Read Batak Toba LUKAS 12 Bible Online

LUKAS 12 - Batak Toba bible

LUKAS 12

¹I. [1] Marrongoman ma ro natorop i marriburibu, pola masidegean nasida, gabe didok Ibana ma parjolo, tu siseanna: Jaga ma hamu pasiding na niasoman na di angka Parise, i ma pangansion i. [180†]

²Ndang adong na hungkup, na so ungkap muse, manang na buni, na so dapot botoon muse. [181†]

³Dibahen i nasa na hinatahonmuna di na holom, begeon do i muse di na tiur; na hinusiphonmuna tu pinggol di bilut, baritahononhon do muse di angka partungkoan.

⁴Alai hudok ma tu hamu angka alealengku: Unang ma habiari hamu angka na mambunu daging jala dungkon ni i so adong be sihahuaonna.

⁵Alai hupatuduhon ma tu hamu na patut habiaranmuna: Habiari hamu ma ibana, na marhuaso mambunu huhut mandabuhon tu api na roko. Olo, hudok ma tu hamu: Ibana ma habiari hamu!

⁶Nda digadis lima amporik arga dua benggol; agia sada sisongon i, ndang na lupa sian adopan ni Debata.

⁷Gari obuk na di ulumuna, sude do dibilangi. Unang hamu tahutan! Ummangat do hamu sian amporik torop. [182†]

⁸Hudok ma di hamu: Ganup na mangkatindangkon Ahu di jolo ni jolma, hatindangkonon ni Anak ni jolma i do sogot di adopan ni angka surusuruan ni Debata.

⁹Alai na mansoadahon Ahu di jolo ni jolma, soadahononhon do sogot di adopan ni angka surusuruan ni Debata. [183†]

¹⁰Jala ganup na mandok hatana mangalo Anak ni jolma i, tarsesa do i; alai na mangaleai Tondi Parbadia, ndang dapotan hasesaan. [184†]

¹¹Alai molo togihononnasida hamu tu angka parguruan, tu jolo ni angka induk dohot panggomgomi, unang ma holsoan hamu, manang beha pangalusionmuna ro di sidohononmuna. [185†]

¹²Ai ajarhonon ni Tondi Parbadia i do tu hamu di na sangombas i na patut dohononmuna.

¹³Jadi adong ma sahalak sian natorop i na mandok tu Ibana: Guru, dokkon ma amparangku marbagi teanteanannami rap dohot ahu!

¹⁴Alai didok ma tu ibana: Baoa! Ise do pabangkit Ahu gabe panguhum manang sibagi teanteanan di hamu?

¹⁵Laos didok ma tu nasida: Jaga ma hamu, pasiding hamu ma nasa haholiton! Ai nang pe marlobilobi halak, ndada sian artana i ngoluna. [186†]

¹⁶Gabe dihatahon ma sada umpama tu nasida, ninna ma: Suha do gogo ni hauma ni sada halak na mora.

¹⁷Jadi marhusari ma ibana di bagasan rohana songon on: Aha nama bahenonku? Ai ndang adong hasiatan ni gogo ni tanongki.

¹⁸Gabe ninna ma: On ma bahenonku: Hulohai nama angka sopongki, hupauli ma angka na umbalga, asa tusi papunguonku sude na tubu i ro di artangku.

¹⁹Jala dohononku ma tu tondingku: Ale tondingku, nunga rade godang artam, sae manang piga taon on. Ipe, marhasonangan ma ho, mangan minum ma ho, las ma roham!

²⁰Alai ninna Debata ma mandok ibana: E ho na loahon! Saborngin on ma tungguon hosam sian ho. Ia na pinaradem, tu ise ma i? [187†]

²¹Songon i ma masa di halak an, na papunguhon arta di dirina, anggo so mamora ibana di Debata. [188†] II.

²²Jadi ninna ma mandok siseanna: Ala ni i hudok ma tu hamu: Unang holsohon hamu hosamuna pasarisari sipanganon, manang dagingmuna sumarihon parabiton.

²³Ai ummangat do hosa sian sipanganon jala sumurung do daging sian parabiton.

²⁴Bereng hamu ma pidong sigak, angka na so manabur manang manggotil, na so margudang manang marsopo. Tong do Debata marmudumuduhon angka i. Godang ni hasurunganmuna antong sian angka pidong! [189†]

²⁵Ise hamu na tarpaganda ariarina, nanggo saasta ganjangna, marhite sian pangkolsohon ni rohana?

²⁶Asa molo so tarpatupa hamu na ummotik i, boasa pola holsohononmuna na di atas ni i?

²⁷Patangkas hamu ma partubu ni bungabunga na di ladang i, angka na so mangganti manang martonun pe! Alai hudok ma tu hamu: Gari si Salomo uju di bungaran ni hasangaponna i, gari so mamangke songon bungabunga sada.

²⁸Asa molo songon i diparulosi Debata duhutduhut na di ladang i na jongjong songon sadari on, na tupa dipuruni marsogotna i, lam hamu ma, lam so parulosanna? E hamu siotik haporseaon!

²⁹Asa unang ma lulululu rohamuna di sipanganon manang di siinumonmuna; unang bohabohaon rohamuna disi!

³⁰Angka sipelebegu na di portibi on do mangalului angka sisongon i; alai diboto Amamuna do, na hasea angka i di hamu.

³¹Asal ma dilului hamu harajaonna i; dung i tambahononna do angka i tu hamu.

³²Unang ho mabiar, ale punguan na metmet! Ai naung dihalomohon Amamuna do, mangalehon harajaonna i tu hamu. [190†]

³³Gadis hamu ma na pineopmuna, jala lehon hamu ma asiasi. Pauli hamu ma di hamu angka puro na so ra buruk; masiarta parbanua ginjang na so ra suda ma hamu, na so hadonohan panangko jala na so targagat ngitngit. [191†]

³⁴Ai ia disi artamuna, disi do nang rohamuna. III.

³⁵Sai hohos ma gontingmuna, jala galak ma palitomuna! [192†]

³⁶Jala suman ma hamu tu jolma na paipaimahon indukna, di na ro muli ibana sian parunjuhan, asa mamintor diungkap di ibana, di harorona manuktuhi.

³⁷Martua ma angka anak somang i, na dungo dapoton ni indukna di harorona i! Na sintong do hatangkon tu hamu: Hohoshononna ma ulosna, pajuguhonna ma nasida; ibana ma jongjong marhobasi di nasida.

³⁸Martua ma nasida, anggo songon i nasida didapot, manang na ro ibana di paduanghaebornginhon manang di patolunghaebornginhon.

³⁹Alai tanda hamu ma on: Aut diboto nampuna jabu, manang di pungkul piga tagamon ro panangko, dungo ma ibana, ndang loasonna ibana manursari ugasanna. [193†]

⁴⁰Hamu pe, gabe hobas ma, ai na ro do Anak ni jolma i di tingki na so panagamanmuna!

⁴¹Jadi didok si Petrus ma: Tuhan, tu hami do didok Ho umpama ondeng, manang dohot do tu saluhutna?

⁴²Gabe didok Tuhan i ma: Ise ma antong juara bagas na tau haposan, na marroha, sipabangkiton ni indukna manggomgom angka naposona, laho mangalehon bohalnasida di tingkina?

⁴³Martua ma anak somang i, na mangulahon songon i dapoton ni indukna di harorona i!

⁴⁴Sintong do na hudok on tu hamu: Pabangkitonna do ibana mangaramoti nasa ugasanna. [194†]

⁴⁵Alai molo didok anak somang i di bagasan rohana: Laon dope, asa ro indukhu, jadi dipungkuli ma angka naposo baoa dohot boruboru, mangan minum ibana maradu mabuk,

⁴⁶gabe ro ma induk ni naposo i di ari na so panagamanna jala di ngombas na so pamotoanna, jala parduaonna ma ibana, laho mangalehon tohapna rap dohot na so haposan.

⁴⁷Ia anak somang, na umboto na hinalomohon ni indukna, gabe so marhobas ibana jala ndang diulahon lomo ni rohana, godang ma linsinglinsing taononna. [195†]

⁴⁸Alai na so umbotosa, gabe diulahon na tama pinsangon, otik ma taononna. Ai godang ma siluluan tu pangalehonan na godang, jala godang ma tungguon tu panahatan ni na godang.

⁴⁹Na ro do Ahu mandanggurhon api tu tano on. Dihasiholi nasa rohangku do, anggiat haru galak nian!

⁵⁰Alai didihononhon do tu Ahu paridion; jala mansai bobos do rohangku, saleleng so tulus dope i. [196†]

⁵¹Na dirimpu rohamuna do, na laho mangalehon dame Ahu tu atas tano on, umbahen na ro? Nda tung, hudok ma di hamu: Panirangon do tahe.

⁵²Ai olat ni on ma maralo lima halak na di sada jabu: Na tolu maralohon na dua, jala na dua maralohon na tolu.

⁵³Maralo ma ama tu anakna, anak i tu amana; ina tu boruna, boru i tu inana; simatua boru tu parumaenna, parumaen i tu namboruna.

⁵⁴Dung i ninna ma mandok natorop i: Jumpa diida hamu nangkok ombun sian hasundutan, pintor didok hamu do: Na ro ma udan; jadi saut do songon i. [197†]

⁵⁵Jala jumpa mangullus alogo sian dangsina, didok hamu: Na logo ma ari: Jadi jumpang do songon i.

⁵⁶E hamu pangansi, malo do hamu hape manimbangi rupa ni tano on dohot langit i; so malo ma hamu manjujuri tingki on?

⁵⁷Boasa so sian rohamuna hamu manimbangi na patut?

⁵⁸Binsan raphon alom dope ho manopot panguhum, haringkothon ma di tongandalan i, asa malua ho sian ibana; so tung disarat ibana ho tu jolo ni panguhum, gabe panguhum pasahathon ho tu upasna jala hurungkonon ni upas i ho maon. [198†]

⁵⁹Hudok ma tu ho: Na so tupa ho haruar sian i, paima digarar ho sude ro di na saduit!