Read Batak Toba MARKUS 4 Bible Online

MARKUS 4 - Batak Toba bible

MARKUS 4

¹I. [1] Jadi diulahi ma mangajari di topitao i, gabe marpungu ma mansai torop halak tu jolona, pola dibongoti parau sada na di tao i bahen juguhanna; di topi tao i do anggo natorop i sudena. [55†]

²Jala godang ma dipodahon tu nasida marhite sian umpama, didok ma di pamodaionna i:

³Tangihon hamu ma! Na laho ma sahalak panabur manaburhon bonina.

⁴Jadi di na manabur i ibana, adong ma deba na mamiltik tu dalan, gabe ro ma angka pidong mamargutisa.

⁵Anggo na deba tu tano na batu on do madabu, di na so sadia hapal tano, jadi pintor tubu ma, dibahen na so bagas tano disi.

⁶Alai di na lam timbo mata ni ari, rahar ma, gabe mate, ala so marurat.

⁷Anggo na deba tu parsihupian do madabu, laos tubu do angka sihupi i jala dipisat do eme i, gabe ndang marparbue.

⁸Alai na deba nari tu tano na denggan i do madabu, gabe saut ma diparbuehon parbue na mangolu jala na olo ganda, ro di tolupulu lompit, onompulu lompit dohot saratus lompit.

⁹Laos didok ma: Hamu angka parpinggol na marbinege, pinggol hamu ma i! [56†]

¹⁰Dung i dung laho natorop i, disungkun angka donganna rap dohot na sampuludua i ma Ibana siala angka umpama i. [57†]

¹¹Gabe didok ma tu nasida: Bulus do dilehon anggo tu hamu hahomion ni harajaon ni Debata; alai marhite sian umpama do sahat ni i sude tu angka na di balian, [58†]

¹²asa unang saut diida nasida, nang pe tangkas dibereng; asa unang diantusi, nang pe torang dibege; asa unang mulak rohanasida, unang sesa dosanasida. [59†]

¹³Laos didok ma tu nasida: Ndang diantusi hamu hape umpama ondeng! Beha ma antusanmuna umpama i sudena?

¹⁴Hata i do disaburhon panabur i.

¹⁵Jala angka on do na sinaburhon tu dalan i: Ia disi disaburhon hata i, dung dibege nasida, pintor ro ma sibolis i, dirampas do hata na sinaburhon tu rohanasida.

¹⁶Suang songon i, angka on ma na sinaburhon tu tano na batu on: Ia disi dibege hata i, manigor las ma rohana manjalosa;

¹⁷alai ndang marurat di bagasan rohanasida, parsatongkinan do nasida, jadi molo masa haporsuhon manang pangaleleon siala hata i, pintor targasip do rohanasida. [60†]

¹⁸Asing muse angka na sinaburhon tu parsihupian, i ma angka naung umbege hata i.

¹⁹Alai masuk huhut tu rohanasida pangkolsohon di angka na di hasiangan on dohot hamoraon sipangansi i ro di hisaphisap na asing i, jala angka i do mamisati hata i, laos so marparbue. [61†]

²⁰Dung i angka on do na sinaburhon tu tano na denggan: Angka na umbege jala na manjangkon hata i, gabe marparbue, tolupulu lompit na deba, onompulu lompit na deba saratus lompit na deba.

²¹Dung i didok ma tu nasida: Ai dipasang do ulaning palito laho pajongjongkonsa tu toru ni ampang manang tu toru ni parate; nda bahenonna i nian tu atas parpalitoan? [62†]

²²Ai ndang adong na holip na so sipapataron sogot; jala ndang adong na masa di sihabunian, na so ro tu hatorangon muse. [63†]

²³Hamu angka parpinggol na marbinege, pinggol hamu ma i!

²⁴Laos didok ma tu nasida: Manat ma hamu di na binegemuna; ai parsuhatonmuna do sisuhathononhon tu hamu, tambaonna dope tahe tu hamu! [64†]

²⁵Ai tu ganup paradongan lehonon do. Alai sibuaton do sian na so paradongan nang na di ibana hian. [65†]

²⁶Dung i didok ma: On ma pangalaho ni harajaon ni Debata: Songon pambahen ni halak na manaburhon boni tu haumana.

²⁷Na modom do ibana bornginna jala dungo ia arianna; na martumbur do anggo boni i laos marbuhutano, so pamotoan ni parhauma i. [66†]

²⁸Ai sian gogona sandiri dipatubu tano i jumolo hauna, dung i biurna, dung i eme na porngis i di bagasan biurna i.

²⁹Alai disi dilehon parbuena, mamintor disuru ma panabi, ai nunga ro gotilon. [67†]

³⁰Dung i didok ma: Tu aha ma pasumanonta harajaon ni Debata; tu dia ma umpamahononta?

³¹Suman tu batu ni siarum ma! Ai bonina na sinaburhon tu tano, i do na ummetmet sian nasa batu ni suansuanan.

³²Alai dung sinaburhon, simbur ma i tubu, gabe tumimbo sian nasa ingkau rata jala balga ma dangkana, pola tarbahen do pidong na martongatonga langit marasar di linggomna i.

³³Jadi marhitehite lan umpama sisongon on dihatahon nasida hata i, marguru tu na tarjangkon nasida. [68†]

³⁴Alai ndang adong dihatahon tu nasida so marhitehite umpama; alai pulik do dipatorang saluhutna tu siseanna. II

³⁵Jadi laos di na sadari i, dung bot ari, didok ma tu nasida: Beta marparau ma hita tu bariba an!

³⁶Jadi dipalaho nasida ma natorop i, dijangkon ma Ibana songon i tu bagasan parau i; jala adong dope angka parau na asing udur dohot nasida.

³⁷Dung i masa ma habahaba na gogo situtu, jadi disampakkon ma angka galumbang i tu bagasan parau i, maradu digohi parau i.

³⁸Na modom do anggo Ibana di atas halangulu sada, tartungkan pudipudi ni parau i; gabe disungguli nasida nama Ibana, didok ma tu Ibana: Ale Guru! Ndang disarihon roham hita mago?

³⁹Jadi hehe ma Ibana, hona hata ma alogo i dibahen, didok ma tu tao i: Sip ma! So! Jadi so ma alogo i jala menak situtu ma. [69†]

⁴⁰Laos didok ma tu nasida: Boasa songon i biar rohamuna? Dia do umbahen soada haporseaon di hamu?

⁴¹Jadi hatahutan situtu ma nasida jala masipandohan ma: Halak dia do On? Guru dokna do hape alogo ro di tao i!