Read Batak Toba LUKAS 24 Bible Online

LUKAS 24 - Batak Toba bible

LUKAS 24

¹I. [1] Alai di ari parjolo dung ari Sabbat, ro ma nasida mansai sogot tu tanoman i, mantat na hushus na pinaturenasida.

²Alai nunga digulang batu i sian tanoman i didapot nasida.

³Jala dung bongot, ndang jumpang nasida bangke ni Tuhan Jesus.

⁴Jadi di na jut rohanasida marnidasa, gabe jongjong ma di lambungnasida dua halak parabit na marlinanglinang.

⁵Alai mabiar ma rohanasida jala unduk nasida manaili, gabe ninna halak ondeng ma tu nasida: Boasa luluanmuna na mangolu di inganan ni angka na mate?

⁶Ndang dison Ibana: Nunga dipahehe Ibana. Ingot hamu ma na hinatahonna i tu hamu, uju di Galilea i dope Ibana!

⁷Ai didok do, ingkon pasahaton Anak ni jolma i tu tangan ni halak pardosa jadi parsilangkononhon, jala mulak mangolu ma Ibana di ari patoluhon. [347†]

⁸Jala diingot nasida ma hatana i.

⁹Gabe mulak ma nasida sian tanoman i, dibaritahon ma sasudena i tu na sampulusada i dohot tu donganna saluhutna.

¹⁰Si Maria Magdalena ma i, dungkon ni i si Johannes dohot si Maria ni si Jakobus. Nang angka na asing na mandongani nasida paboahonsa tu angka apostel. [348†]

¹¹Hira turiturian do angka hata i di rohanasida jala ndang dihaporseai.

¹²Alai hehe ma si Petrus marlojong tu tanoman i. Dipaunduk ma dirina, pulik ma diida peak angka saputsaputna i. Dung i muli ma ibana, huhut longang do rohana marningot na masa disi. II.

¹³Dung i adong ma dua halak sian nasida mardalani di na sadari i tu sada huta na margoar Emmaus, arga ualu paal daona sian Jerusalem.

¹⁴Jala mangkatai ma nasida taringot tu saluhut naung masa i.

¹⁵Jadi di na mangkatai nasida songon i jala masipapuasan, ro ma Jesus sandiri mandapothon jala mardalan rap dohot nasida. [349†]

¹⁶Alai pangalelaon do matanasida, unang ditanda nasida Ibana.

¹⁷Jadi ninna ma mandok nasida: Hata dia do na hinatahonmuna sama hamu di tongandalan on? Gabe sulon ma nasida huhut tungki.

¹⁸Dung i mangalusi ma na sahalak na margoar Kleopas, ninna ma mandok Ibana: Sasada Ho do huroha na mian di Jerusalem, na so umboto na masa disi di angka ari on?

¹⁹Jadi ninna ma mandok nasida: Ai aha do? Gabe ninna nasida ma mandok Ibana: Angka na taringot tu Jesus, halak Nasaret i, panurirang na gogo di ulaon nang di hata, di jolo ni Debata dohot sandok bangso i. [350†]

²⁰I do dipasahat angka sintua ni malim rap dohot sintuanta, asa marutang hosa jala diparsilangkon.

²¹Alai anggo hami sai mangkirim do, naeng Ibana paluahon Israel! Jala nunga pola patoluarihon sadari on, dung masa angka i. [351†]

²²Tarsonggot muse rohanami dibahen angka parompuan deba na sian hami; sogot do nasida nasogotan sian tanoman i. [352†]

²³Ndang jumpang nasida bangkena, gabe ro do nasida mandok, naung diida nasida surusuruan angka na paboahon, na mangolu do Ibana.

²⁴Jala adong ma sian hami na laho tu tanoman i, jumpang nasida do tutu songon na hinatahon ni angka parompuan i; alai anggo Ibana ndang adong diida. [353†]

²⁵Jadi ninna Ibana ma mandok nasida: Oe hamu, na hurang roha jala na losok mangkaporseai saluhut na hinatahon ni angka panurirang i!

²⁶Nda ingkon songon i marsitaonon Kristus i, laho masuk tu hasangaponna i?

²⁷Jadi jojor ma sian si Musa dohot sian saluhut panurirang i dipatorang tu nasida nasa na tarsurat taringot tu Ibana. [354†]

²⁸Dung i jonok ma nasida tu huta sitopotonnasida i; anggo Ibana dibahen ma songon na naeng datdatanna dope sidalananna i.

²⁹Gabe disosoi nasida ma Ibana, ninna ma: Ua, mian ma Ho di hami, ai na bot ne ma jala manihir ari! Jadi bongot ma Ibana mandongani nasida.

³⁰Jala di na hundul Ibana rap dohot nasida mandok mangan, dihindat Ibana ma roti i, dipasupasu ma, dung i diponggoli mangalehonsa tu nasida. [355†]

³¹Disi ma buha matanasida gabe ditanda ma Ibana. Dung i marhalindo ma Ibana di jolonasida.

³²Gabe masipandohan ma nasida: Nda gara rohanta di bagasan, uju dipanghulingi hita di tongandalan i, laho patorangkon tu hita na tarsurat i?

³³Jadi borhat ma nasida di na sangombas i, laho mulak tu Jerusalem, gabe pungu ma didapot na sampulusada i rap dohot angka dongannasida.

³⁴Angka ninna nasida do mandok: Naung tutu do dipahehe Tuhan i, jala diida si Simon do Ibana! [356†]

³⁵Jadi dibaritahon nasida na ro i ma na masa di tongandalan i ro di panandanasida di Ibana, di na mamonggoli roti i Ibana. III.

³⁶Mangkatahon i dope nasida, jongjong ma Jesus di tongatonganasida mandok: Dame ma di hamu!

³⁷Gabe tarhalomong jala hatahutan ma nasida, ai dirimpu, tondi do na niidanasida. [357†]

³⁸Jadi ninna Ibana ma mandok nasida: Boasa tarhalomong rohamu jala boasa songon na ganggu rohamuna?

³⁹Bereng hamu ma tanganku dohot pathu, paboa Ahu sandiri do! Jama hamu ma Ahu jala tilik hamu ma; ai anggo tondi ndang marsibuk manang marholiholi, songon na niidamuna di Ahu.

⁴⁰Uju mandok songon i, dipatuduhon ma tanganna dohot patna tu nasida.

⁴¹Alai laos so porsea dope nasida siala las dohot longang ni rohanasida, gabe didok na tu nasida: Adong dipeop hamu dison manang dia sipanganon?

⁴²Jala dilehon nasida ma tu Ibana dengke na pinanggang samponggol. [358†]

⁴³I ma dijalo Ibana, laos dipangan ma i dipanotnoti nasida.

⁴⁴Jadi ninna Ibana ma mandok nasida: On ma angka hatangku na huhatahon tu hamu, uju rap dope Ahu dohot hamu: Ingkon jumpang do saluhutna na tarsurat taringot tu Ahu di patik ni si Musa, di angka panurirang i nang di buku Psalmen. [359†]

⁴⁵Jadi dibungkai ma rohanasida, asa diantusi na tarsurat i.

⁴⁶Dung i ninna ma mandok nasida: Songon i do tarsurat hian, manaon na porsuk Kristus i jala hehe sian na mate di ari patoluhon.

⁴⁷Jala baritahononhon ma marhitehite Goarna hamubaon ni roha mangalap hasesaan ni dosa, tu sude angka bangso, mamungka sian huta Jerusalem.

⁴⁸Hamu do mangkatindangkonsa.

⁴⁹Jala suruonku ma songgop tu hamu na pinarbagabaga ni Damang. Alai mian ma hamu di huta on, paima disolukkon hamu hagogoon na sian ginjang! [360†] IV.

⁵⁰Jadi ditogihon Ibana ma nasida ruar tungkan Betania, dung i dipaherbang ma tanganna mamasumasu nasida.

⁵¹Jadi di na mamasumasu nasida Ibana, sirang ma Ibana sian nasida jala tarhindat tu ginjang.

⁵²Dung i disomba nasida ma Ibana jala mulak tu huta Jerusalem, marlas ni roha situtu.

⁵³Jadi tongtong ma nasida di joro i mamujimuji Debata.