Read Batak Toba MARKUS 7 Bible Online

MARKUS 7 - Batak Toba bible

MARKUS 7

¹I. [1] Dung i rap marpungu ma tu jolona angka Parise dohot deba sian angka sibotosurat, naung ro sian huta Jerusalem.

²Jadi diida nasida ma deba sian angka siseanna, na jorjor mangan roti, so jolo marburi. [103†]

³Ai anggo halak Parise nang nasa Jahudi, ndang olo mangan, ia so jumolo tangkas diusa tanganna mangihuthon adat ni angka situatua. [104†]

⁴Na sian onan pe, ndang dipangan, so jolo diuras, jala godang dope na asing ditiop siradotan, songon pamurion di angka panginuman, gendi dohot hudon. [105†]

⁵Jadi disungkun angka Parise dohot angka sibotosurat ma Ibana: Boasa so diihuthon angka siseanmi adat ni angka situatua, ai ramun do tanganna mangan roti?

⁶Alai ninna Ibana ma mandok nasida: Sintong do dapot di hamu pangansi na sinurirangkon ni si Jesaya, songon na tarsurat i: “Dipapujipuji pamangan ni bangso on do Ahu; alai ia rohanasida dao do sian Ahu!” [106†]

⁷“Jala magopo do pambahennasida pasangaphon Ahu, ai patikpatik ni jolma do dipodahon nasida.”

⁸Ai tading do patik ni Debata dibahen hamu, laho mangaradoti adat na sian jolma.

⁹Laos didok ma tu nasida: Leak ma antong ditompas hamu patik ni Debata, laho mangaradoti adatmuna.

¹⁰Ai didok si Musa do nian: “Pasangap ma amangmu dohot inangmu!” Angkup ni i: “Ia na mamburai amana manang inana, sipusaon do!” [107†]

¹¹Alai hamu mamodahon: Dohonon ni halak ma tu amana manang tu inana: Korban! Lapatanna: Pinelehon ma tagonan na patut hian pangurupingku di ho.

¹²Asa ndang diloas hamu be ibana paturehon agia aha di amana manang di inana pe;

¹³gabe disegai hamu do hata ni Debata dibahen adat na pinadalanmuna. Jala godang na suman tusi diula hamu. [108†]

¹⁴Jala dijou muse ma natorop i, ninna ma mandok nasida: Tangihon hamu saluhut ma Ahu, jala parateatehon hamu ma:

¹⁵Nda tung gabe ramun jolma binahen ni na ro sian ruar tu bagasan ibana; alai na ruar sian jolma i, i do mangaramuni ibana. [109†]

¹⁶Hamu, angka parpinggol na marbinege, pinggol hamu ma i! [110†]

¹⁷Jadi dung muli Ibana jala holang sian natorop i, disungkun angka siseanna ma Ibana siala umpama ondeng.

¹⁸Gabe didok ma tu nasida: Asa dohot do hamu hape so mangarti! Ndang dapot rohamu, na so tarbahen ramun jolma bahenon ni nasa na ro sian ruar tubagasan ibana.

¹⁹Ai so manang bongot i tu bagasan rohana; tu butuha do i laho, dung i bolong do i muse di inganan na soding, asa gabe ias do saluhutna sipanganon i.

²⁰Alai on do: Na ruar sian jolma i, i do mangaramuni ibana.

²¹Ai sian bagasan, sian roha ni jolma i do ro pingkiran na jahat, parmainanon, panangkoon, pamunuon, [111†]

²²pangalangkupon, pangahution, hajahaton, pangansion, pargadombuson, panorgangon, panginsahion, ginjang dohot neang ni roha.

²³Na ro sian bagasan do saluhut angka hajahaton ondeng, jala angka i do na mangaramuni jolma. II.

²⁴Dung i borhat ma Ibana sian i laho tu luat Tirus, jadi dibongoti ma sada jabu; naeng ma unang tarboto i di rohana, alai ndang tarbahensa buni.

²⁵Ai ndang piga dan dibege sada inaina baritana; partondi na hodar do boruna, gabe ro ma ibana marsinggang tu jolona.

²⁶Parbegu do ina i, sian bangso Siroponisia, jadi dipangido ma tu Ibana, asa dipabali sibolis i sian boruna.

²⁷Alai ninna do mangalusi: Loas jolo bosur angka dakdanak; ai ndang tama buaton sipanganon ni angka dakdanak, laho mandabuhonsa tu jolo ni angka biang!

²⁸Alai ninna inaina i do mangalusi: I do nian, Tuhan; alai dohot do angka biang, na di toru ni meja i, mangallang na pinarpisikpisikkon ni angka dakdanak!

²⁹Gabe didok ma tu ina i: Ala ni hatami, laho ma ho; nunga ruar sibolis i sian borumi!

³⁰Laho ma tutu nasida muli, gabe jumpangsa ma boruna i modom di podomanna: Nunga ruar sibolis i. III.

³¹Dung i borhat ma Jesus muse sian luat Tirus, laho sian Sidon sahat tu tao Galilea, mamolus sian tongatonga ni luat Sisampuluhuta. [112†]

³²Jala diboan ma tu jolona sahalak na nengel huhut mangungu; dielehelek ma Ibana, asa diampehon tanganna tusi. [113†]

³³Jala diboan ma ibana tu na suhi, holang sian natorop i, dijullukhon ma jarijarina tu pinggol ni halak i, dung i marsitijur ma Ibana laho manjama dilana. [114†]

³⁴Laos manaili ma Ibana dompak ginjang, marhosa godang ma, dung i didok ma tu ibana: Hepata! Na mandok: Mungkap ma! [115†]

³⁵Jadi mungkap ma tutu parbinegeanna, harhar ma nang ihot ni dilana, gabe tingkos ma pangkulingna.

³⁶Jala dipopai ma nasida, unang dipaboaboa tu halak; alai lam diorai, lam gogo ma nasida mamaritahonsa. [116†]

³⁷Jadi longang situtu ma nasida, ninna ma: Nunga denggan saluhutna dibahen Ibana, gabe marbinege do angka na nengel, jala na mangungu gabe mangkatai dibahen. [117†]