Read Batak Toba LUKAS 17 Bible Online

LUKAS 17 - Batak Toba bible

LUKAS 17

¹I. [1] Alai didok Ibana ma tu siseanna i: Ndang tarbahen so ro angka gasip; alai marjea ma na parohonsa!

²Dengganan do di ibana ginantungkon losung batu tu rungkungna jala nilonongkon ibana tu laut, unang digasipi sahalak sian angka na metmet on! [241†]

³Jamoti hamu ma dirimuna! Anggo dung mardosa donganmu, podai ibana; jadi molo dipauba rohana, sesa ma dosana i! [242†]

⁴Jala molo tung pitu hali di na sada ari mardosa ibana dompak ho, jala pitu hali ibana mulahulak tu jolom mandok: Jora ma ahu, sesaonmu do! [243†]

⁵Dung i ninna angka apostel i ma mandok Tuhan i: Tambai ma haporseaonnami! [244†]

⁶Alai ninna Tuhan i ma: Molo adong di hamu haporseaon na sabatu ni siarum, tardok hamu do tu hau galagala an: Maborgat ma ho suanhon ma ho tu laut!, gabe oloanna do hamu! [245†]

⁷Alai ise sian hamu paranak somang na maninggala manang marmahan, tagamon ma dohononmuna tu ibana, jumpa muli sian hauma: Haru tu on ma ho hundul mangan?

⁸Nda dohononmuna ma mandok ibana: Pature ma sipanganonki, marhohop ma ho, mangkobasi di ahu, asa mangan minum ahu; dung pe i, asa mangan dohot minum ho!

⁹Tung dohononmu ma mauliate tu anak somangmu, ala dipasaut na niaturhonmu?

¹⁰Songon i do nang hamu; molo dung diula hamu saluhut na nidokkonna i tu hamu, dok hamu ma: Naposo na so hasea do hami; intap ulaon na patut do huula hami. II.

¹¹Uju mardalan Ibana dompak Jerusalem, dibolus ma sian tongatonga ni luat Samaria dohot Galilea. [246†]

¹²Laho bongot tu sada huta, pajumpang ma Ibana dohot sampulu halak na huliton, na jongjong mandaodao. [247†]

¹³Dipagogo nasida ma soaranasida, angka ninna ma: Jesus, Guru! Asi ma roham di hami.

¹⁴Jadi ninna Ibana ma marnidasa: Laho ma hamu patuduhon dirimuna tu angka malim! Jala di na laho i nasida, gabe ias ma nasida. [248†]

¹⁵Alai mulak do sahalak sian nasida, dung diida, naung gabe malum ibana; dipagogo ma soarana mamuji Debata.

¹⁶Dipatungkap do dirina tu jolo ni Jesus mandok mauliate. Jala halak Samaria do i.

¹⁷Alai ninna Jesus ma mangalusi: Nda sampulu nasida naung gabe ias? Didia do na sia nari?

¹⁸Ndang adong jumpang hape, na olo mulak pasangaphon Debata, dungkon ni halak dagang on?

¹⁹Laos ninna ma mandok ibana: Hehe ma ho, laho ma! Haporseaonmi do paluahon ho! [249†] III.

²⁰Alai disungkun angka Parise do Ibana: Andigan ma songgop harajaon ni Debata? Gabe dialusi ma nasida, ninna ma: Apala gumortap idaon harajaon ni Debata di harorona i. [250†]

²¹Jala ndang tardok: Ndi on do! Manang: Ndi an! Ai tung di tongatongamuna do harajaon ni Debata. [251†]

²²Dung i ninna ma mandok siseanna: Na ro ma angka ari, malungun ma rohamuna disi, naeng idaonmuna sada ari ni Anak ni jolma i; alai ndang idaonmuna i.

²³Jala dohononna ma tu hamu: Dison! Disan do i! Unang topot hamu tusi, unang ihuthon hamu! [252†]

²⁴Ai songon hilap na sumiksak, laho manorangi sian desa na sada ro di tondongkonna i, suman tusi do pangalho ni Anak ni jolma i di arina i. [253†]

²⁵Alai ingkon jumolo lan taononna; bolongkonon ni na sansundut on do Ibana. [254†]

²⁶Songon na masa uju di tingki ni si Noak i, suman tusi do sogot di angka ari ni Anak ni jolma i: [255†]

²⁷Na mangan minum do nasida, mangoli jala pabolihonsa sahat ro di ari habobongot ni si Noak i tubagasan parau i; jadi ro ma aek na sumar i mangagohon nasida saluhutna. [256†]

²⁸Songon na masa di angka ari ni si Lot: Mangan minum nasida, manuhor manggadis, manuan jala pauli bagas.

²⁹Alai di ari halalaho ni si Lot sian huta Sodom turun ma udan api dohot barerang sian ginjang, mangagohon nasida saluhutna. [257†]

³⁰Songon i ma masa di na sadari i, di na gabe patar Anak ni jolma i.

³¹Ia halak na di bilut parginjang ni jabuna di na sadari i, jala di jabu i ugasanna, unang ma dialap i, di na mijur ibana; jala halak na di ladang, laos songon i: Unang pola muli ibana! [258†]

³²Ingot hamu ma nioli ni si Lot i! [259†]

³³Agoan hosa ma na naeng paluahon hosana; alai na agoan hosa, i do na pangoluhonsa. [260†]

³⁴Hudok ma di hamu: Di na saborngin i dua halak ma sapodoman; na sada do jangkononna, na sada nari tulahonna.

³⁵Rap manduda ma dua parompuan; na sada do jangkononna, na sada nari tulahonna. [261†]

³⁶Rap mangula hauma ma dua halak; na sada do jangkononna, na sada nari tulahonna.

³⁷Jadi ninna nasida ma mangalusi Ibana: Didia ma i, Tuhan? Gabe didok ma tu nasida: Ia disi bangke, laos tusi do marumbal angka lali! [262†]