Read Batak Toba LUKAS 13 Bible Online

LUKAS 13 - Batak Toba bible

LUKAS 13

¹I. [1] Adong ma na ro uju i paboahon tu Ibana taringot tu angka halak Galilea, na didurushon si Latus do mudarnasida, gabe saor tu na pinelehonnasida.

²Jadi ninna Jesus ma mangalusi nasida: Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida? [199†]

³Hudok ma di hamu: Ndang; anggo so muba rohamuna, laos songon i do hamu mago muse! [200†]

⁴Manang na dirimpu hamu, anggo na sampuluualu halak, na mate ditinggang palaspalas na di Siloam, parsalaan sian sude pangisi ni huta Jerusalem?

⁵Hudok ma di hamu: Nda tung; anggo so muba rohamuna, laos songon i do hamu mago muse!

⁶Dung i dihatahon ma umpama on: Adong ma di sada halak hau ara na sinuanna tu porlak anggurna; jadi ro ma ibana mangalului parbuena, hape ndang adong jumpangsa. [201†]

⁷Gabe ninna ma mandok siula porlak anggurna: Nunga pola patolutaonhon ahu ro mangalului parbue di hau ara on, laos so jumpang. Taba ma i; aha pola magopo tano i bahenonna!

⁸Alai didok i ma mangalusi: Tuannami, loas ma i disi sataon on, asa sanga hupangkur humaliang bonana, mambahen napa tusi, [202†]

⁹anggiat olo marparbue tu jolo on; alai anggo soada, tabaon ma! II.

¹⁰Dung i mangajari ma Ibana di sada parguruan jumpa ari Sabbat.

¹¹Jadi adong ma disi sada parompuan, naung martondi sibahen marsahit leleng ni sampulu ualu taon; suhung do dagingna jala ndang tarbahensa dirgak.

¹²Dijou Jesus ma ibana jumonok, dung diida; jala ninna ma mandok ibana: Malua ma ho, inang, sian parsahitonmi!

¹³Laos diampehon ma tanganna tu ibana, jadi pintor dipadirgak parompuan i ma dirina jala dipuji ma Debata. [203†]

¹⁴Alai ia sintua ni parguruan i, sogo ma rohana, ala na pamalum sahit Jesus jumpa ari Sabbat, jala ro ma hatana tu natorop i: Onom do ari di na patut mulaulaon hita; disi ma hamu ro, asa dipamalum sahitmuna, unang ma di ari Sabbat!

¹⁵Alai ninna Tuhan i ma mangalusi ibana: E ho pangansi! Nda ganup hamu mangkarhari horbona manang halodena sian panggagatan di ari Sabbat manogihonsa marsobur? [204†]

¹⁶Ia on, sada boru ni si Abraham, naung nirahutan ni sibolis sampulu ualu taon lelengna, ndang patut harharan ihotihotna di ari Sabbat? [205†]

¹⁷Dung didok Ibana i, muruk ma sude alona i. Jala marlas ni roha ma sude natorop i siala saluhut pambahenna na marmulia i. III.

¹⁸Alai didok ma: Tudos tu aha ma harajaon ni Debata, tu aha ma pasumanonku?

¹⁹Tudos ma i tu batu ni siarum, na jinomput ni sada halak, laho manaburhonsa tu porlakna; jadi tubu ma gabe hau, jala ro do angka pidong na martongatonga langit marasar tu rantingna.

²⁰Diulahi mandok: Tu aha ma patudosonku harajaon ni Debata?

²¹Tudos ma i tu itak naung niasoman, na binuat ni sada parompuan pasaorhonsa tu itak tolu ampang, paima asom saluhutna.

²²Jadi dibolus Ibana ma angka huta dohot sosor laho mangajari, uju di pardalanan mandapothon huta Jerusalem.

²³Jala adong ma na mandok tu Ibana: Tuhan, otik do ulaning na saut malua?

²⁴Alai ninna Ibana ma mandok nasida: Marungkil ma hamu, asa masuk sian pintu na gogot i; ai hudok ma tu hamu: Torop do na marsangkap naeng masuk nian, alai ndang tarbahensa. [206†]

²⁵Alai dung hehe nampuna jabu i jala disordak pintu i, disi ma jongjong hamu di balian manuktuhi pintu i, mandok: Tuhan, ungkap di hami! Jala dohononna ma: Ndang huboto hamu, manang sian dia! [207†]

²⁶Dohononmuna ma disi: Na rap mangan jala minum do hami dohot Ho, jala diajari Ho do hami di angka alamannami. [208†]

²⁷Dung i dohononna ma: Hudok ma di hamu: Ndang huboto hamu, manang sian dia. Sumurut ma hamu sian Ahu, hamu sudena, siula hageduhon!

²⁸Disi ma masa angguhangguk dohot na patungoripon, di na idaonmuna di bagasan harajaon ni Debata si Abraham, si Isak dohot si Jakkob ro di panurirang saluhutna; alai pinabali tu balian do anggo hamu!

²⁹Disi ma ro angka na sian purba dohot sian pastima, sian utara dohot sian dangsina, gabe hundul ma marsipanganon di harajaon ni Debata. [209†]

³⁰Angka naung parpudi hian tupa gabe parjolo; jala angka naung parjolo hian, tupa gabe parpudi. [210†] IV.

³¹Uju i didapothon deba Parise ma Ibana mandok: Hehe ma ho, borhat ma sian on, ai na naeng bunuon ni si Herodes do Ho!

³²Gabe ninna ma mandok nasida: Laho ma hamu, dok hamu ma tu antuasu i: Hupabali angka tondi na hodar jala hupamalum angka sahit sadari on dohot marsogot, jala marujung ma langkangku patoluna.

³³Alai ingkon mardalan Ahu sadari on, nang marsogot ro di ari na mangihut tusi; ai na so bolas mate panurirang, anggo di balian ni huta Jerusalem.

³⁴Jerusalem, Jerusalem! Dibunu ho do angka panurirang i jala didangguri ho do angka na sinuru manopot ho! Jotjotna i naeng papunguonku do nian ianakhonmu, sobokkon pidong na papunguhon anakna tu toru ni habonghabongna; alai ndang dung olo hamu!

³⁵Tarulang ma sogot bagasmuna. Alai hudok ma tu hamu: Na so tupa idaonmuna be Ahu, paima dohononmuna: Pinasupasu ma na ro marhitehite Goar ni Tuhan! [211†]