Read Batak Toba LUKAS 3 Bible Online

LUKAS 3 - Batak Toba bible

LUKAS 3

¹I. [1] Pasampululimataonhon hinarajahon ni Kesar Tiberius, uju Pontius Latus manggomgomi luat Judea, di tingki ni angka raja na opat on: Si Herodes di luat Galilea, si Pilippus, donganna saama, di luat Iturea dohot Trakonitis, si Lisanias di luat Abilene,

²uju si Hannas dohot Kayapas sintua ni malim, ro ma hata ni Debata tu si Johannes, anak ni si Sakarias, di halongonan.

³Gabe ditopot ibana ma sandok luat humaliang batang aek Jordan, dijamitahon ma pandidion hamubaon ni roha, laho pasesahon dosa.

⁴Hombar tu na tarsurat di buku parjamitaon ni panurirang Jesaya: “Soara ni na manjoujou di halongonan! Pature hamu ma dalan di Tuhan i, pahornop hamu ma sidalananna!” [56†]

⁵“Ingkon gohan do nasa rura jala siparejeton do nasa dolok dohot buntulbuntul, sipatigoron do na bengkuk jala sipadosdoson na marbungkibungki.”

⁶“Jala idaon ni nasa daging do haluaon na sian Debata!”

⁷Asa didok ma tu natorop na ro padidihon dirina tu ibana: Hamu, anak ni ulok! Ise do na mangajari hamu pasidingkon rimas na ro sogot? [57†]

⁸Parbuehon hamu ma na tama, paboa naung muba rohamuna! Jala so tung didok hamu di bagasan rohamuna: Si Abraham do amanami! Ai hudok ma tu hamu: Tarjadihon Debata do anak di si Abraham sian angka batu on.

⁹Ai nunga pola ampe tangke tu daling ni angka hau. Onpe, sitabaon do nasa hau na so marparbuehon na denggan jala sidabuhononhon do tu api!

¹⁰Gabe disungkun natorop i ma ibana: Dia nama bahenonnami?

¹¹Jadi dialusi ma nasida: Na marduabaju dilehon ma tu na so adong bajuna, jala na umpeop sipanganon, songon i ma dibahen!

¹²Ro do nang angka sijalo beo padidihon dirina, angka didok ma: Guru, dia sibahenonnami?

¹³Gabe didok ma tu nasida: Unang ma buat hamu lobi sian na niaturhon tu hamu!

¹⁴Dohot ma angka soldadu manungkun ibana: Ia hami, dia ma sibahenonnami? Jadi dialusi ma: Unang ma susai, unang ma dobo hamu halak! Hasabamhon hamu ma gajimuna!

¹⁵Managamnagam do bangso i, dirimpu be di bagasan rohana taringot tu si Johannes, atik beha Kristus i ibana. [58†]

¹⁶Gabe dialusi si Johannes ma nasida saluhutna: Ahu do tutu mandidihon hamu dohot aek; alai na ro ma na gumogo sian ahu; na hurang tama do ahu mangkarhari tali ni sipatuna. Didihonon ni I do tu hamu Tondi Parbadia dohot api.

¹⁷Di tanganna do purpuran, paiasonna ma pardegeanna: Papunguonna do emena tu sopona, alai tutungonna do hurangkam i tu api na so ra mintop.

¹⁸Lan dope na asing dipasingothon tu bangso i, laho mamaritahon barita na uli tu nasida.

¹⁹Alai hona hata do si Herodes, raja na opat i, dibahen si Johannes, siala si Herodias, pardihuta ni anggina, dohot siala sude ulaon na jahat ni si Herodes i. [59†]

²⁰Alai tamba ni sasudena i: Didabu ma si Johannes tu hurungan. II.

²¹Alai uju tardidi natorop i saluhutna, gabe dohot ma Jesus tardidi; jala di na martangiang Ibana, mungkap ma langit.

²²Jala mijur ma Tondi Parbadia tu atasna marrupa songon darapati, jala masa ma soara sian ginjang, songon on: Ho do Anakku, haholongan i; lomo do rohangku di Ho! [60†] III.

²³Anggo Jesus hirahira tolupulu taon do umurna di parhehena i; jala di roha ni halak, Ibana anak ni si Josep, i ma anak ni si Eli; [61†]

²⁴i ma anak ni si Mattat, anak ni si Lepi, anak ni si Malki, anak ni si Jannai anak ni si Josep;

²⁵anak ni si Mattatis, anak ni si Amos, anak ni si Nahum, anak ni si Esli, anak ni si Naggai;

²⁶anak ni si Maat, anak ni si Mattatis, anak ni si Semein, anak ni si Josek, anak ni si Joda;

²⁷anak ni si Joanan, anak ni si Resa, anak ni si Serubabel, anak ni si Sealtiel, anak ni si Neri;

²⁸anak ni si Malki, anak ni si Addi, anak ni si Kosam, anak ni si Elmadam, anak ni si Er;

²⁹anak ni si Josua, anak ni si Elieser, anak ni si Jorim, anak ni si Mattat, anak ni si Lepi;

³⁰anak ni si Simeon, anak ni si Juda, anak ni si Josep, anak ni si Jonam, anak ni si Eliakim;

³¹anak ni si Melea, anak ni si Mina, anak ni si Mattata, anak ni si Natan, anak ni si Daud; [62†]

³²anak ni si Isai, anak ni si Obed, anak ni si Boas, anak ni si Salmon, anak ni si Nahason; [63†]

³³anak ni si Amminadab, anak ni si Admin, anak ni si Arni, anak ni si Hesron, anak ni si Peres, anak ni si Juda; [64†]

³⁴anak ni si Jakkob, anak ni si Isak, anak ni si Abraham, anak ni si Tera, anak ni si Nahor; [65†]

³⁵anak ni si Serug, anak ni si Reu, anak ni si Peleg, anak ni si Heber, anak ni si Sela;

³⁶anak ni si Kenan, anak ni si Arpaksad, anak ni si Sem, anak ni si Noak, anak ni si Lamek; [66†]

³⁷anak ni si Metusalah, anak ni si Henok, anak ni si Jared, anak ni si Mahalaleel, anak ni si Kenan;

³⁸anak ni si Enos, anak ni si Set, anak ni si Adam; na sian Debata do anggo i. [67†]