Read Batak Toba MARKUS 8 Bible Online

MARKUS 8 - Batak Toba bible

MARKUS 8

¹I. [1] Marpungu ma uju i muse torop halak jala ndang adong panganonnasida gabe dijou Jesus ma angka siseanna, didok ma tu nasida:

²Maras do rohangku mida na torop on, ai nunga tolu ari diingani nasida Ahu, jala ndang adong balanjonasida.

³Anggo hupamuli nasida, so jolo mangan, handorusan nasida maon di tongandalan i; ai parhuta na dao do nasida deba!

⁴Jadi dialusi angka siseanna ma Ibana: Sian dia ma tarpatupa di halongonan on roti, sae pabosur nasida?

⁵Gabe disungkun ma nasida: Piga do roti di hamu? Jadi didok nasida ma: Pitu do!

⁶Dung i didokkon ma natorop i hundul tu tano. Ditiop Ibana ma roti na pitu i, didok ma mauliate, diponggoli ma, laos dipasahat ma tu angka siseanna, gabe diparlehon nasida ma tu natorop i. [118†]

⁷Laos adong do di nasida dengke otik, dipasupasu ma nang i, disuru ma nasida manaruhonsa.

⁸Gabe mangan ma nasida jadi bosur be do, laos dipapungu ma angka ponggolponggol ebaebanasida: Gok pitu ampang.

⁹Arga opat ribu do nasida; dung i dipamuli ma.

¹⁰Jadi manigor masuk tu parau ma Ibana raphon angka siseanna jala sahat ma Ibana tu luat Dalmanuta. II.

¹¹Jadi ro ma angka Parise, dipungka ma marsual dohot ibana; tanda sian ginjang do dipangido nasida, laho mangunjuni Ibana. [119†]

¹²Alai marhoi ma Ibana di bagasan tondina mandok: Boasa ma tanda pangidoon ni bangso on. Situtu do hatangkon tu hamu: Na so tupa lehonon tanda tu bangso on!

¹³Laos ditadingkon ma nasida, mangulahi ma Ibana bongot tu parau, laho taripar.

¹⁴Naung lupa do nasida mamboan balanjo; sada sambing nama roti di nasida na di parau i.

¹⁵Jala dipalumba ma nasida, ninna ma: Manat ma hamu jala jaga, pasiding na niasoman ni angka Parise, nang na di si Herodes pe. [120†]

¹⁶Gabe masipandohan ma nasida: Dibahen na so adong roti di hita hape!

¹⁷Jadi dung diboto Ibana i, ninna ma mandok nasida: Boasa dipanghatahatahon hamu, na soada roti di hamu? Laos so marbinoto dope hamu; laos so mangantusi hamu; laos pir do rohamu? [121†]

¹⁸Marmata do hamu so marnida; marpinggol do hamu, so marbinege, jala ndang marningot hamu? [122†]

¹⁹Di na husagihon na lima roti i tu na lima ribu i, gok piga ampang ebaeba dibuat hamu disi? Gabe didok nasida ma tu Ibana: Sampuludua! [123†]

²⁰Beha, uju na pitu i tu na opat ribu i, piga ampang ebaeba dibuat hamu ia disi? Jadi ninna nasida ma: Pitu! [124†]

²¹Jala didok ma tu nasida: Laos so mangarti dope hamu? III.

²²Dung i ro ma nasida tu Betsaida. Jadi diboan na mamboan ma sada halak na mapitung tu Ibana, dielehelek ma Ibana, asa dijama. [125†]

²³Gabe ditiop ma tangan ni na mapitung i, ditogihon ma tu balian ni huta i, ditijuri ma matana, diampehon ma tanganna tu ibana, disungkun ma: Nunga adong diida ho? [126†]

²⁴Jadi mamereng ma ibana, didok ma: Tarsongon bona ni hau do huida jolma na mardalan i.

²⁵Dung i diulakkon ma mangampehon tanganna tu matana jala tiur ma pamerengna, gabe malum ma: Torang do saluhutna diida.

²⁶Laos disuru ma ibana muli tu jabuna, didok ma: Unang bongoti huta i! [127†] IV.

²⁷Dung i borhat ma Jesus rap dohot siseanna i tu angka huta mardonokkon Kaesarea Pilippi; jala di tongandalan i disungkun ma angka siseanna i, ninna ma: Ise do Ahu, didok halak?

²⁸Jadi dialusi nasida ma Ibana: Si Johannes pandidi do didok halak; na deba mandok: Si Elia; na asing muse: Sahalak sian angka panurirang i do! [128†]

²⁹Dung i disungkun Ibana ma nasida: Ia hamu, ise ma Ahu didok hamu? Jadi dialusi si Petrus ma Ibana: Kristus i do Ho!

³⁰Gabe dipopai ma nasida, unang dipaboaboa Ibana tu halak. [129†] V.

³¹Jadi dipungka ma mangajari nasida: Ia anak ni jolma i ingkon godang do sitaononna, ingkon bolongkonon ni angka sintua dohot malim dohot sibotosurat do ibana, laos pusaonna do; dung i mulak mangolu do di ari patoluhon. [130†]

³²Patar do dipaboa hata i. Alai diarahon si Petrus ma Ibana, disolsoli ma Ibana.

³³Alai humusor ma anggo Ibana, dipanotnoti ma angka siseanna i, dipinsang ma si Petrus, ninna ma: Laho ma ne ho, bolis, sian lambungkon; ai ndang na diparrohahon ho na di Debata, angka na di jolma do. [131†]

³⁴Laos dijou ma natorop i rap dohot siseanna, didok ma tu nasida: Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu. [132†]

³⁵Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita na uli i, i do paluahonsa. [133†]

³⁶Ai aha ma antong gunana di jolma, nang liat portibi on diomo, anggo mago do hosana?

³⁷Ai aha do na tarlehon jolma bahen tobus ni hosana?

³⁸Asa molo adong na maila ala ni Ahu manang ala ni hatangki pe maradophon bangso pangalangkup jala pardosa on, laos maila do Anak ni jolma i sogot mangkatindangkon i, di na ro Ibana di bagasan hasangapon ni Amana rap dohot surusuruan angka na badia i. [134†]