Read Batak Toba LUKAS 14 Bible Online

LUKAS 14 - Batak Toba bible

LUKAS 14

¹I. [1] Jadi jumpa dibongoti Ibana jabu ni sada sintua ni halak Parise di sada ari Sabbat laho marsipanganon, nunga disi nasida mangonggopi Ibana. [212†]

²Jadi adong ma disi di jolona sada halak na sigurbahon.

³Jadi ninna Jesus ma mandok angka sibotopatik dohot Parise i: Ai na jadi do pamalumon sahit di ari Sabbat, manang na so jadi? Alai hohom do anggo nasida.

⁴Gabe dijama Ibana ma halak i; dipamalum ma, laos dipamuli.

⁵Jadi didok ma tu nasida: Anggo na targodung horbo manang halode ni manang ise hamu, nda manigor ditait tu ginjang, nang di ari Sabbat? [213†]

⁶Gabe ndang haalusan nasida hatana i. II.

⁷Alai diida ma, angka hundulan na sumangap dipilliti angka na pinio i, gabe marumpama ma Ibana, ninna ma mandok nasida: [214†]

⁸Anggo tarpio ho tu parunjuhan, unang ho juguk tu hundulan na ummangat, atik beha adong piniona sahalak na sumangap sian ho;

⁹gabe ro suhut i, na rap mamio hamu, mandok tu ho: Di ibana ma juguhanmi! Jadi ila ma roham juguk tu hundulan partoru.

¹⁰Alai anggo dipio na mamio ho, laho ma ho juguk tu hundulan pudipudi; asa anggo dung ro na mamio ho, dohononna ma tu ho: Tungkan julu on ma ho juguk, ale! Jadi sangap ma ho idaon ni sude donganmu na tarpio i.

¹¹Ai nasa na patimbohon dirina, sipaoruon do; jala na paoru dirina, i do sipatimboon! [215†]

¹²Didok ma huhut tu na mamio Ibana: Jumpa dibahen ho pesta manang haroan, unang ma pio tusi angka alealem, manang hahaanggim, manang hulahulam, manang hombar bagasmu pe, angka na gabe, asa unang nasida muse mamio ho, gabe dibalos i tu ho.

¹³Alai jumpa mambuat sipanganon ho, pio ma angka na pogos, angka na martihas, na pangpang dohot na mapitung. [216†]

¹⁴Jadi martua ma ho disi, ai ndang tarbalos nasida i tu ho; alai marbalos do i tu ho sogot di haheheon ni angka partigor. [217†] III.

¹⁵Umbege i sahalak donganna marsipanganon i, ninna ma mandok Ibana: Martua ma na mangan di harajaon ni Debata! [218†]

¹⁶Gabe ninna Jesus ma mangalusi: Adong ma sahalak na marulaon godang: Torop do halak gokkon tusi.

¹⁷Jadi di mata ni pesta i disuru ma anak somangna mandok tu angka naung ginokkonna i: Ro ma hamu, ai nunga rade saluhutna!

¹⁸Hape rap do nasida sude marsidalian. Didok na parjolo i ma tu ibana: Hutuhor do hauma, ndang tarbahen so laho ahu maningkir. Raja ho, ondihon ahu!

¹⁹Ia na asing mandok: Naung hutuhor do horbo lima auga; na laho ma ahu manangkasi. Raja ho, ondihon ahu!

²⁰Na asing muse mandok: Nambura mambuat boru ahu; ala ni i ndang tarbahen ahu ro. [219†]

²¹Muli ma anak somang i, dibaritahon ma i tu indukna. Jadi tarrimas ma suhut i, didok ma tu anak somangna: Silu, laho ma ne tu angka alaman dohot jambur ni huta i, togihon ma angka na pogos, angka na martihas, na mapitung dohot na pangpang!

²²Jadi ro ma hata ni anak somang i: Nunga saut na nidokkonmi, tuan; alai lumbang dope!

²³Gabe didok induk i ma tu naposona: Laho ma tu balian, tu angka dalan na metmet, tu angka lapelape; sosoi ma nasida bongot, asa haru gok jabungku!

²⁴Ai hudok ma di hamu: Na so tupa daion ni nanggo sada sian angka na ginokkon hian sipanganon na hupauli i. IV.

²⁵Alai torop do halak na mandongani Ibana. Jadi humusor ma Ibana, ninna ma mandok nasida:

²⁶Ganup halak na ro tu Ahu, ndang tarbahen gabe siseanku, ia so dihasogohon ibana amana, inana, na niolina, anakkonna, hahaanggina dohot angka ibotona, ro di hosana sandiri. [220†]

²⁷Ndang tarbahen gabe siseanku halak, na so manuhuk silang na tu ibana, laho mangihuthon Ahu! [221†]

²⁸Ai ise hamu na giot pajongjong palaspalas, na so jumolo hundul mangetongi sipalahoonna tusi, manang na tuk laho patulushon?

²⁹Unang dipauli jolo ojahanna, hape ndang tuk gogona pasahathonsa, gabe surahan ni sude halak na marnidasa ibana.

³⁰Dohononnasida ma: Dipungka halak on do pajongjongkon, hape ndang adong bahenonna pasunhon.

³¹Ise raja na borhat marmusu mangalo donganna raja, na so jumolo hundul mamingkiri, manang na tardompakkonsa mardongan saloksa soldadu alona i, na ro manahopi ibana mardongan dua loksa.

³²Alai anggo so tarbahen i, suruonna ma pangulu, binsan holang dope musu i, mangido pardamean.

³³Hamu pe, ndang tarbahen agia ise hamu gabe siseanku, anggo so tartadingkonsa nasa na di ibana.

³⁴Hasea do sira i; alai anggo gabe hambar sira i, aha ma paansimhon i? [222†]

³⁵So manang marguna i tu hauma, manang tu tangkal pe; bolongkononhon nama i! Hamu parpinggol na marbinege, pinggol hamu ma i!