Read Batak Toba MARKUS 9 Bible Online

MARKUS 9 - Batak Toba bible

MARKUS 9

¹Laos didok ma tu nasida: Na tutu do hatangkon tu hamu: Adong do deba sian angka na jongjong dison, na so tupa mangae hamatean, so jolo diida ro harajaon ni Debata marhagogoon! [135†] I.

²Dung i salpu onom ari diarahon Jesus ma si Petrus, Jakobus dohot Johannes, ditogihon ma nasida nangkok tu sada dolok na timbo, tu na suhi, holan nasida; gabe muba ma rupana diida nasida. [136†]

³Gabe marsillam ma angka ulosna, bontar sahali; na so dapot botoon ni panunsi di tano on mambahen bontar songon i. [137†]

⁴Dung i diida nasida ma si Elia rap dohot si Musa; na mangkatai do nasida dohot Jesus.

⁵Jadi didok si Petrus na mangkuling i Jesus: Guru, dengganna i dison! Hupauli hami ma dison soposopo tolu: Sada di Ho, sada di si Musa, sada di si Elia!

⁶Ai ndang diboto na nidokna i, ai tung hatahutan situtu do nasida.

⁷Jala ro ma ombun sada mangalinggomi nasida, laos mangkuling ma soara sian bagasan ombun i, didok ma: On do Anak haholonganku, tangihon hamu ma Ibana! [138†]

⁸Alai di na manaili nasida, ndang agia ise be diida; sasada Jesus do angkupnasida.

⁹Jadi laho tuat sian dolok i, dipopai ma nasida, unang dipajojor na niidanasida i tu halak, ia so jolo hehe Anak ni jolma i sian na mate. [139†]

¹⁰Digolom nasida do hata i, gabe masisungkunan ma nasida: Na mandok beha do on: Hehe sian na mate?

¹¹Jadi disungkun nasida ma Ibana: Didok angka sibotosurat do, ingkon jumolo ro si Elia?

¹²Gabe didok ma tu nasida: Ro do tutu si Elia jumolo pajongjongkon saluhutna; alai beha do na tarsurat taringot tu Anak ni jolma i, paboa ingkon lan do sitaononna jala doshon na soada rajuman Ibana? [140†]

¹³Alai hudok ma tu hamu: Naung ro do si Elia, jadi roharohanasida do dibahen tu ibana, songon naung tarsurat hian taringot tu ibana. [141†] II.

¹⁴Laho mandapothon angka sisean i, diida nasida ma torop halak humaliang nasida dohot angka sibotosurat na masisungkunan dohot nasida.

¹⁵Jadi pintor longang situtu ma sude natorop i marnida Ibana, marlojong be do nasida mandapothon Ibana laho mangkormat.

¹⁶Dung i disungkun ma nasida: Aha do sinungkunhonmuna tu nasida on?

¹⁷Gabe ro ma sahalak sian natorop i mangalusi: O Guru, tu Ho hian do huboan anakkon; partondi na ngungu do ibana.

¹⁸Jadi disi ditangkup ibana, dipasaratsarat do, gabe margumogumo jala patungoripon, laos gonggong. Nunga hudokkon angka siseanmi pabalihon ibana; alai ndang margogo nasida.

¹⁹Alai ninna ma mangalusi nasida: E hamu, bangso na so porsea! Sadia leleng nari Ahu rap dohot hamu? Sadia leleng nari paanjuanjuonku hamu? Tu Ahu ma boan hamu ibana!

²⁰Jadi diboan nasida ma ibana. Disi diida tondi i Jesus, mamintor dipapuhung ma anak i, laos tinggang, margallogallo jala margumogumo.

²¹Disungkun Jesus ma amana i: Nunga sadia leleng songgop on tu ibana? Jadi didok ma: Sian sietehetehonna dope!

²²Jala jotjot do ibana ditinggangkon tu api dohot tu aek, mamusa ibana nian. Alai ia adong gogom, urupi hami; asi ma roham di hami!

²³Jadi dialusi Jesus ma ibana: Ia taringot tu gogo: Na marhagogoon do na porsea i patupahon saluhutna! [142†]

²⁴Dung i pintor dipagogo ama ni anak i ma soarana, dijouhon ma: Na porsea do ahu! Urupi ahu na hurang porsea on!

²⁵Alai naung lam rongom natorop i diida Jesus, disonggahi ma tondi na hodar i, didok ma tu ibana: Ho, tondi na ngungu jala na pojam! Ahu mandokkon ho ruar sian jolma on, jala ndang jadi bongotanmu be ibana!

²⁶Gabe mangangguhi ma i, huhut gogo ma ibana disaratsarat, laos ruar ma, jala songon na mate do anak i, pola lan do mandok: Nunga tos hosana. [143†]

²⁷Alai ditangkup Jesus ma tanganna, laho pahehehonsa, gabe jongjong ma.

²⁸Jadi dung muli Jesus, disungkun angka siseanna ma Ibana pulik: Boasa so tarpabali hami ibana?

²⁹Jadi didok ma tu nasida: Holan marhite sian tangiang dohot parpuasaon do tarpabali tondi na saragam on! III.

³⁰Dung i borhat ma nasida sian i, didalani nasida ma tano Galilea; alai ndang jadi botoon ni halak Ibana di rohana.

³¹Ai dipodai do angka siseanna, didok ma tu nasida: Sipasahaton ma Anak ni jolma i tu tangan ni halak, jala pusaonna ma Ibana; alai dung dipamate, hehe do Ibana di ari patoluhon! [144†]

³²Alai ndang na diantusi nasida hata i jala tanggak do rohanasida manungkun Ibana. [145†] IV.

³³Dung i sahat ma nasida tu huta Kapernaum; jadi dung ro di tongajabu Ibana, disungkun ma nasida: Aha do na hinataanmuna di tongandalan i? [146†]

³⁴Alai mangkohom do nasida; ai dihatai do di dalan i, manang ise nasida na sumurung.

³⁵Laos hundul ma Ibana, dijou ma na sampuludua i, didok ma tu nasida: Ia i na naeng gabe parjolo di rohana, dibahen ma ibana parpudi jala naposo ni saluhut donganna. [147†]

³⁶Dung i dibuat ma dakdanak sada, dipajongjong ma tu tongatonganasida, dihaol ma jala didok ma tu nasida: [148†]

³⁷Na manjangkon dakdanak sada sisongon on marhitehite Goarhu, Ahu do na jinangkonna disi! Jala na manjangkon Ahu, ndada Ahu na jinangkonna i, na marsuru Ahu do. [149†]

³⁸Jadi dipanghulingi si Johannes ma Ibana: Guru, huida hami do sahalak na pabalihon angka sibolis marhitehite Goarmu; ndang olo ibana mangihuthon hita jadi hurarang hami do ibana, ala so hita diihuthon. [150†]

³⁹Alai didok Jesus ma: Ndang oraanmuna Ibana nian! Ai ndang tagamon insahan ni halak Ahu, dung jolo diulahon hagogoon marhitehite Goarhu.

⁴⁰Ai pandongani do di hita, na so mangalo hita. [151†]

⁴¹Ai na sintong do hatangkon tu hamu: Na painumhon aek santahu tu hamu di bagasan Goarhu, ala Kristus nampuna hamu; ndang na mago upa ni i! [152†]

⁴²Alai na manggasipi sada sian na metmet on, angka na porsea di Ahu, dengganan ma ginantungkon losung batu tu rungkungna, laho mangalonongkon ibana tu laut. [153†]

⁴³Jala molo digasipi tanganmi ho, gotap! Ai dengganan, telpang ho bongot tu hangoluan, unang mardua tangan ho marobur tu na roko, tu api na so ra mintop, [154†]

⁴⁴di na so ra mate gulokna, di na so mintop apina. [155†]

⁴⁵Asa molo digasipi patmi ho, gotap! Ai dengganan, telpang ho bongot tu hangoluan, unang mardua pat ho didanggurhon tu na roko,

⁴⁶di na so ra mate gulokna, di na so mintop apina.

⁴⁷Jala molo digasipi matami ho, pulsikkon! Ai dengganan, marmata sambariba ho bongot tu harajaon ni Debata, unang mardua mata ho dibolongkon tu na roko, [156†]

⁴⁸di na so ra mate gulokna, di na so mintop apina.

⁴⁹Ai ingkon siraan do ganup di bagasan api.

⁵⁰Na marguna do sira i. Alai molo tung hambar sira i, aha ma bahenon paansimhonsa? Sai marsira ma hamu huhut mardame sama hamu! [157†]