Read Batak Toba LUKAS 20 Bible Online

LUKAS 20 - Batak Toba bible

LUKAS 20

¹I. [1] Jala di na sadari uju i mangajari natorop i Ibana di joro i, mamaritahon barita na uli, gabe ro ma mandapothon Ibana angka malim dohot sibotosurat rap dohot angka panungganei.

²Ninna nasida ma mandok Ibana: Paboa ma tu hami: Huaso dia do dipangasahon Ho mangula Ulaonmi? Ise do na mangalehon huaso i tu Ho?

³Gabo dialusi ma nasida, ninna ma: Ahu pe, adong do na husungkun tu hamu; paboa hamu ma tu Ahu:

⁴Ia pandidion ni si Johannes, sian ginjang do i manang sian jolma?

⁵Alai marhusari ma nasida sama nasida, songon on: Ia ninta annon: Sian ginjang, dohononna ma; boasa so dihaporseai hamu ibana?

⁶Alai ia ninta: Sian jolma, dangguran ni sandok natorop i hita, ai gomos dihaporseai, panurirang do si Johannes i.

⁷Jadi dialusi nasida ma: Ndang huboto hami, manang sian dia i.

⁸Gabe didok Jesus tu nasida: Ahu pe, ndang paboaonku tu hamu, manang huaso dia hupangasahon di ulaonki. II.

⁹Jala dihatahon ma umpama on tu natorop i: Adong ma sada halak na pauli porlak anggurna, jadi dipasahat ma i tu angka pangula; dung i laho ma ibana marhutasada lelengleleng.

¹⁰Di tingkina i disuru ma naposona tu angka siula porlak anggur i, asa dilehon tu ibana gogo ni porlak anggur i deba. Alai dilombuti angka pangula i ibana, laos muli boti do ibana dipaulak. [288†]

¹¹Jadi disuru muse naposona na asing; alai nang i dilasahi jala dileai nasida do, laos songon i ibana disuru muli.

¹²Disuru muse dope na patoluhon; alai nang i dibugangi do jala dipabali.

¹³Dung i ninna nampuna porlak anggur i ma: Aha nama bahenonku? Anakku haholongan i ma suruonku; ra biar ma rohanasida mida ibana.

¹⁴Alai marnida ibana angka pangula i, masipandohan ma nasida, ninna ma: On do panean i! Tapusa ma ibana, asa di hita siteanonna i!

¹⁵Jala dipabali nasida ma ibana tu balian ni porlak anggur i, laos dipusa ma. Aha nama bahenon ni nampuna porlak anggur i tu nasida?

¹⁶Na ro ma ibana mambunu angka siula porlak anggur i, dung i pasahatonna ma porlak anggur i tu halak na asing. Alai umbege i, ninna nasida ma: Palias ma i!

¹⁷Alai dinolnol Ibana ma nasida, huhut ma didok: Ai dia do lapatan ni na tarsurat songon on: “Ia batu na binolongkon ni angka pande bagas i, apala i do gabe batu parsuhisuhi?” [289†]

¹⁸Marosak ma ganup na tinggang tu batu on, jala magopu ma ganup na tiningganganna.

¹⁹Di na sangombas i dilului angka sibotosurat ro di sintua ni malim dalan manangkup Ibana; alai mabiar do nasida mida natorop i, ai diantusi be do, tu nasida do tinuju ni umpama ondeng. [290†] III.

²⁰Jala dionggopi nasida do Ibana, disuru ma angka pangkahap, sipaulaula songon parroha na tigor, anggiat tarpadapot nasida Ibana di hatana, asa tarpasahatsa Ibana tu panggomgomi, tu huaso ni panguhum i. [291†]

²¹Jadi disungkun nasida ma Ibana, ninna ma: O Guru, huboto hami, na tigor do pangkataionmu nang pamodaionmu, jala na so siida bohi Ho; sintong do tahe dipodahon Ho dalan ni Debata.

²²Na jadi do lehononta guguan tu Kesar i, manang na so jadi?

²³Alai torang diboto Ibana ansiansinasida i, gabe ninna ma mandok nasida:

²⁴Patuduhon hamu ma tu Ahu rupia sada! Gombaran dohot surat ni ise do ndi on? Didok nasida ma: Gombaran ni Kesar i do.

²⁵Jadi ninna ma mandok nasida: Molo boti, lehon hamu ma tu Kesar na sian Kesar i, jala tu Debata na sian Debata!

²⁶Asa ndang tuk nasida padapot Ibana di hatana i di jolo ni natorop i, jala longang do rohanasida dibahen alusna; laos hohom nama nasida. IV.

²⁷Gabe ro ma deba sian Saduse na so marhatutuhon, adong haheheon ni na mate, manungkun Ibana.

²⁸Ninna nasida ma: Gurunami, disurathon si Musa di hita: Molo mate sihahaan, tuminggalhon parompuan so martinading, ingkon dihabia anggina do dongan saripe ni hahana i, pajongjongkon pomparan di ibana. [292†]

²⁹Asa adong ma pitu halak na marhahamaranggi. Mangoli ma sihahaan, dung i mate ma ibana so martinading.

³⁰Dihabia paidua ma boruboru i.

³¹Dung i paitolu i muse; gabe songon i do torus na pitu i, ndang martinading di hamamatenasida be.

³²Umpudi sian nasida mate nang parompuan i.

³³Onpe, di haheheon i, ise sian nasida nampuna nioli disi? Ai nasida na pitu i do marniolihonsa.

³⁴Gabe didok Jesus ma tu nasida: Anak ni hasiangan on do mangoli jala pabolihonsa.

³⁵Alai angka naung gabe tau tu hasiangan sogot dohot tu haheheon na sian angka na mate, ndang mangoli manang pabolihonsa pe.

³⁶Ai ndang tarbahensa be mate, ai suman tu surusuruan i jala anak ni Debata do nasida, ia dung gabe partohap di haheheon i. [293†]

³⁷Alai paboa, sipaheheon sogot angka naung mate, nang si Musa ditaringoti do i, uju di ramba na sampulguk i, ai digoar do disi Tuhan i “Debata ni si Abraham, Debata ni si Isak jala Debata ni si Jakkob.” [294†]

³⁸Nda tung Debata ni angka na mate Ibana, Debata ni angka na mangolu do; ai saluhut do nasida mangolu di Ibana.

³⁹Dung i ninna deba sian angka sibotosurat ma mangalusi: Denggan do na nidokmi, Guru!

⁴⁰Ai ndang barani be nasida manungkun manang dia pe tu Ibana. V.

⁴¹Gabe ninna Jesus ma mandok nasida: Marhua ma didok, Anak ni si Daud do Kristus i?

⁴²Ai didok si Daud sandiri di buku Psalmen: “Ninna Tuhan i do mandok Tuhanku: Hundul ma Ho tu Siamunhon, [295†]

⁴³paima hupeakhon angka musum bahen sidegedegean ni patmu!”

⁴⁴Asa digoar si Daud do Ibana Tuhan, beha ma Ibana Anakna?

⁴⁵Alai uju na manangi natorop i saluhutna, ninna Ibana ma mandok siseanna:

⁴⁶Jaga ma hamu mida angka sibotosurat, ai las do rohanasida madangadang, marbaju na ganjang, asa ditabi halak nasida di angka onan; jala ringkot do rohanasida juguk tu bangku jolojolo di angka parguruan dohot tu hundulan na sumangap di parpestaan. [296†]

⁴⁷Dipolgak nasida do bagas ni na mabalu; mangansi do nasida martangiang lelengleleng. Uhum na dumokdok do jaloonnasida muse.