Read Batak Toba LUKAS 10 Bible Online

LUKAS 10 - Batak Toba bible

LUKAS 10

¹I. [1] Dung i dipillit Jesus dope pitupulu halak nari, jala duadua do nasida disuru patujolona tu sude huta dohot inganan, sitopotonna i muse. [149†]

²Ninna ma mandok nasida: Bidang do nian sisabion, alai otik do anggo pangula. Onpe, elehelek hamu ma Nampuna sisabion i, anggiat dipaborhat angka pangula tu sisabionna i. [150†]

³Laho ma hamu! Hira birubiru do hamu husuru tu tongatonga ni angka babiat.

⁴Unang boan hamu handehande manang hajut, manang sipatu pe; unang tabi hamu halak di tongandalan! [151†]

⁵Laho mambongoti jabu, jumolo ma dok hamu: Dame ma di hamu na sabagas on!

⁶Jala molo adong disi anak hadameon, songgop ma damemuna tu ibana; alai molo soada, mulak ma i tu hamu.

⁷Di jabu i ma hamu mian; mangan jala inum hamu ma sian na adong di nasida, ai tama do marupa pangula; unang laholaho hamu sian jabu na sada tu na sada. [152†]

⁸Anggo dibongoti hamu huta jala dijangkon do hamu, pangan hamu ma na nilehonnasida tu hamu.

⁹Pamalum hamu ma angka na hansitan na disini; dok hamu ma tu nasida: Nunga sahat harajaon ni Debata tu hamu!

¹⁰Alai anggo dibongoti hamu huta, gabe ndang dijangkon nasida hamu, ruar ma hamu tu partungkoan; dok hamu ma tu nasida:

¹¹Nang orbuk sian hutamuna on, na lohot di totnami, huapusi hami mulak tu hamu; asal diboto hamu, naung ro harajaon ni Debata.

¹²Hudok ma di hamu: Neang do sitaonon ni pangisi ni huta Sodom di ari sogot, martimbangkon sitaonon ni huta sisongon i.

¹³Marjea ma ho, Korasin! Marjea ma ho, Betsaida! Ai aut di huta Tirus dohot di Sidon dipamasa hagogoon angka naung masa di hamu, tibu ma paubaonnasida rohanasida, marabithon goni, hundul di orbuk. [153†]

¹⁴Asa neang do sitaonon ni pangisi ni huta Tirus dohot Sidon di ari uhum i, martimbangkon sitaononmuna.

¹⁵Jala ho Kapernaum, nda na pinatimbo ho ro di langit an? Sidabuhononhon do ho sahat tu banua toru!

¹⁶Na tumangihon hamu, Ahu do tinangihonna, jala na manulak hamu, Ahu do tinulakna; alai na manulak Ahu, na marsuru Ahu do tinulakna disi. [154†] II.

¹⁷Mardongan las ni roha do mulak na pitupulu i mandok: Tuhan, guru doknami do nang tondi na jahat i, marhitehite Goarmu!

¹⁸Alai ninna ma mandok nasida: Huida do sibolis i madabu sian ginjang songon porhas. [155†]

¹⁹Nunga hupasahat tu hamu huaso mandegei angka ulok dohot hala dohot mangalo nasa hagogoon ni musu i; na so tupa hahuaonna hamu. [156†]

²⁰Alai ndang pola las rohamuna, ala naung guru dokmu angka tondi i. On ma tahe halashon hamu: Naung tarsurat goarmuna di banua ginjang i! [157†]

²¹Laos di tingki i ma marolopolop Ibana di bagasan Tondi Parbadia, mandok: Hupuji Ho, Amang, Tuhan Sigomgom banua ginjang dohot tano on, ala ditamondingkon Ho i sian jolo ni angka na pistar dohot na marroha, gabe dipapatar Ho i tu angka siondihononhon. Olo, Amang, i do dihalomohon roham hian!

²²Saluhutna i, nunga dipasahat Damang tu Ahu; jala ndang adong na tumanda Anak i, dungkon ni Ama i; Ama i pe, ndang adong na tumanda i, ia so holan Anak i, angkup ni na pinodaan ni Anak i mangihuthon lomo ni rohana.

²³Dung i didompakkon ma pulik angka siseanna, mandok: Martua ma angka mata na marnida na niidamuna; [158†]

²⁴Ai hudok ma di hamu: Torop do angka panurirang dohot raja masihol: Naeng idaonna nian naung niidamuna, hape ndang diida; jala naeng begeonna, naung binegemuna, hape ndang dibege. [159†] III.

²⁵Dung i hehe ma sada sibotopatik mangunjuni Ibana, ninna ma: Guru, dia do sibahenonku, asa hutean muse hangoluan na salelenglelengna? [160†]

²⁶Gabe ninna Jesus ma mandok ibana: Aha do tarsurat di patik i? Beha do dijaha ho?

²⁷Jadi dialusi ma songon on: Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim! [161†]

²⁸Dung i ninna ma mandok ibana: Tingkos do alusmi; ulahon ma i, gabe mangolu ma ho! [162†]

²⁹Alai naeng ma pintoranna dirina gabe ninna ma mandok Jesus: Ai ise do donganku goaron?

³⁰Jadi mangalusi ma Jesus, ninna ma: Adong ma sada halak, na tuat sian huta Jerusalem laho tu huta Jeriko, gabe disamun panamun; dipupusi ibana, dipukpuhi, dung i laho; matemate ne do ibana ditadingkon.

³¹Tongon ma mamolus malim sada sian dalan i; diida do ibana, alai dilaosi.

³²Songon i do sahat sahalak Lepi tu inganan i; diida do ibana, alai dlaosi.

³³Alai mamolus ma sian i sahalak Samaria; jala asi do rohana marnidasa.

³⁴Didapothon ma, dipauli ma bugangna, didaishon ma miak dohot anggur tusi; dipahundul ma ibana tu hodana, diboan ma ibana tu parbornginan, laos dipasarisari ma ibana.

³⁵Torang ni arina i dirungkari ma rupia dua, dilehon ma i tu nampuna bagas i, ninna ma: Pauliuli ma ibana; jala molo tung lobi harugianmu, husingkat pe, laho mulak sian on.

³⁶Ise sian na tolu i di roham, gabe dongan ni na tardobo i?

³⁷Jadi didok ma: Na marasi ni roha di ibana. Gabe ninna Jesus ma mandok ibana: Laho ma ho, bahen ma songon i! IV.

³⁸Jala di na mardalani nasida, dibongoti ma sada huta. Adong ma disi parompuan sahalak, na margoar si Marta, na manjangkon Ibana tu jabuna. [163†]

³⁹Ianggo anggina na margoar si Maria, hundulhundul do di jolo ni Tuhan i tumangihon hatana.

⁴⁰Diharonsothon si Marta do ragam ni parhobason. Laos dipajonok ma mandok: Tuhan, ndang diantoi roham, na pinasombu ni anggingki ahu marhobasi sahalakku? Dokkon ibana antong mandongani ahu!

⁴¹Gabe ninna Tuhan i mangalusi ibana: O Marta, Marta! Lan do disarihon jala dihasusahon ho!

⁴²Sada do na ringkot! Dipillit si Maria do tohap na uli i; ndang sibuaton i sian ibana. [164†]