Read Batak Toba MARKUS 12 Bible Online

MARKUS 12 - Batak Toba bible

MARKUS 12

¹I. [1] Dung i dijamitai Jesus ma nasida marhite sian umpama, ninna ma: Adong ma sada halak na pauli porlak anggurna, dihandangi ma humaliang, dihali ma pangilangan, dipauli ma gudangna, dipasahat ma tu angka pangula, dung i marhutasada ma ibana. [198†]

²Jadi di tingkina i disuru ma naposona manopot angka pangula i, asa dijalo sian nasida parbuena i deba.

³Hape ditangkup nasida do ibana, dipukpuhi, laos muli boti do ibana dipaulak.

⁴Dung i diulakkon ma marsuru naposona na asing tu nasida, alai dilombut do nang i jala dileai. [199†]

⁵Jadi disuru muse sahalak na asing, alai dipusa do anggo i; dung i lan dope angka na asing disuru, na deba dilasahi, na deba dipusa nasida.

⁶Adong dope anakna sada, hinaholongan ni rohana, i ma disuru parpudi tu nasida, ai ninna rohana do: Ra biar ma rohanasida mida anakki! [200†]

⁷Alai masipandohan do angka pangula i: On do panean! Beta ma, tapusa ma ibana, asa di hita siteanonna i!

⁸Gabe ditangkup nasida ma ibana, dipusa ma, jala tu balian ni porlak anggur i nama didanggurhon. [201†]

⁹Dia ma tagamon bahenon ni tuan parporlak anggur i? Ro ma ibana mangalengsehon angka pangula i, dung i pasahatonna ma porlak i tu halak na asing.

¹⁰Ndang dung dope dijaha hamu hata ni surat on: “Ia batu na binolongkon ni angka pande bagas i, nunga i gabe batu parsuhisuhi.

¹¹Pinamasa ni Tuhan do i; halongangan do i diida matanta”? [202†]

¹²Gabe dilului nasida ma dalan manangkup Ibana; alai mabiar do nasida mida natorop i. Ai diboto, nasida do tinuju ni umpama ondeng, laos laho do nasida manadingkon Ibana. II.

¹³Jadi dipaborhat nasida ma deba sian angka Parise dohot sian angka naposo ni si Herodes, asa dipadapot nasida Ibana di hatana. [203†]

¹⁴Jadi ro ma nasida mandok tu Ibana: Gurunami, huboto hami na tigor Ho jala ndang dihabiari Ho agia ise, ai so siida bohi ni jolma Ho; sintongsintong dipodahon Ho dalan ni Debata. Na jadi do lehonon guguan tu Kesar i, manang na so jadi? Lehononta do, manang ndang? [204†]

¹⁵Alai diboto Jesus do, ansiansinasida i, jadi didok ma tu nasida: Boasa unjunanmuna Ahu? Boan hamu ma tu Ahu rupia sada asa huida!

¹⁶Jadi diboan nasida ma i. Dung i didok Ibana ma tu nasida: Gombaran dohot surat ni ise do dison? Jadi didok nasida ma tu Ibana: Gombaran ni Kesar i do!

¹⁷Laos didok Jesus ma tu nasida: Lehon hamu ma tu Kesar na sian Kesar i, jala tu Debata na sian Debata! Jadi longang ma rohanasida mida Ibana. [205†] III.

¹⁸Dung i ro ma tu jolona angka Saduse, na so marhatutuhon, adong haheheon sian na mate, jadi disungkun nasida ma Ibana: [206†]

¹⁹Gurunami, disurathon si Musa do tu hita: Molo mate halak, ditinggalhon pardihutana, so marianakkon, ingkon dihabia anggina do boruboru i, pajongjongkon pomparan di hahana i. [207†]

²⁰Asa adong ma pitu halak na marhahamaranggi; mambuat boru ma sihahaan i, jadi mate ma ibana, so martinading.

²¹Dung i dibuat paidua i ma boruboru i, laos mate do ibana, so martinading; paitolu i pe songon i do.

²²Songon i sude nasida na pitu i so martinading. Umpudi sian nasida sasudena i mate ma nang parompuan i.

²³Ise do sian nasida nampuna parompuan i, ia di haheheon i? Ai nasida na pitu di do marniolihonsa.

²⁴Alai ninna Jesus ma tu nasida: Nda i ma haliluonmuna, na so binotomuna Surat i nang hagogoon ni Debata?

²⁵Ai di na hehe nasida sian na mate, ndang mangoli, ndang marhamulian; songon angka surusuruan na di banua ginjang i do nasida!

²⁶Alai anggo taringot tu haheheon ni angka na mate, ndang dung dijaha hamu ulaning di surat ni si Musa (binduna: Ramba na sampulguk) na nidok ni Debata tu ibana: “Ahu do Debata ni si Abraham, Debata ni si Isak jala Debata ni si Jakkob”? [208†]

²⁷Apala Debata ni angka na mate Ibana; Debata ni angka na mangolu do! Tung na lilu situtu do hamu! IV.

²⁸Na dibege sibotosurat sahalak do nasida na masialusan i, gabe ro ma ibana jumonok; dung ditanda denggan ni alus ni Jesus, disungkun ma Ibana: Dia do patik na ummangat sian patik i sudena?

²⁹Dialusi Jesus ma ibana, didok ma: On do patik na ummangat: “Tangihon ma, ale Israel, Tuhan sasadasa do Tuhan Debatanta i.

³⁰Jala haholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom!” [209†]

³¹Ia patik paiduana, on do: Haholonganmu do donganmi songon dirim! Patik na ummangat sian na dua i ndang adong. [210†]

³²Jadi didok sibotosurat i ma tu Ibana: Tingkos didok ho, Guru, hombar tu hasintongan: Sada do Debata jala ndang adong na asing dungkon ni Ibana. [211†]

³³Jala mangkaholongi Ibana sian nasa ateate, sian nasa roha dohot sian nasa gogo huhut mangkaholongi dongan songon diriniba, ummangat do i sian saluhut angka pelean situtungon nang pelean na asing pe. [212†]

³⁴Dung dibege Jesus pantasna maralus, ninna ma mandok ibana: Ndang sadia dao ho sian harajaon ni Debata! Olat ni i ndang adong be na hum roha pasungkunsungkun Ibana. [213†] V.

³⁵Uju mangajari Jesus di bagasan joro i, ninna ma mandok nasida: Marhua didok angka sibotosurat Kristus i Anak ni si Daud?

³⁶Ai si Daud sandiri do mandok marhitehite Tondi Parbadia i: “Ninna Tuhan i do mandok Tuhanku: Hundul ma Ho tu Siamunhon, paima hupeakhon angka musum, bahen sidegean ni patmu!” [214†]

³⁷Apala si Daud do manggoar Ibana Tuhan, beha ma Ibana Anakna? Lomo do roha ni natorop i tumangihon hatana. [215†]

³⁸Laos didok Jesus ma di sipodaonna i: Jaga ma hamu mida angka sibotosurat, angka na lomo roha madangadang marbaju na ganjang, asa ditabi halak nasida di angka onan.

³⁹Na ringkot do rohanasida di bangku jolojolo di angka parguruan ro di hundulan na sumangap di parpestaan. [216†]

⁴⁰Dipolgak nasida do bagas ni na mabalu, gabe tangiang na ganjang do dibahen nasida mangkuphupisa. Uhum na dumokdok do jaloonnasida. VI.

⁴¹Na hundul do Ibana tondongkon poti parasian, gabe dibereng ma pambahen ni halak mandabuhon hepengna tu poti i. Jadi torop do na mora na mandabuhon na godang. [217†]

⁴²Laos ro ma boruboru na mabalu sada, na pogos; didabuhon ma tusi dua rimis, i ma sasen.

⁴³Gabe dijou Jesus ma siseanna i, ninna ma mandok nasida: Situtu do hatangkon tu hamu: Gumodang do na nidabuhon ni na mabalu, na pogos an tubagasan poti parasian i, asa saluhut angka na mandabuhon i.

⁴⁴Ai sian lobilobi nasida do didabuhon be; alai ia parompuan an, sian pogosna do didabuhon saluhutna na di ibana, tung sandok hangoluanna i. [218†]