Read Batak Toba LUKAS 15 Bible Online

LUKAS 15 - Batak Toba bible

LUKAS 15

¹I. [1] Dung i dipasolhot torop angka sijalo beo dohot sipardosa dirina tu Ibana, laho tumangihon hatana.

²Jadi marmungutmungut ma angka Parise dohot sibotosurat; ia hatanasida: Dijangkon On do angka pardosa, pola sapanganan Ibana dohot nasida. [223†]

³Gabe dihatahon Ibana ma umpama on tu nasida:

⁴Ise hamu sahalak parbirubiru saratus, anggo tardempar sada sian i, na so tuminggalhon na siapulu sia i di ladang, laho mangalului na so tarida i, paima jumpangsa? [224†]

⁵Ia dung dapotsa, diampehon ma tu abarana sian las ni rohana.

⁶Jadi dung sahat ibana tu jabuna, dipapungu ma alealena dohot hombar hundulna, didok ma tu nasida: Marlas ni roha ma hamu rap dohot ahu, ala jumpang ahu birubirungku naung mago i!

⁷Hudok ma tu hamu: Suman tusi do gumodang las ni roha di banua ginjang mida sipardosa sahalak, na olo paubahon rohana, asa mida siapulu sia partigor, na so pola paubahon rohanasida. II.

⁸Adong ma ulaning parompuan na marhepeng sampulu hupang; anggo mago sada sian i, na so pagalakkon palito jala manapui bagasna, mangalului tangkas hupang na mago i, paima jumpangsa?

⁹Ia dung jumpangsa, dipapungu ma angka alealena dohot hombar hundulna mandok: Marlas ni roha ma hamu rap dohot ahu, ala naung jumpang ahu hupangku na mago i.

¹⁰Hudok ma tu hamu: Suman tusi do masa las ni roha di jolo ni angka surusuruan ni Debata mida sahalak sipardosa na paubahon rohana. [225†] III.

¹¹Jala ninna ma muse: Adong ma dua anak ni na sahalak.

¹²Gabe didok sianggian i ma mandok amana: Amang, lehon tu ahu sinamot, manang sadia tohaphi! Jala disagihon ma tu nasida panamotan i.

¹³Ndang pola piga dan nari, dipapungu sianggian i ma saluhutna, dung i laho ma tu luat na dao; disi ma dipansuasaehon sinamotna paolooloi hisapna. [226†]

¹⁴Dung dipasuda saluhutna i, masa ma haleon potir di na saluat i, jadi dohot ma ibana mamungka rapar.

¹⁵Jadi laho ma ibana mahiandu tu sada halak pangisi ni luat i, gabe disuru ma ibana tu ladangna, marmahan angka babina.

¹⁶Disangkapi rohana do manggohi butuhana langkat i, indahan ni babi i; alai ndang adong na mangalehonsa tu ibana. [227†]

¹⁷Dung i dipasuang ma rohana tu bagasan, ninna ma: Torop ni halak digaji damang, angka na lobian di indahan; anggo ahu mate ma anturaparon dison!

¹⁸Hehe nama ahu laho mandapothon damang; dohononku ma tu ibana: Ale amang, na mardosa do ahu tu banua ginjang nang dompak ho! [228†]

¹⁹Ndang tama be ahu goaron anakmu; bahen ma ahu songon anak gajianmu sada!

²⁰Jadi hehe ma ibana manopot amana. Alai dao dope ibana, nunga ditatap amana ibana; jadi asi ma roha ni i marnida ibana, hatop ma ditomu, dihaol jala diumma.

²¹Gabe ninna anak i ma mandok ibana: Amang, na mardosa do ahu tu banua ginjang nang dompak ho; ndang tama be ahu goaron anakmu!

²²Alai ninna ama i ma mandok naposona: Haru, boan hamu ma ulos na dumenggan, salini hamu ma ibana; tintin ma lehon hamu tu tanganna dohot sipatu tu patna!

²³Jala boan hamu ma anak ni lombu na pinamokmok i; potong hamu ma i, naeng mangan hita marlas ni roha.

²⁴Ai naung mate do anakkon gabe mangolu; naung mago ibana, gabe jumpang muse. Jadi mamungka marlas ni roha ma nasida. [229†]

²⁵Alai di ladang do anggo anakna sihahaan i. Jadi di na ro ibana dumonok tu bagas i, dibege ma endeende dohot parhinaloan.

²⁶Gabe dijou ma sahalak naposo, dipamanat ma, manang dia na masa i.

²⁷Jala ninna i ma mandok ibana: Nunga ro anggim; jadi dipotong amangmu do anak ni lombu na pinamokmok i, ala hipas ibana mulak.

²⁸Alai pangarimason ma ibana, ndang olo bongot tu jabu; gabe ruar ma amana, mangapoi ibana. [230†]

²⁹Alai ninna ma mangalusi amana i: Na sai leleng hupaolooloi ho, ndang dung hulaosi patikmu. Ndang hea dilehon ho hambing sada tu ahu, asa marlas ni roha ahu dohot angka donganki.

³⁰Hape disi ro anakmi, na mamondut sinamotmi rap dohot boruboru na jahat, gabe diseat ho do di ibana anak ni lombu na pinamokmok i!

³¹Alai didok ma tu ibana: Anaha, tongtong do ho rap dohot ahu jala di ho do sasude na di ahu i.

³²Alai patut do pamasaon las ni roha dohot pariaiaon! Ai naung mate do anggimon, gabe mangolu; jala naung mago do ibana, gabe jumpang!