Read Batak Toba MARKUS 5 Bible Online

MARKUS 5 - Batak Toba bible

MARKUS 5

¹I. [1] Dung i sahat ma nasida tu bariba ni tao i, tu luat ni halak Gadara. [70†]

²Jadi di na ruar Ibana sian parau i, pintor ro ma mandapothon Ibana sahalak na ro sian parbandaan, na manjujung tondi na hodar.

³Di parbandaan do ibana maringanan, jala ndang adong na tuk tumali ibana, nang pe dirantei.

⁴Ai nunga jotjot dirantei tanganna dohot patna, alai ditostosi do angka rante na di tanganna dohot na di patna i; ndang tarpatunduk jolma ibana.

⁵Jala manongtong arian dohot borngin di parbandaan nama ibana manang di angka dolokdolok mangangguhangguk huhut mambalbalhon batu tu dagingna.

⁶Di na tinatapna i Jesus sian na dao, ro ma ibana marlojong jala marsinggang tu jolona.

⁷Laos marsoara na gogo ma ibana manjoujou, ninna ma: Marhua Ho tu ahu, Jesus, Anak ni Debata na tumimbul! Huelehelek Ho marhitehite Debata: Unang ahu arsahi! [71†]

⁸Ai nunga didok tu ibana: Ruar ma ho, tondi na hodar, sian halak on!

⁹Dung i disungkun ma ibana: Ai ise goarmu? Gabe didok ma mangalusi: Loksa do goarhu, ai torop do hami. [72†]

¹⁰Jala mansai dielehelek ma Ibana, anggiat unang nasida dipabali sian na saluat i.

¹¹Alai adong ma disi, di robean i babi sapunguan na balga, na manjampali.

¹²Jadi dielehelek nasida ma Ibana, ninna ma: Suru ma hami tu bagasan babi an, asa i hubongoti hami!

¹³Dioloi ma nasida, gabe ruar ma angka tondi na hodar i, dibongoti ma angka babi i, jadi mardobur ma na sapunguan i sian tolping i tu tao i; hirahira duaribu do toropna, gabe mate mogap ma di tao i.

¹⁴Alai na maporus do angka parmahan i, dibaritahon ma i tu angka na di huta dohot na di angka ladang. Jadi ro ma angka i manangkasi na masa i.

¹⁵Jala ro ma nasida tu Jesus, jadi mabiar ma nasida marnida na sinonggopan ni sibolis nasailaonna i, hasandaran ni na saloksa i, ai nunga hundul ibana marulos jala marroha.

¹⁶Jala dipajojor angka na marnidasa ma tu na ro i, naung masa tu hasonggopan ni sibolis i dohot na taringot tu babi i,

¹⁷gabe pintor dielehelek ma Ibana, asa sumurut sian luatnasida.

¹⁸Jadi laho mambongoti parau i Jesus, diparhurajai hasandaran ni angka sibolis i ma Ibana, asa dongananna Ibana nian.

¹⁹Alai ndang diloas, didok ma tu ibana: Muli ma ho tu angka sisolhotmu, pajojor ma tu nasida godang ni na binahen ni Tuhan i tu ho dohot pangasina di ho! [73†]

²⁰Dung i laho ma ibana dipaboaboa ma di Sisampuluhuta i godang ni sude na binahen ni Jesus tu ibana, gabe longang ma saluhutna. [74†] II.

²¹Jadi dung marparau Jesus muse tu bariba i, dirongomi natorop i Ibana na di topi tao i dope.

²²Jala ro ma sintua ni parguruan i sahalak, na margoar si Jairus; jadi disi diida Jesus, marsinggang ma ibana tu lambung patna.

²³Diparhurajai ma Ibana, ninna huhut: Na matemate ne do nuaeng borungku; sai ro ma Ho jolo mangampehon tanganmu tu ibana, asa malua jala mangolu! [75†]

²⁴Jadi hehe ma Ibana, didongani ma, jala torop ma halak mangihuthon, pola disosak nasida Ibana.

²⁵Dung i adong ma disi parompuan sada na marsahithon bulan, leleng ni sampuludua taon. [76†]

²⁶Nunga tung godang ditaon binahen ni torop pandaoni jala sude artana dipasuda tusi; laos so marniula, lam tu pasangna tahe sahitna i.

²⁷Jadi dung dibege barita ni Jesus, ro ma ibana rap dohot natorop i sian pudi, dijama ma ulosna. [77†]

²⁸Ai ninna rohana do: Asal hujama nanggo ulosna i, malum do hilalaonku.

²⁹Jadi pintor montok ma mudar i; laos dihilala do di dagingna, naung malua ibana sian na niaena i.

³⁰Ia Jesus mamintor diboto do, naung adong hagogoon ruar sian Ibana, jadi dipahusor ma dirina di tongatonga ni natorop i, ninna ma: Ise i na manjama uloshi?

³¹Gabe didok angka siseanna ma mandok Ibana: Diida Ho do panosak ni natorop on di Ho, gabe didok Ho dope: Ise manjama Ahu?

³²Alai dibereng ma humaliang mananda na mambahensa.

³³Gabe ro ma parompuan i, angka dotdot ma ibana dibahen biar ni rohana, marningot naung masa tu ibana i; laos marsinggang ma ibana tu jolona, sintong ma dipaboa saluhutna i.

³⁴Alai didok ma tu ibana: Dipalua haporseaonmi do ho, inang! Mardame ma ho laho! Sai malua ma ho sian parniaeanmi! [78†]

³⁵Mangkatahon i dope Ibana, nunga ro angka na sian bagas ni sintua i mandok: Nunga mate borumi; aha be lojaanmu Guru i!

³⁶Alai diparhamuda Jesus do hata ni na ro i, didok ma tu sintua i: Unang ho mabiar, asal ma porsea! [79†]

³⁷Jadi ndang diloas manang ise mangihuthon Ibana, dungkon ni si Petrus, Jakobus dohot Johannes, dongan saama ni si Jakobus i.

³⁸Sahat ma nasida tu bagas ni sintua i, jala diberengi Ibana ma na gaor i, i ma angka na tumatangis jala gogo mangandungi.

³⁹Dibongoti ma, didok ma tu nasida: Boasa songon i gaor hamu jala tumatangis? Ndang na mate si betet i: na tarpodom do i! [80†]

⁴⁰Jadi diparengkeli nasida ma Ibana. Alai diparuar ma nasida saluhutna, diarahon ma ama dohot ina ni dakdanak i dohot donganna hian, dibongoti ma bilut hapeahan ni dakdanak i.

⁴¹Dung i ditangkup ma tangan ni dakdanak i, didok ma tu ibana: Talita kumi! Astuanna: O Butet! Ahu mandokkon ho hehe! [81†]

⁴²Dung i mamintor hehe ma boruboru i laos mardalandalan. Marumur sampuludua taon do ibana, gabe tarhalomong situtu ma nasida.

⁴³Alai gomos ma nasida dipopai, unang diboto manang ise i; laos didokkon ma lehononna mangan. [82†]