Read Batak Toba MARKUS 15 Bible Online

MARKUS 15 - Batak Toba bible

MARKUS 15

¹I. [1] Manigor dung torang ari, martuptup ma angka sintua ni malim raphon angka panungganei, angka sibotosurat dohot sandok rapot godang i, jadi ditali nasida ma Jesus, mamboan jala pasahathon Ibana tu si Latus.

²Disungkun si Latus ma Ibana: Atehe, raja ni halak Jahudi do Ho? Jala ninna Jesus ma mangalusi ibana: Songon nidokmi do tutu!

³Alai godang do dipartuhashon angka sintua ni malim dompak Ibana.

⁴Jadi diulahi si Latus ma manungkun Ibana: Ndang alusanmu i? Godangna i dituhashon nasida dompak Ho!

⁵Alai ndang dialusi Jesus agia aha, pola longang roha ni si Latus. [259†]

⁶Alai jumpa ari pesta, somal dipalua tu nasida sada halak na tarhurung, hombar tu na pinangido ni rohanasida.

⁷Jadi adong ma sada halak na margoar si Barabas, rap tarhurung dohot angka panggunturi, naung mambunu jolma di na guntur i.

⁸Jala nangkok ma na torop i laho mangido, asa dibahen tu nasida songon na somal.

⁹Gabe ro ma si Latus mangalusi nasida: Atehe, denggan do rohamuna hupalua tu hamu raja ni halak Jahudi i?

¹⁰Ai diboto, na sian late ni roha do dipasahat angka sintua ni malim Ibana.

¹¹Alai digintali angka sintua ni malim do natorop i, asa tagonan si Barabas dipalua tu nasida. [260†]

¹²Jala ninna si Latus ma muse mangalusi nasida: Antong, dia do dipangido rohamu bahenonku tu na ginoarmuna: Raja ni Jahudi?

¹³Alai dijouhon nasida ma: Parsilangkon Ibana!

¹⁴Gabe didok si Latus ma mandok nasida: Ai aha do na jat dibahen? Alai lam digogo ma manjouhon: Parsilangkon ma Ibana!

¹⁵Alai naeng mambuat roha ni natorop i do si Latus, jadi dipalua ma si Barabas; alai dipasahat ma anggo Jesus, asa diparsilangkon, dung jolo dilasahi.

¹⁶Dung i ditogihon angka soldadu i ma Ibana tu emper paruhuman i (i ma Pretorion), jadi tusi ma dijou sude na sahorong i.

¹⁷Baju dapdap ma disolukkon nasida tu dagingna, didandani ma sungsang duri bahen tumpalna.

¹⁸Dung i tole ma nasida mangkormat Ibana, dipandok ma: Tabi ma di Ho, raja ni Jahudi!

¹⁹Laos dipasakkon nasida tolong tu uluna, ditijuri do Ibana jala dilompit ma totnasida, laho sumomba Ibana. [261†] II.

²⁰Asa dung dileai nasida Ibana, ditanggal ma muse baju dapdap i sian dagingna, disolukkon ma tu Ibana angka abitna hian. Dung i ditogu ma Ibana tu balian, laho mamajalhon. [262†]

²¹Mamolus do sian i sahalak na ro sian ladangna, si Simon na sian luat Kirene, ama ni si Aleksander dohot si Rupus; i ma digogoi nasida, asa diporsan hau na pinarsilang siporsanon ni Jesus hian. [263†]

²²Jadi diboan nasida ma Ibana tu Golgata (lapatanna: Partangkurahan).

²³Dilehon nasida ma tu Ibana anggur na marsaor mir, alai ndang dijalo.

²⁴Diparsilangkon nasida do Ibana, jadi dibagi ma angka abitna; tondung do dibahen laho pasagihonsa.

²⁵Di pungkul sia do diparsilangkon nasida Ibana.

²⁶Jala disurathon nasida do tu ginjangna surat parsalaanna: Raja ni Jahudi!

²⁷Rap dohot Ibana diparsilangkon nasida dua panamun, sada di siamunna, sada di hambirangna.

²⁸Gabe jumpang ma na nidok ni Surat i: “Tarrajum do Ibana tu halak parjahat.” [264†]

²⁹Jadi diinsahi angka pamolus i ma Ibana, diupirhon be ma ulunasida huhut dipandok: Pe Ho, na mangalohai bagas joro i jala na pajongjongkonsa di bagasan tolu ari! [265†]

³⁰Palua dirim jala mijur ma Ho sian hau na pinarsilang i!

³¹Suman tusi do panginsahion ni angka sintua ni malim rap dohot angka sibotosurat, angka na masipandohan: Na leban dipalua, ia dirina so tarpaluasa.

³²Ho, Kristus, raja ni Israel! Mijur ma Ho antong sian hau na pinarsilang i, asa huida hami i jala porsea! Manginsahi do nang donganna tarsilang. [266†]

³³Alai di hos ni ari songgop ma na holom tu liat tano i, sahat ro di pungkul tolu.

³⁴Jadi di pungkul tolu i, marsoara na balga ma Jesus manjouhon: Ale Debatangku, Debatangku, boasa tadingkononmu Ahu (Eloi Eloi, lama sabakhtani)! [267†]

³⁵Jadi adong ma deba na jongjong disi na umbegesa, gabe didok ma: Si Elia do jinouna i! [268†]

³⁶Alai marlojong ma sahalak manornophon limut tu asom, dilohothon ma i tu tolong laho painum Ibana, huhut ma didok: Antong, taida ma, manang na ro si Elia paijurhon Ibana!

³⁷Dung i marsoara na gogo ma Jesus, laos tos ma hosana.

³⁸Jadi maribak bola dua ma hirehire na di bagas joro i, sian ginjang tu toru.

³⁹Dung diida letnan na mangadopi Ibana, songon i hape parmatena, gabe didok ma: Na tutu do Anak ni Debata Halak on!

⁴⁰Manatapnatap do sian na dao deba inaina, songon si Maria Magdalena, si Maria ni si Jakobus na umposo, angkup ni i ina ni si Josep dohot si Salome.

⁴¹Diihuthon nasida do Ibana laho mangkobasi, uju di Galilea dope Ibana; dungkon ni i lan dope angka na asing, na rap nangkok dohot Ibana tu Jerusalem. [269†] III.

⁴²Jadi dung bot ari, di ari parhobasan i, i ma patujolo ni ari Sabbat,

⁴³ro ma si Josep sian Arimatea, na masuk rapot godang, halak na sangap na maimaima di harajaon ni Debata; dipatomos ma rohana laho bongot tu jolo ni si Latus, mangido bangke ni Jesus.

⁴⁴Jadi longang ma roha ni si Latus, ala naung mate; gabe dijou ma letnan i, disungkun ma ibana, manang naung leleng mate.

⁴⁵Asa dung ditangkasi i sian letnan i, dipasahat ma bangke i tu si Josep.

⁴⁶Dituhor si Josep ma dagangan, dipaijur ma Ibana, dibaluti ma tu dagangan i, dipeakkon ma bangke i tu tanoman sada na niliang tu bagasan batu; dung i digulang ma sada batu tu baba pintu ni tanoman i.

⁴⁷Dipanotnoti si Maria Magdalena dohot si Maria ni si Josep ma, manang na tu dia Ibana dipeakkon. [270†]