Read Batak Toba LUKAS 1 Bible Online

LUKAS 1 - Batak Toba bible

LUKAS 1

¹I. [1] Nunga na nia nian manguji manurathon jojor barita ni naung tangkas masa di tongatonganami,

²mangihuthon pamaritahon ni angka sitindangi sian mulana i tu hami, i ma angka naung gabe parhalado di hata i.

³Jadi dohot ma ahu pasadahon rohangku manurathonsa jojorjojor di ho, ale Teopilus na pinarsangapan, dung jolo hupamanat sude sian mulana i, [1†]

⁴asa ditanda ho hasintongan ni hata, naung dipodahon tu ho. II.

⁵Uju Herodes raja di tano Judea, adong ma sada malim na margoar Sakarias na sian horong ni si Abia; boru Aron do dongan saripena, si Elisabet do goarna. [2†]

⁶Bonar do nasida duansa maradophon Debata, diparangehon do nasa patik dohot aturan ni Tuhan i, so hasurahan.

⁷Ndang adong anakkonnasida, ai na hol do si Elisabet; jala nunga ganjang umurnasida be.

⁸Jala jumpang ma di anggap ni horongna i mangulahon hamalimon ibana di adopan ni Debata.

⁹Mangihuthon na hinasomalhon ni malim marsijomput na sinurat nasida, gabe ibana ma mambongoti joro ni Tuhan i manutung daupa. [3†]

¹⁰Di ruar do anggo halak natorop sudena martangiang di tingki manutung daupa i.

¹¹Gabe diida ibana ma surusuruan ni Tuhan i, jongjong di siamun ni langgatan pardaupaan i.

¹²Tarsonggot ma si Sakarias marnidasa jala laos hatahutan ma.

¹³Didok surusuruan i ma tu ibana: Unang ho mabiar, Sakarias; ai nunga ditangihon pangidoanmi: Tubuhonon di donganmu saripe ma anak di ho; si Johannes ma bahenonmu goarna.

¹⁴Marlas ni roha jala mariaia ma ho, jala torop do mangkalashon hatotopakna i.

¹⁵Ai balga ma ibana di adopan ni Tuhan i; na so tupa inumonna tuak anggur ro di nasa siinumon na pang, jala gok Tondi Parbadia ma ibana sian bortian dope. [4†]

¹⁶Torop ma anak Israel pasuangonna tu Tuhan Debatanasida.

¹⁷Patujolona ma ibana di bagasan tondi dohot hagogoon ni si Elia, pasuangonna ma roha ni angka ama tu anakkonna jala angka na tois marroha gabe parroha na bonar, laho padirihon di Tuhan i bangso naung ture. [5†]

¹⁸Gabe didok si Sakarias ma tu surusuruan i: Sian dia ma tandaonku i? Ai ahu nunga matua, dongan saripengku pe nunga ganjang umurna. [6†]

¹⁹Dialusi surusuruan i ma ibana: Gabariel do ahu, na jongjong di jolo ni Debata; disuru do ahu mangkatai dohot ho, mamboan barita las ni roha on tu ho. [7†]

²⁰Alai gabe ngungu ma ho, ndang botoonmu mangkuling sahat ro di ari hamamasana, ala so dihaporseai ho hatangki, na naeng tulus di tingkina i.

²¹Ia natorop i, sai maimaima do di si Sakarias; longang do rohanasida, ala songon i gele ibana di joro i.

²²Jadi laho ruar, ndang diboto mamangkulingi nasida, gabe manganto ma nasida, naung adong niidana di joro i. Mangkilapi nama ibana tu nasida, laos tong ngungu.

²³Asa dung sae tingkina marhalado, mulak ma ibana tu jabuna.

²⁴Ndang piga ari nari gabegabean ma si Elisabet, dongan saripena i, jadi martabunitabuni ma ibana lima bulan lelengna.

²⁵Ninna ma: Pambahen ni Tuhan i do i di ahu di tingki on, ai lomo do rohana mambuat haurahonki di jolo ni halak. [8†] III.

²⁶Salpu onom bulan disuru Debata ma pardisurgo Gabariel tu Nasaret, i ma sada huta di luat Galilea,

²⁷manopot sada anak boru, oroan ni sada baoa na margoar Josep, na sian pomparan ni si Daud; si Maria do goarna. [9†]

²⁸Laho mamasuhi jabuna i, ninna ma: Tabi di ho, na niasian! Didongani Tuhan i ma ho!

²⁹Alai tarsongot do nasida umbege hata i, ninna rohana do, parsantabian dia do i ulaning?

³⁰Jala didok surusuruan i ma tu nasida: Unang ho mabiar, ale Maria; ai dapotan asi ni roha do ho di Debata!

³¹Gabegabean ma ho, tubuan anak ma ho; Jesus ma bahenonmu Goarna! [10†]

³²Balga ma Ibana muse, goaron do Ibana Anak ni Natumimbul i; lehonon ni Tuhan Debata do tu Ibana habangsa ni si Daud, amana i. [11†]

³³Rajaanna do pomparan ni si Jakkob salelenglelengna, jala ndang marhaujungan harajaonna i.

³⁴Didok si Maria ma mandok surusuruan i: Songon dia ma pangalaho ni i, ai so adong hutanda baoa.

³⁵Jadi dialusi surusuruan i ma nasida: Songgopan ni Tondi Parbadia ma ho jala linggoman ni hagogoon ni Natumimbul i do ho; ala ni i na badia do dohonon na tubu i, Anak ni Debata. [12†]

³⁶Ia si Elisabet, sisolhotmi na sai tua i, naung digoar na hol, marhangoluan anak do; paonombulanhon ma nuaeng.

³⁷Ai ndang adong na so tarpatupa Debata. [13†]

³⁸Gabe didok si Maria ma: Naposo ni Tuhan i do ahu. Sai saut ma tu ahu songon na nidokmi! Dung i ditadingkon surusuruan i ma nasida. IV.

³⁹Di tingki i ma borhat si Maria dipahatop ma laho tu dolok, tu huta Juda.

⁴⁰Bagas ni si Sakarias do dibongoti, ditabi ma si Elisabet.

⁴¹Umbege tabi ni si Maria i si Elisabet manggunjal ma posoposo di bagasan bortianna, jadi gok Tondi Parbadia ma si Elisabet. [14†]

⁴²Laos marsoara na gogo ma ibana, dijouhon ma: Dapotan pasupasu do ho di tongatonga ni angka ina; dapotan pasupasu do na pinarorotmi!

⁴³Marhua ma pola ro ina ni Tuhanki manopot ahu on!

⁴⁴Ai disi dapot pinggolhu soara ni tabimi, manggunjal do posoposo i di siubeonku, sian las ni rohana.

⁴⁵Martua ma ho, ala dihaporseai ho, ingkon tulus na tinonahon ni Tuhan i tu ho! [15†]

⁴⁶Gabe didok si Maria ma: Dipatimbul rohangku do Tuhan i. [16†]

⁴⁷Mariaia do tondingku mida Debata, Sipalua ahu.

⁴⁸Ai ditatap do haetehon ni naposona on. Parhatuaon ma ahu olat ni on marsundutsundut. [17†]

⁴⁹Ai habalgaon do dibahen Pargogo i tu ahu. Na badia do Goarna i.

⁵⁰Ai marsundutsundut do asi ni rohana mida angka na mangkabiari Ibana. [18†]

⁵¹Hagogoon do diula tanganna i, dipanserakkon do angka na ginjang marroha. [19†]

⁵²Angka na gogo i dipaijur do sian habangsanasida, dipabangkit do angka na metmet. [20†]

⁵³Na denggan dipasuksuk Ibana tu angka na male, jala angka na lobian hian rumar do dipalaho. [21†]

⁵⁴Dipainuinu do Israel naposona i, marningot asi ni rohana i,

⁵⁵mangihuthon bagabagana na tu angka ompunta, tu si Abraham dohot tu pomparanna salelenglelengna. [22†]

⁵⁶Laos mian ma si Maria i disi arga tolu bulan jala mulak muse tu jabuna i. V.

⁵⁷Jadi gok ma tingki ni hangoluan ni si Elisabet; anak ma ditubuhon.

⁵⁸Marlas ni roha ma rap dohot ibana angka hombar bagasna dohot sisolhotna, umbege naung marasi ni roha godang Tuhan i di ibana.

⁵⁹Di ari paualuhon i ro ma nasida, laho manunat posoposo i; jala dibahen ma goarna Sakarias, mangihuthon goar ni amana. [23†]

⁶⁰Alai mangkuling ma inana i, didok ma: Nda tung; si Johannes do goarna bahenon! [24†]

⁶¹Gabe didok nasida ma mangalusi ibana: So adong agia ise di angka sisolhotmi na margoar songon i!

⁶²Dihilapi nasida ma amana, manang ise goarna bahenon dipangido rohana.

⁶³Gabe dipangido ibana ma panuratan, disurathon ma: Si Johannes do goarna! Jadi tarhalomong ma nasida sude.

⁶⁴Alai di na satongkin i mungkap ma pamanganna, sumuang ma pangkataionna, marsoara ma ibana mamudii Debata.

⁶⁵Gabe hatahutan ma sude hombar hundulnasida, jala di sandok dolok Judea dipanghatahatahon do sasude na masa i.

⁶⁶Jala saluhut na umbegesa, diparateatehon be do barita i, ninna ma: Na gabe aha ma ulaning dakdanak on? Ai tung didongani tangan ni Tuhan i do ibana. VI.

⁶⁷Gok Tondi Parbadia ma si Sakarias, amana i, gabe manurirangi ma:

⁶⁸Pinuji ma Tuhan i, Debata ni Israel, ala ditopot bangsona jala dipatupa haluaonna. [25†]

⁶⁹Dipatindang do di hita tanduk haluaon, di bagas ni si Daud naposona i, [26†]

⁷⁰hombar tu na hinatahonna marhite sian soara ni angka panurirangna na badia i sian na robi:

⁷¹Haluaon sian angka musunta dohot sian tangan ni angka na mangkosomi hita,

⁷²laho mangasii angka amanta marningot padanna na badia i, [27†]

⁷³i ma uarina na niuarihonna di si Abraham amanta i, [28†]

⁷⁴paboa lehononna tu hita, asa hita marhalado di adopanna i, so pola marhabiaran be, dung malua hita sian tangan ni angka musu, [29†]

⁷⁵marhabadiaon jala marhatigoran di adopanna i, saleleng hita mangolu.

⁷⁶Ia ho, anaha, targoar ma panurirang ni Natumimbul, ai patujolo ni Bohi ni Tuhan i do ho, paturehon angka dalanna, [30†]

⁷⁷laho patandahon tu bangsona haluaon marhite sian hasesaan ni dosanasida, [31†]

⁷⁸hinorhon ni pangasii ni Debatanta; ai binahen ni i do ro na binsar sian ginjang i manopot hita, [32†]

⁷⁹laho sumondangi angka na hundul di bagasan haholomon, angka na nilinggoman ni hamatean, patongonhon langkanta tu dalan hadameon. [33†]

⁸⁰Ianggo dakdanak i, lam magodang do, lam togu marroha jala di halongonan do mian, paima papataronna dirina tu bangso Israel. [34†]