Read Batak Toba LUKAS 16 Bible Online

LUKAS 16 - Batak Toba bible

LUKAS 16

¹I. [1] Laos didok Ibana ma tu siseanna i: Adong ma sada halak na mora na marjuara bagas. Jadi tarbortik ma tu ibana, dipansuasaehon juara bagas i artana.

²Gabe dijou ma ibana, ninna ma mandok ibana: Dia do i na hubege taringot tu ho? Patuduhon ma paretongan ni hajuaraonmi; ai ndang tarbahen ho be leat ni juara bagas!

³Jadi marhusari ma juara bagas i: Dia nama bahenonku, ai buaton ni tuanki nama sian ahu hajuaraonki. Mamangkur, ndang adong gogongku; manehenehe, maila ahu.

⁴On ma tahe sibahenonku di rohangku, asa dijangkon nasida ahu tu jabunasida, ia dung dipaijur ahu sian hajuaraonki:

⁵Jadi sadasada ma dijou nasa parsingiran ni indukna i tu jolona, didok ma tu na parjolo ro i: Sadia sigararonmi tu tuanta?

⁶Alusna: Saratus gunsi miak. Gabe ninna ma mandok ibana: Alap ma suratmi, dung i hundul ma ho manurathon hatop limapulu!

⁷Tu na asing muse didok: Ia ho, sadia do sigararonmi? Saratus tuhukan eme! Gabe didok tu ibana: Alap ma suratmi, dung i surathon ma: Ualupulu!

⁸Jadi dipuji na mora i ma juara bagas na geduk i, ala bisuk pambahenna i. Ai umbisuk do anak portibi on asa anak hatiuron i mangangkupi donganna saroha. [231†]

⁹Ahu pe, hudok ma di hamu: Lului hamu ma di hamu aleale marhitehite Mammon na geduk i; asa ia dung suda i, gabe dijangkon ma hamu tu bagasan angka parmianan sogot. [232†]

¹⁰Ia haposan halak di na ummotik, haposan ma ibana nang di na godang: Ianggo geduk ibana di na ummotik, geduk ma nang di na godang. [233†]

¹¹Asa molo so haposan hamu mangaradoti Mammon na geduk i, ise ma antong pasahathon tu hamu arta na tutu i?

¹²Jala molo so haposan taringot tu ugasan ni na leban, ise ma olo mangalehon tu hamu na tu hamu hian!

¹³Ndang haoloan sada anak somang dua induk: Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon i! [234†]

¹⁴Alai sude hata ondeng dibege halak Parise, angka na impolan di perak; jala manungarnungar ma nasida dompak Ibana. [235†]

¹⁵Gabe ninna Ibana ma mandok nasida: Ianggo hamu tutu, dipintori hamu do dirimuna di jolo ni halak; alai ditanda Debata do rohamuna. Ai na timbul di roha ni jolma, i do dihagigihon Debata. [236†]

¹⁶Intap si Johannes do patik i dohot angka panurirang i. Olat ni i ma dibaritahon harajaon ni Debata, jala saluhutna do mambahen gogo tusi. [237†]

¹⁷Alai ummomo do salpu langit dohot tano, sian na gabe bolong sada gurit ni patik i. [238†]

¹⁸Pangalangkup do ganup na paluahon niolina, gabe dioli na asing; pangalangkup do nang na mambuat na pinalua ni baoana i. [239†] II.

¹⁹Asa adong ma sada halak na mora, na marabithon surta na rara dohot haen bontar na lamot; ariari do ibana marlas ni roha godang.

²⁰Alai adong ma sahalak na pogos, na margoar si Lasarus, peakpeak di jolo pintu ni na mora i; gok baro do dagingna.

²¹Dipangido rohana do manganhon ebaeba na sian panganan ni na mora i; alai ro ma biang mandilati barona i.

²²Dung i mate ma na pogos i, gabe diboan angka surusuruan ma ibana tu ampuan ni si Abraham. Laos mate do nang na mora i, dung i ditanom.

²³Jadi sian banua toru i ma ibana manaili tu ginjang, uju di na bernit i ibana, jala ditatap ma si Abraham sian na dao jala si Lasarus di ampuanna i.

²⁴Dung i joujou ma ibana, ninna ma: Ompung Abraham! Asi roham mida ahu: Suru ma si Lasarus manornophon ujung ni jarijarina tu aek, palamohon dilangku, ai bernit do huahap di api on.

²⁵Alus ni si Abraham: Ingot, anaha, naung dijalo ho na denggan, uju di ngolum; ia si Lasarus na porsuk do. Anggo nuaeng, apulon do ibana dison; alai mangae na porsuk nama ia ho.

²⁶Jala angkup ni i muse, dijadihon do lung na bagas holangholangta; asa ndang bolas taripar angka na giot manorusi sian on tu hamu, jala ndang tarbahen na disini manopot hami tuson.

²⁷Ro muse hatana: Molo boti, mangido ma ahu tu ho, ompung, suruonmu ibana tu bagas ni damang.

²⁸Ai lima nari do hahaanggingku; naeng dihatindangkon tu nasida, unang gabe dohot nasida ro tu parhansitan on.

²⁹Alai ninna si Abraham ma: Adong do di nasida surat ni si Musa dohot angka panurirang; angka i ma ditangihon! [240†]

³⁰Gabe ninna ma: Ndang i, ompung Abraham; alai aut ni adong sahalak sian angka naung mate ro mandapothon nasida, paubaonnasida ma rohanasida.

³¹Alai dialusi ma: Anggo so ditangihon nasida si Musa dohot angka panurirang, ndang tagamon mangoloi nasida, nang adong na hehe sian angka na mate.