang dia pe dipangido hamu di tangiangmuna, sai na sahat do i tu hamu, asal porsea hamu, ingkon jaloonmuna. [194†]

²⁵Alai molo jongjong hamu martangiang, sai sesa hamu ma, molo adong pangkurangi ni rohamu di halak, anggiat disesa nang Amamuna na di banua ginjang i salamuna.

²⁶Alai anggo so disesa hamu, ndang sesaon ni Amamuna na di banua ginjang i salamuna. [195†] IV.

²⁷Jala dibongoti muse ma huta Jerusalem. Jadi mardalandalan ma Ibana di joro i, gabe ro ma mandapothon Ibana angka sintua ni malim, angka sibotosurat ro di angka panungganei.

²⁸Didok nasida ma tu Ibana: Huaso dia dipangasahon Ho mambahen sisongon i? Ise do na mangalehon huaso i tu Ho, laho patupahon angka i? [196†]

²⁹Gabe didok Jesus ma tu nasida: Adong na husungkun tu hamu, alusi hamu ma Ahu, asa hupaboa tu hamu, manang huaso dia hupangasahon di pambahenanki:

³⁰Ia pandidion ni si Johannes, sian ginjang do i, manang sian jolma? Alusi hamu ma Ahu!

³¹Gabe marhusari ma nasida songon on: Ia ninta: Sian ginjang!, ndang tagamon so dohononna: Antong, boasa so dihaporseai hamu ibana?

³²Alai beha, ia tadok: Sian jolma? Ai dihabiari do natorop, ala panurirang do si Johannes di roha ni jolma saluhutna. [197†]

³³Gabe ninna nasida ma mangalusi Jesus: Ndang huboto hami i! Jala ro ma hata ni Jesus tu nasida: Ahu pe, ndang paboaonku tu hamu, manang huaso dia hupangasahon patupahon ulaonki.