Read Batak Toba LUKAS 2 Bible Online

LUKAS 2 - Batak Toba bible

LUKAS 2

¹I. [1] Dung i ro ma uju i parenta sian Kesar Augustus, ingkon suratan nasa jolma di gomgomanna.

²Pamilangon parjolo ma i, uju digomgomi si Kirenius tano Siria.

³Jadi borhat ma sasude, asa disurati, ganup tu bona ni pinasana.

⁴Borhat ma nang si Josep, na sian Galilea, sian Nasaret, nangkok tu luat Judea, tu huta ni si Daud, na margoar Betlehem, ala sian pomparan jala marga ni si Daud ibana,

⁵pasurathon dirina rap dohot si Maria, oroanna i, naung gabegabean. [35†]

⁶Jadi di na disini nasida, gok ma ari ni hangoluanna.

⁷Ditubuhon ma anak buhabajuna, diborhos ma, dipeakkon ma tu bagasan panggagatan, ala so adong inganan na asing di parmianannasida. [36†]

⁸Jadi adong ma marborngin di ladang na disini angka parmahan, mangingani pinahannasida.

⁹Jadi didapothon sada surusuruan ma nasida, jala marsinondang ma sangap ni Tuhan i humaliang nasida, gabe mabiar situtu ma.

¹⁰Alai didok surusuruan i ma tu nasida: Unang mabiar hamu; ai barita halalas ni roha godang do huboan tu hamuna, parsaulian ni sandok bangso i.

¹¹Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i!

¹²On ma partinandaan di hamu: Posoposo do dapotonmuna, na binorhos peak di panggagatan.

¹³Jala tompu ma adong dongan ni surusuruan i torop angka parangan parbanua ginjang, dipuji nasida do Debata, mandok: [37†]

¹⁴Hasangapon ma di Debata di ginjang, dame ma di tano on, di angka jolma halomoan i. [38†]

¹⁵Jala di na laho i angka surusuruan i sian nasida dompak ginjang, masipandohan ma angka parmahan i: Beta ma hita tu Betlehem, taida ma na masa on, na pinabotohon ni Tuhan i tu hita!

¹⁶Jadi hatop ma nasida laho tusi, gabe jumpangsa si Maria dohot si Josep dohot Posoposo i, na peak di panggagatan i.

¹⁷Asa dung diida, dibaritahon nasida ma boaboa, naung dihatahon tu nasida taringot tu Dakdanak i. [39†]

¹⁸Jadi sude na umbegesa, longang be do siala na hinatahon ni angka parmahan i tu nasida.

¹⁹Ia si Maria, dipeop do hata i sudena jala dipahusorhusor di bagasan rohana. [40†]

²⁰Mulak do angka parmahan i, dipasangap jala dipapujipuji do Debata ala ni sasude na binege jala na niidanasida, songon naung dihatahon i tu nasida.

²¹Jadi dung dapot ari paualuhon i, asa tarsunat Ibana, gabe dibahen ma Goarna Jesus, naung digoar pardisurgo i hian, andorang so di bortian dope. [41†] II.

²²Asa dung gok angka ari pangiasannasida mangihuthon patik ni si Musa, diboan nasida ma Ibana tu huta Jerusalem, pasahathon Ibana tu Tuhan i, [42†]

²³songon na tarsurat di bagasan patik ni Tuhan i: “Nasa baoa, buhabaju ni inana, hadohoan ni Tuhan i do goaron!” [43†]

²⁴Huhut mamelehon pelean, songon na niaturhon di bagasan patik ni Tuhan i: Dua anduhur tabu manang dua anak ni darapati. [44†]

²⁵Jala adong ma sada halak di Jerusalem, na margoar si Simeon, halak na bonar jala daulat, na maimaima di pangapul na tu Israel; na niinganan ni Tondi Parbadia do ibana. [45†]

²⁶Jala nunga dipabotohon Tondi Parbadia i tu ibana, na so idaonna hamatean, ia so jolo diida Kristus ni Tuhan i.

²⁷Gabe ro ibana tu joro i didasdas Tondi i; tongon ma diboan natorasna Jesus, Posoposo i, tu bagasan, laho mambahen tu Ibana mangihuthon adat na niaturhon ni patik i.

²⁸Jadi diabing si Simeon ma Posoposo i, dipuji ma Debata, ninna ma:

²⁹Paluaonmu ma nuaeng, ale Raja, naposomon di bagasan dame, songon na nidokmi; [46†]

³⁰ai nunga diida matangku haluaon na sian Ho i,

³¹na pinaradem di jolo ni bangso sudena,

³²bahen panondang sumondangi angka parbegu, bahen hasangapon ni Israel, bangsomi! [47†]

³³Jadi longang ma roha ni amana dohot inana umbege hatana i, na taringot tu Posoposo i.

³⁴Jala dipasupasu si Simeon ma nasida, laos ninna ma mandok si Maria, inana i: Na pinajongjong do on, bahen partinggangan dohot parhehean di torop sian Israel jala bahen tanda na hona gaga, [48†]

³⁵(ho pe, podang do manorushon roham muse), asa gabe patar pingkiran ni roha ni torop halak.

³⁶Jala adong do boruboru panurirang sada na margoar si Hanna, boru ni si Panuel, sian marga Aser. Nunga na tuatua nasida, na marsinonduk mangan najolo pitu taon lelengna, dung marhamulian.

³⁷Na mabalu do nasida, marumur ualupulu opat taon. Ndang meret nasida sian joro i, sai marpuasa jala martangiang mangoloi Debata, arian dohot borngin. [49†]

³⁸Dohot do nasida ro di na sangombas i mamuji Debata jala dibaritahon do Ibana tu saluhut na mangkasiholi haluaon ni Jerusalem. [50†]

³⁹Asa, dung dipasidung nasida saluhutna i hombar tu na pinatikkon ni Tuhan i, mulak ma nasida tu Galilea, tu Nasaret, hutanasida i.

⁴⁰Ia Dakdanak i, lam magodang do, lam margogo huhut marroha situtu, laos didongani asi ni roha ni Debata Ibana. [51†] III.

⁴¹Jala ganup taon laho do natorasna tu Jerusalem marariraya Paska. [52†]

⁴²Jadi dung marumur Ibana sampuludua taon, rap nangkok do nasida, songon na somal di pesta i.

⁴³Asa dung diradoti nasida angka ari raya i, di na laho mulak i nasida, tinggal ma Jesus, Dakdanak i, di Jerusalem, so pamotoan ni natorasna. [53†]

⁴⁴Dirimpu nasida, naung rap dohot dongan sauduran Ibana, jadi didalani nasida ma parsadarian mangalului Ibana di tongatonga ni angka tondong dohot dongan.

⁴⁵Dung so jumpang nasida Ibana, mulak ma nasida tu Jerusalem, laho mangalului Ibana.

⁴⁶Salpu tolu ari, dapot nasida ma Ibana di joro i hundulhundul di tongatonga ni angka guru tumangihon hatanasida huhut manungkunnungkun.

⁴⁷Tarhalomong be do nasida umbege hatana, dibahen torus ni rohana dohot angka alusna.

⁴⁸Marnida Ibana, songgot do rohanasida jala dipanghulingi inana i ma Ibana: Boasa dibahen Ho songon i tu hami, anaha? Bernit do huahap hami dohot amangmu mangalului Ho.

⁴⁹Gabe didok ma tu nasida: Boasa pola luluanmuna Ahu? Ndang diboto hamu, na patut Ahu di bagasan bagas ni Damang? [54†]

⁵⁰Alai ndang diantusi nasida hata na nidokna i tu nasida.

⁵¹Laos tuat do Ibana rap dohot nasida sahat tu Nasaret, jala pangoloi do Ibana di nasida. Alai dipeop inana i do sude na masa i di bagasan rohana.

⁵²Jadi lam ganda ma torus ni roha ni Jesus nang dagingna, lam dihalomohon Debata nang jolma Ibana. [55†]