Read Batak Toba LUKAS 19 Bible Online

LUKAS 19 - Batak Toba bible

LUKAS 19

¹I. [1] Dung i dibongoti, laos dibolus Ibana ma huta Jeriko.

²Jadi adong ma disi sahalak, induk ni angka sijalo beo, na margoar Sakeus; na mora do ibana.

³Dipangido rohana, naeng idaonna rupa ni Jesus; alai ndang tarbahensa siala natorop i, ai pardaging na metmet ibana.

⁴Gabe marlojong ibana tu jolo, dipanaek ma hau galagala sada, anggiat diida Ibana, ai i do dalan sibolusonna.

⁵Dung sahat tusi, mamereng ma Jesus tu ginjang, laos ninna ma mandok ibana: O Sakeus, hatop ma ho mijur, ai ingkon sorang Ahu tu jabumi sadari on!

⁶Jadi hatop ma ibana mijur; las rohana manjangkon Jesus.

⁷Marnida i marungutungut ma nasida sude, mandok: Na sorang do Ibana hape tu halak sipardosa! [275†]

⁸Gabe ro ma si Sakeus, didok ma tu Tuhan i: Olo, Tuhan, satonga ni angka artangki ma hulehon tu angka na pogos; jala ia adong na huangati, siopat lompit ma hupaulak. [276†]

⁹Jadi didok Jesus ma tu ibana: Dapotan tua do pangisi ni jabu on sadari on, ai pinompar ni si Abraham do nang ibana. [277†]

¹⁰Ai na ro do Anak ni jolma i mangalului jala paluahon na mago. [278†] II.

¹¹Jadi dibege nasida ma i, gabe didatdati Ibana marumpama, ala naung donok tu huta Jerusalem; jala dirimpu nasida, manigor sipapataron ma harajaon ni Debata.

¹²Asa didok ma: Naeng borhat ma sahalak na raja tu luat na dao, manjalo harajaon; dung pe i, asa mulak muse. [279†]

¹³Jadi dijou ma naposona sampulu halak, dilehon ma tu nasida sampulu bagian, laos ninna ma mandok nasida: Tigatigahon hamu ma i, paima ro ahu muse!

¹⁴Alai hosom do roha ni angka na nirajaanna mida ibana, disuru nasida ma suruannasida sian pudina, paboahon: Ndang olo hami rajaan ni i! [280†]

¹⁵Asa dung dijalo harajaon i, ro ma ibana mulak, jala disuru ma na manjou angka naposona, naung manjalo hepeng i, asa diboto na niomohonna be.

¹⁶Jadi ro ma na parjolo i, ninna ma: Tuan, sampulu bagian do diomo bagian na sian ho i.

¹⁷Gabe ninna ma mandok ibana: Taho ma i, ale naposo na denggan roha! Ala haposan ho di na otik situtu sampulu huta ma gomgomanmu! [281†]

¹⁸Dung i ro ma na paduahon i, ninna ma: Ia bagian na sian ho, tuan, lima bagian do diomo.

¹⁹Jala ninna ma nang tu ibana: Ia ho, lima huta ma gomgomanmu!

²⁰Jala ro ma na asing mandok: Na, bagianmon, tuan; hutungkus do i di saputanganku.

²¹Ai biar do rohangku mida Ho, ala na horas ho; dibuat ho do na so pineakkonmu, jala digotil ho do na so sinuanmu.

²²Gabe didok ma tu ibana: Mangihuthon pandokmi do uhumonku ho, naposo na jahat roha! Diboto ho do hape, ahu halak na horas, sibuat na so hupeakhon, sigotil na so husuan!

²³Boasa so dilehon ho antong hepengki tu sianahi hepeng, asa hutunggui rap dohot bungana di harorongkon?

²⁴Laos didok ma tu angka donganna: Buat hamu ma sian ibana bagianna i; lehon hamu ma i tu parbagian na sampulu i!

²⁵Jadi ninna nasida ma mandok ibana: Alai nunga sampulu bagian di ibana, tuan!

²⁶Hudok ma di hamu: Di ganup paradongan lehonon do; alai sibuaton do sian na so paradongan na di ibana hian. [282†]

²⁷Alai ia musungki, na so olo rajaanku, boan hamu ma tuson; seseati hamu ma nasida di jolongkon!

²⁸Jadi dung didok songon i, hehe ma Ibana laho nangkok tu Jerusalem. III.

²⁹Dung i mandapothon huta Betpage dohot Betania, mardonokkon dolok i, na margoar dolok Jetun, disuru ma siseanna dua halak.

³⁰Ninna ma: Laho ma hamu tu huta na di jolomuna an; dung bongot hamu, jumpang hamu ma tambat disi anak ni halode, na so dung dihunduli halak; harhari jala boan hamu ma i tuson!

³¹Jala molo adong na manungkun hamu: Boasa harharanmuna i?, dok hamu ma songon on: Ringkot do i di Tuhan i!

³²Dung i laho ma angka na sinuru i, jala jumpang nasida do songon na nidokna i tu nasida.

³³Alai laho mangkarhari anak ni halode i nasida, didok angka nampunasa ma tu nasida: Boasa harharanmuna anak ni halode i?

³⁴Jadi didok nasida ma: Na ringkot do i di Tuhan i!

³⁵Gabe diboan nasida ma i tu Jesus; dipeakkon ma ulosnasida tu anak ni halode i jadi dipahundul ma Jesus tu ginjangna.

³⁶Jala di na borhat i Ibana, dipahembang nasida ma ulosnasida tu dalan i.

³⁷Alai mandapothon tuatan na di dolok Jetun i, hinsa ma roha ni sandok punguan ni sisean i, mamuji Debata, marsoara na gogo, siala sude hagogoon naung niidanasida i.

³⁸Ia endenasida: Pinasupasu ma Raja i, na ro marhitehite Goar ni Tuhan! Dame do di surgo; hasangapon di ginjang! [283†]

³⁹Jala halak Parise i deba, na sian natorop i, mandok tu ibana: Orai ma antong angka siseanmi, Guru!

⁴⁰Jala ninna ma mangalusi: Hudok ma di hamu: Aut mauhom nasida, joujou ma angka batu! IV.

⁴¹Jala laho mandapothon huta i, tangis ma Ibana marnidasa. [284†]

⁴²Ninna ma: Aut di arim on ma nian ditanda ho na tau padamehon ho! Alai naung gabe buni do i nuaeng sian matami. [285†]

⁴³Ai na ro ma muse angka ari manahopi ho; hubu on ni musum ma ho disi, halianganna jala sosahonna ma ho humaliang.

⁴⁴Jala panepneponna ma ho rap dohot anakkonmu di tongatongami, jala ndang pasombuonna nanggo dua batu martinditindi, ala na so ditanda ho tingki panopoton na tu ho. [286†] V.

⁴⁵Dung i dibongoti Jesus ma joro i, dipabali ma sian i angka sipanggadis.

⁴⁶Ninna ma mandok nasida: Na tarsurat do, bagas partangiangan do bagashu; hape gabe liang pandoboan do i dibahen hamu. [287†]

⁴⁷Jala ariari do Ibana mangajari di joro i. Alai anggo angka sintua ni malim i dohot sibotosurat ro di angka panungganei ni bangso i mangalului dalan mamusa Ibana.

⁴⁸Alai ndang jumpang nasida dalan patupahonsa; ai sai marsilohot do roha ni natorop i saluhutna tu Ibana, tumangihon hatana.