Read Batak Toba LUKAS 22 Bible Online

LUKAS 22 - Batak Toba bible

LUKAS 22

¹I. [1] Alai na jonok nama ari raya mangan roti na so niasoman, na margoar Paska.

²Jala sai dipingkiri angka sintua ni malim dohot angka sibotosurat dalan mamusa Ibana, ai dihabiari nasida do natorop i. [313†]

³Alai dibongoti sibolis i do si Judas na margoar Iskariot, sahalak sian na sampuludua i. [314†]

⁴Gabe laho ibana martuptup dohot angka sintua ni malim raphon angka panungganei, manang dia dalanna pasahathon Ibana tu nasida.

⁵Jadi sian las ni rohanasida marpadan ma nasida, mangalehon hepeng tu ibana.

⁶Dioloi si Judas ma i, jadi dilului ma tingki na une pasahathon Ibana, so sian pamotoan ni natorop i. II.

⁷Dung i jumpang ma arina mangan roti na so niasoman, laos disi do somal dipotong birubiru Paska. [315†]

⁸Jadi disuru Jesus ma si Petrus dohot si Johannes, ninna ma: Laho ma hamu paturehon birubiru Paska sipanganonta i.

⁹Gabe ninna nasida ma mandok Ibana: Tu dia ma dohononmu hami paturehonsa?

¹⁰Dung i ninna Ibana ma mandok nasida: Disi bongot hamu tu huta i, pajumpang ma hamu dohot sada halak siboan partuaehan; ihuthon hamu ma ibana tu bagasan jabu na binongotanna.

¹¹Dok hamu ma tu nampuna bagas i: Tona ni Guru i tu ho: Didia do inganannami, asa mangan Paska i Ahu rap dohot angka siseanku?

¹²Dung i patuduhononna ma tu hamu bilut parginjang sada na lumbang, naung hinembangan; disi ma pature hamu!

¹³Jadi laho ma nasida; jumpang nasida ma songon na pinaboana i tu nasida, jala dipature ma Paska i. [316†]

¹⁴Asa dung dapot tingkina, hundul ma Ibana rap dohot angka apostel.

¹⁵Dung i ninna ma mandok nasida: Mansai masihol rohangku, naeng mangan birubiru Paska on Ahu rap dohot hamu, tagan so songgop dope sitaononki.

¹⁶Ai hudok ma di hamu: Na so tupa panganonku be i, ia so dapot hagogokna i di harajaon ni Debata! [317†]

¹⁷Jala dibuat Ibana ma panginuman, dipasupasu ma, laos ninna ma: Buat hamu ma on, sagihon hamu ma i sama hamu!

¹⁸Ai hudok ma di hamu: Na so tupa be inumonku parbue ni hau anggur, paima songgop harajaon ni Debata!

¹⁹Jala dihindat ma roti, dipasupasu ma, diponggoli jala diparlehon ma tu nasida, huhut ma didok: Dagingku do on, na nilehon humongkop hamu; ula hamu ma i, bahen parningotan di Ahu! [318†]

²⁰Songon i do dihindat nang panginuman, dung sun nasida na mangan i, didok ma: Ia panginuman on, padan na imbaru do i, marhitehite mudarhu, na durus humongkop hamu!

²¹Tangan ni na manjehehon Ahu do hape rap dohot Ahu di atas meja on! [319†]

²²Tong do nian langka ni Anak ni jolma i, songon naung diaturhon tu Ibana; alai marjea do halak na manjehehon Ibana!

²³Gabe dipungka nasida ma masitangkasan, manang ise nasida ulaning na olo mangulahon i. III.

²⁴Jala tubu ma parbadaon di nasida, manang ise nasida rajumon na sumangap. [320†]

²⁵Gabe ninna Jesus ma mandok nasida: Angka raja ni angka sipelebegu do manggomgom, jala na ulibasa do digoar angka na sangapnasida.

²⁶Alai unang ma songon i anggo di hamu! Na sumangap na di hamu, gabe songon naposo, jala na manguluhon suman ma tu pangoloi!

²⁷Ai ise do na sumangap, na hundul marsipanganon manang na marhobas i? Nda na hundul i? Alai di tongatongamuna do anggo Ahu songon parhobas. [321†]

²⁸Alai hamu do na manahan di lambungku, di na tarunjun i Ahu.

²⁹Anggo Ahu, huturpukhon pe tu hamu Harajaon i, songon naung diturpukkon Damang i tu Ahu.

³⁰Asa mangan jala minum hamu di mejangki di harajaonki, mangkunduli habangsa laho manguhumi halak Israel na sampuludua marga i. [322†]

³¹O Simon, Simon nunga dipangido sibolis i, naeng segeonna hamu songon dahanon. [323†]

³²Alai Ahu do manangiangkon ho, unang mintop haporsaonmi. Jala dung mulak sogot roham, pargogoi ma roha ni angka hahaanggim! [324†]

³³Alai ninna si Petrus ma mandok Ibana: Tuhan, na hobas do ahu mandongani Ho tu hurungan, nang tu hamatean pe!

³⁴Alai ninna Ibana ma: Hudok ma tu ho, Petrus: Ndang martatahuak manuk saborngin on, so jolo tolu hali soadahononmu, na so tinandam Ahu.

³⁵Laos ninna ma mandok nasida: Uju husuru hamu, so marhajut, so marhandehande, so marsipatu pe, dung do hamu hurangan? Jadi didok nasida ma: Ndang dung! [325†]

³⁶Gabe ninna ma mandok nasida: Alai anggo nuaeng, na marhajut, diboan ma i, songon i nang handehande. Jala na so umpeop i, digadis ma mandarna, manuhor podang!

³⁷Ai hudok ma di hamu: Ingkon saut na tarsurat taringot tu Ahu na mandok: “Tarrajum do Ibana tu angka parjahat!” Ai nasa na taringot tu Ahu, jumpang ma nuaeng. [326†]

³⁸Gabe didok nasida ma: Tuhan, adong do dua podang dison. Jadi didok ma tu nasida: Sae ma i! IV.

³⁹Dung i laho ma Ibana tu balian, tu dolok Jetun, songon na somal; jala diihuthon angka siseanna Ibana. [327†]

⁴⁰Asa dung sahat Ibana tusi, ninna ma mandok nasida: Martangiang ma hamu, asa unang bongot hamu tu bagasan pangunjunan!

⁴¹Anggo Ibana dipapulik ma dirina sian nasida, arga tuk dangguron batu, marsinggang ma Ibana martangiang songon on:

⁴²Amang, aut olo ma Ho nian pasalpuhon siinumon on sian Ahu! Alai unang ma rohangku saut, roham ma!

⁴³Alai diida Ibana ma surusuruan sian banua ginjang i, na margogoihon Ibana. [328†]

⁴⁴Jala di parungkilonna i, lam digogo ma martangiang; jadi songon mudar na himpal do madekdek hodokna i tu tano.

⁴⁵Jala hehe ma Ibana sian na martangiang i, mandapothon siseanna; jadi tarpodom ma nasida didapot, dibahen arsak ni rohanasida.

⁴⁶Gabe ninna ma mandok nasida: Boasa ma tung modom hamu? Hehe ma hamu martangiang, asa unang hamu bongot tu pangunjunan!

⁴⁷Mandok i dope Ibana, nunga ro torop halak, niuluhon ni sada sian na sampuludua i, ia goarna si Judas, na manjonohi Jesus mangumma Ibana.

⁴⁸Alai ninna Jesus ma mandok ibana: O Judas, pangummaon do hape dibahen ho, pasahathon Anak ni jolma i?

⁴⁹Alai diida angka dongan ni Jesus ma na naeng masa i, gabe didok ma: Tuhan, tampulhononnami ma podang i?

⁵⁰Jala sahalak sian nasida manampul naposo ni sintua ni malim, gabe digotap pinggolna siamun.

⁵¹Alai ro ma alus ni Jesus: Sae ma i! Dijama ma pinggol i, dipamalum ma halak i.

⁵²Gabe ninna Jesus ma mandok angka sintua ni malim, angka sigomgom joro i dohot angka panungganei, naung manahopi Ibana: Hira dompak halak panamun hamu ro, mantat podang dohot lombutlombut.

⁵³Ariari do Ahu rap dohot hamu di joro i; ndang dung dilaluhon hamu tanganmuna dompak Ahu. Alai on do tingkimuna dohot huaso ni haholomon i. [329†] V.

⁵⁴Dung ditangkup, diboan nasida ma Ibana manogihon tu bagasan jabu ni sintua ni malim i. Alai mandaodao ma si Petrus mangihuthon.

⁵⁵Dipagalak nasida ma api di pogu ni alaman i jala rap hundul ma disi, gabe ro ma si Petrus juguk tu tongatonganasida.

⁵⁶Dung i diida naposo boruboru sahalak ma ibana juguk mardonokkon api i, dinolnol ma ibana, ninna ma: Dongan ni Halak an do on, tahe!

⁵⁷Alai disoadahon do Jesus, didok ma: Ndang hutanda Ibana, inang!

⁵⁸Dung i satongkin nari, diida sahalak na asing ma ibana jala ninna ma: Sada sian nasida i do ho! Alai didok si Petrus ma: Ndang na tutu i, amang!

⁵⁹Dung salpu hirahira sajom, diondolhon sahalak na asing muse, mandok: Tongon do, dohot do halak on donganna najolo, jala halak Galilea do i.

⁶⁰Alai didok si Petrus ma: Ndang huboto na nidokmi, amang! Mandok i dope ibana, mamintor martatahuak ma manuk.

⁶¹Jadi humusor ma Tuhan i, dibereng ma si Petrus, gabe diingot si Petrus ma hata ni Tuhan i, i ma na nidokna i tu ibana: Andorang so martatahuak manuk i annon, nunga tolu hali Ahu soadahononmu! [330†]

⁶²Jala ruar ma ibana, tumatangis gogogogo.

⁶³Alai anggo angka baoa na maniop Jesus, dipauruuru jala dilasahi do Ibana.

⁶⁴Dibulang nasida do Ibana gabe disungkun: Manurirangi ma Ho: Ise i na mamastap Ho?

⁶⁵Jala lan dope na asing dihatahon nasida tu Ibana laho mangaleai.

⁶⁶Jadi disi torang ari, marpungu ma rapot ni sintua ni bangso i, i ma angka sintua ni malim rap dohot sibotosurat; ditogu nasida ma Ibana tu harungguannasida. Ninna nasida ma: Anggo Kristus i do Ho, paboa ma i di hami! [331†]

⁶⁷Gabe ninna Ibana ma mandok nasida: Nang hupaboa i tu hamu, tong do so porsea hamu!

⁶⁸Alai molo manungkun Ahu, ndang tagamon alusanmuna Ahu.

⁶⁹Alai olat ni on ma hundul Anak ni jolma i tu siamun ni Hagogoon ni Debata.

⁷⁰Gabe saluhut nasida mandok: Asa Anak ni Debata do Ho? Jadi didok Ibana ma tu nasida: Songon na nidokmuna: Ahu ma i tutu!

⁷¹Dung i ninna nasida ma: Pola luluanta dope sitindangi? Ai nunga apala hita umbegesa dihatahon Ibana.