Read Batak Toba LUKAS 18 Bible Online

LUKAS 18 - Batak Toba bible

LUKAS 18

¹I. [1] Dung i dihatahon ma tu nasida umpama sada, paboa ingkon tongtong nasida martangiang, na so tupa lemba. [263†]

²On do hatana: Adong ma di na sahuta panguhum sada; ndang dihabiari Debata jala ndang dipardulihon jolma.

³Alai adong ma di huta i parompuan na mabalu, na ro manopot ibana mandok: Pintori ahu maralohon alongki!

⁴Jadi leleng ndang ringkot rohana. Alai ninna ma muse di bagasan rohana: Tutu do, ndang huhabiari Debata jala ndang parduli ahu di jolma.

⁵Alai hupintori nama na mabalu on, ala dinengnengi ahu, atik beha ro ibana maon muse manggariangi ahu. [264†]

⁶Dung i didok Tuhan i ma: Tangihon hamu ma pandok ni panguhum na geduk i!

⁷Ia Debata, tung so pintoranna ma angka na pinillitna, angka na manjou Ibana arian dohot borngin? Tung pangerngeronna ma di nasida?

⁸Hudok ma di hamu: Magira ma pintoranna nasida! Alai tagamon jumpang Anak ni jolma i ma haporseaon di tano on di harorona i? II.

⁹Alai dihatahon ma umpama sada taringot tu halak na mangkaposi dirina, mandok na tigor nasida, angka na marhu, ni roha di dongan, ninna ma:

¹⁰Adong ma dua halak na nangkok tu joro i martangiang; halak Parise do na sada, sijalo beo na sada nari.

¹¹Jadi dirgak ma Parise i jongjong; songon on ma tangiangna di bagasan rohana: Mauliate ma ahu tu Ho, ale Debata, ala so dos ahu dohot halak na leban, angka panamun, pargeduk, pangalangkup manang songon sijalo beo an. [265†]

¹²Dua hali saminggu ahu marpuasa jala huparsampulu do saluhutna na huomo. [266†]

¹³Ianggo halak sijalo beo i, mandaodao do ibana jongjong; gari manaili dompak ginjang, ndang barani. Alai ditompuk ma andorana huhut mandok: Asi roham, ale Debata, di ahu pardosa on! [267†]

¹⁴Hudok ma tu hamu: Umpintor do on laho muli asa na sada an: Ai sipaoruon do ganup na patimbo dirina; alai na paoru dirina, i do sipatimboon! [268†] III.

¹⁵Jadi dohot do dakdanak diboan tu jolona, asa jamaonna nasida; alai marnida i angka sisean i, dipinsang ma nasida.

¹⁶Alai dijou Jesus ma nasida, laos ninna ma: Loas hamu ma ro angka dakdanak i sahat tu Ahu; unang orai hamu nasida, ai di angka sisongon i do harajaon ni Debata!

¹⁷Situtu do hatangkon tu hamu: Na so manjalo harajaon ni Debata songon dakdanak, ndang saut bongot tusi. [269†] IV.

¹⁸Dung i disungkun sahalak sintua ma Ibana, ninna ma: O Guru, na denggan roha! Dia do sipatupaonku, asa hutean hangoluan na salelenglelengna?

¹⁹Gabe ninna Jesus ma mandok ibana: Boasa digoar ho Ahu na denggan roha? Ndang adong na denggan roha, dungkon ni sasada Debata!

²⁰Angka patik i diboto ho do: “Unang ho mangalangkup! Unang ho mambunu! Unang ho manangko! Unang ho olo mangkatindangkon na so tutu! Ingkon pasangaponmu amangmu dohot inangmu!” [270†]

²¹Alai ninna halak i ma: Sasudena i huradoti do sian sietehetehonku dope.

²²Umbege i Jesus, ninna ma mandok ibana: Sada nama na hurang di ho: Gadis ma nasa na di ho, parlehon ma i tu angka na pogos, gabe mararta ma ho di banua ginjang. Dung i ro ma ho mangihuthon Ahu! [271†]

²³Alai habot do rohana umbegesa ai na mora jong do ibana.

²⁴Alai dibereng Jesus ma ibana, laos didok: Maolna i bongot angka na mora tu bagasan harajaon ni Debata!

²⁵Gumabur do boluson ni gaja pinggol ni jarum, unang halak na mora bongot tu bagasan harajaon ni Debata!

²⁶Gabe didok angka na umbegesa: Molo boti, ise ma tarbahen malua?

²⁷Alai ninna Ibana ma: Na so tarpatupa jolma, tarpatupa Debata do!

²⁸Dung i ninna si Petrus ma: Hutinggalhon hami do na di hami, mangihuthon Ho.

²⁹Gabe didok Ibana ma tu nasida: Na tutu do hatangkon na tu hamu: Nasa na tumadingkon jabuna, manang na niolina, manang hahaanggina, manang natorasna, manang anakkonna pe ala ni harajaon ni Debata,

³⁰ingkon silompit do jaloonna i di hasiangan on, angkup ni i hangoluan salelenglelengna di hasiangan sogot. V.

³¹Alai diarahon ma na sampuludua i, ninna ma mandok nasida: Na nangkok ma hita tu Jerusalem jala tulus ma tu Anak ni jolma i sasudena, na tarsurat di angka panurirang i. [272†]

³²Ai pasahaton ma Ibana tu angka parbegu, gabe insahanna, leaanna jala tijuranna ma Ibana.

³³Linsinganna jala pusaonna do Ibana; dung i mulak mangolu ma Ibana di ari patoluhon.

³⁴Ndang diantusi nasida agia otik sian i; na buni do hata i sian rohanasida, ndang diboto nasida na hinatahonna i. [273†] VI.

³⁵Dung i mandapothon huta Jeriko, adong ma sada halak na mapitung na hundulhundul di dalan i mangidoido.

³⁶Umbege natorop na mamolus i, dipatangkas halak i ma, manang dia na masa i.

³⁷Gabe dibaritahon halak ma tu ibana, Jesus sian Nasaret i mamolus.

³⁸Jadi joujou ma ibana mandok: O Jesus, Anak ni si Daud, asi roham di ahu!

³⁹Hona hata ma ibana dibahen angka na parjolo i, asa sip ibana nian. Alai lam digogo ma manjoujouhon: O Anak ni si Daud, asi roham di ahu!

⁴⁰Dung i sulon ma Jesus, didokkon ma togihononhon ibana tu jolona. Jadi dung donok, disungkun ma ibana:

⁴¹Aha dipangido roham, bahenonku tu ho? Jadi didok ma: Marnida ma nian matangku, ale Tuhan!

⁴²Gabe didok Jesus ma tu ibana: Marnida ma ho! Haporseaonmi do pamalum ho! [274†]

⁴³Jadi pintor marnida ma matana, laos diihuthon Jesus, huhut mamujimuji Debata. Jala sude natorop na marnidasa mamuji Debata.