Read Batak Toba LUKAS 11 Bible Online

LUKAS 11 - Batak Toba bible

LUKAS 11

¹I. [1] Uju martangiang Ibana di sada inganan, jala dung mansohot, ninna sahalak siseanna ma mandok Ibana: Tuhan, ajari hami martangiang, songon na binahen ni si Johannes tu angka siseanna.

²Gabe didok ma tu nasida: Songon on ma dok hamu laho martangiang: Ale Amanami, sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on, songon na di banua ginjang!

³Lehon ma tu hami sadari on hangoluan siap ari!

⁴Sesa ma dosanami, songon panesanami di dosa ni nasa na mardosa tu hami; jala unang hami togihon tu pangunjunan! Palua ma hami sian pangago!

⁵Laos ninna ma mandok nasida: Ise hamu na maraleale, gabe ditopot ma i mareak tongaborngin, mandok tu ibana: Ua, pasali ahu tolu roti!

⁶Ai ro do alealengku sian pardalananna, jala ndang adong sipanganon lehononku tu ibana.

⁷Gabe dialusi halak i ma sian bagasan, mandok: Unang ahu susai! Nunga sordak pintu, jala nunga modom angka anakkonku rap dohot ahu; ndang tarbahen ahu hehe mangalehon di ho.

⁸Hudok ma di hamu: Nang so hehe halak i mangalehon, ala naung maraleale nasida, ndang tarbahensa so hehe mangalehon nasa na ringkot di ibana ala ni jugulna i mangido. [165†]

⁹Ahu pe, hudok ma tu hamu: Pangido hamu ma, sai na lehonon do tu hamu; lului hamu ma, sai na jumpangan do hamu; tuktuhi hamu ma, sai na ungkapon do di hamu!

¹⁰Ai sai na manjalo do nasa na mangido; sai na jumpangan do na mangalului jala sai na ungkapon do di na manuktuhi.

¹¹Ise sian hamu angka amaama, anggo dipangido anakna roti tu ibana, gabe dilehon batu tusi, manang dengke dipangido, gabe ulok dilehon?

¹²Manang dipangido tinaru ni manuk, gabe dilehon hala tusi?

¹³Gari hamu, angka na jahat i, umboto mangalehon na denggan tu angka anakkonmuna, lam so lehonon ni Ama i sian banua ginjang Tondi Parbadia tu angka na mangido I sian Ibana? II.

¹⁴Dung i dipabali ma sada tondi na mambahen ngungu; alai dung bali tondi i, mangkuling ma na ngungu i, gabe longang ma natorop i.

¹⁵Alai deba sian nasida mandok: Marhitehite Beelsebul, induk ni angka tondi i, dipabali Ibana angka tondi na jahat i.

¹⁶Alai anggo na asing mangunjuni Ibana, mangido tanda sian ginjang. [166†]

¹⁷Alai ala ditanda Ibana angka pingkirannasida, gabe didok ma tu nasida: Pesan do nasa harajaon na marsalisi sama dirina jala masitinggangan ma angka jabuna.

¹⁸Jala molo marsalisi sibolis i sama dirina, tung tarbahen ma hot harajaonna i? Ala didok hamu, na hupabali angka tondi i marhitehite Beelsebul.

¹⁹Alai molo tung Ahu pabalihon angka sibolis mangasahon Beelsebul, ise ma dipangasahon angka anakmuna, laho pabalihonsa? Onpe, nasida do manguhumi hamu disi!

²⁰Alai molo hupabali angka tondi na hodar marhitehite tangan ni Debata, naung songgop ma harajaon ni Debata tu hamu. [167†]

²¹Anggo dijagai ulubalang na gopas marsinjata jabuna, sinok ma ugasanna.

²²Alai molo ditahopi na gumogo i ibana jala ditaluhon, buaton ni i ma sandok sinjatana na pinangasahonna i, jala sagihononna ma tabantabanna i. [168†]

²³Na so mandongani Ahu, alongku ma i; na so donganku papunguhon, na paserakkon do i! [169†]

²⁴Ia dung ruar tondi na hodar i sian jolma, didalani ma angka inganan na hasang, mangalului paradianan; jala anggo so jumpangsa i, ninna ma: Mulak nama ahu tu ingananku naung hutadingkon i!

²⁵Jadi di na ro ibana, naung sinapu jala pinalehet didapot.

²⁶Jadi laho ma ibana, ditogihon ma pitu tondi angka na jumahat sian ibana, dibongoti ma laho maringanan tusi, gabe jumahat ma pangalaho ni jolma i di ujungna sian na di mulana i. [170†]

²⁷Di na mangkatahon hata i Ibana, dipagogo sada parompuan sian tongatonga ni natorop i ma soarana, ninna ma mandok Ibana: Martua ma na tumubuhon jala na pabagot Ho! [171†]

²⁸Alai ninna Ibana ma: Martua ma angka na umbege hata ni Debata jala na umpeopsa! [172†] III.

²⁹Jadi lam marpungu ma angka natorop i, gabe marjamita ma Ibana: Na jahat do na sansundut on; tanda do dipangido, jala ndang lehonon tanda tu nasida, dungkon ni tanda ni si Jonas.

³⁰Ai songon si Jonas gabe tanda di pangisi ni huta Ninive, songon i ma Anak ni jolma i di na sansundut on.

³¹Na hehe ma sogot di paruhuman i raja boruboru na sian dangsina i dompak halak na sansundut on, mangkonahon uhum tusi; ai sian suhi ni tano ibana ro, umbege habisuhon ni si Salomo. Ida ma, On do na sumurung sian si Salomo! [173†]

³²Na hehe ma sogot di paruhuman i halak Ninive dompak na sansundut on, mangkonahon uhum tusi, ai dipauba nasida do rohanasida umbege jamita ni si Jonas i. Ida ma, On do na sumurung sian si Jonas! [174†]

³³Ndang adong na mambahen palito na pinasangna i tu inganan, na buni, manang tu toru ni ampang; tu parpalitoan i do dibahen, asa diida na ro i sondangna i. [175†]

³⁴Palito ni daging do mata i. Molo hisar matam, tiur ma sandok dagingmu; alai molo roa, mangkolom ma nang dagingmi.

³⁵Ipe, jaga ma ho, so tung mangkolom sondang na di bagasan ho!

³⁶Asa molo tiur sandok dagingmi, soada na holom disi, tiur ma sasude, songon naung pinatiur sondang ni sillam ma ho!

³⁷Andorang dihatahon dope i, diarahon sada halak Parise ma Ibana mangan; jala bongot ma Ibana, laos hundul ma. [176†]

³⁸Alai longang ma Parise i, ala diida, na so jolo marburi Ibana laho marsipanganon. [177†]

³⁹Jadi didok Tuhan i ma tu ibana: Anggo hamu Parise, duru ni panginuman dohot mangkuk dipaias hamu; alai ia parbagasanmuna gok pandoboon dohot hajahaton do.

⁴⁰E hamu na hurang roha! Sitompa duruna, nda laos i do na manompa bagasanna?

⁴¹Asal ma dibasabasahon hamu na di bagasanna bahen asiasi, sandok ias ma na di hamu!

⁴²Marjea ma hamu Parise, ai diparsampulu hamu do angka suansuanan na ummetmet, ro di ragamragaman ni simarata; alai dilaosi hamu do uhum dohot holong ni roha ni Debata. Siulaon do na sada on; alai unang ma tading na sada an!

⁴³Marjea ma hamu Parise, ai ringkot do rohamuna mangkunduli bangku jolojolo di angka parguruan, jala asa ditabi jolma i hamu di tonga onan. [178†]

⁴⁴Marjea ma hamu, ai suman do hamu tu tanoman na so tanda, gabe didege halak tusi, so sian pamotoanna.

⁴⁵Jadi ro ma alus ni sahalak sibotopatik, didok ma tu Ibana: Dohot do hami direhei Ho di hatam ondeng.

⁴⁶Gabe didok Ibana ma: Marjea nang hamu sibotopatik, ai diampehon hamu do tu angka jolma i boban na so tarboan; alai ndang olo anggo hamu manjama porsanon i, nanggo dohot sada jarijarimuna!

⁴⁷Marjea ma hamu, ai dipauli hamu do tanoman ni angka panurirang, hape amamuna do, pamatehon nasida.

⁴⁸Asa sitindangi jala panolopi do hamu di pambahenan ni amamuna, ai nasida do mambunusa, gabe hamu do paulihon.

⁴⁹Ala ni i didok Hapistaran ni Debata: Suruonku ma tu nasida angka panurirang dohot apostel; bunuon jala leleannasida do deba sian i.

⁵⁰Asa luluhononhon ma tu na sansundut on mudar ni sude panurirang, naung durus i olat ni parmulaan ni tano on,

⁵¹mamungka sian mudar ni si Abel ro di mudar ni si Sakarias, na tarbunu di holangholang ni langgatan dohot joro i. Olo tutu, hudok ma tu hamu, luluhononhon ma i tu na sansundut on!

⁵²Marjea ma hamu sibotopatik, ai dirampas hamu do anak hinsu parbinotoan; hamu sandiri ndang bongot, jala angka na naeng bongot, diambati hamu.

⁵³Asa di na ruar Ibana sian i, dionggopi angka sibotosurat dohot Parise ma Ibana, jala ragam do disungkunhon tu Ibana.

⁵⁴Dihaliangi nasida Ibana, anggiat tardapot Ibana binahen ni sada hatana. [179†]