Read Batak Toba LUKAS 4 Bible Online

LUKAS 4 - Batak Toba bible

LUKAS 4

¹I. [1] Gok Tondi Parbadia ma Jesus mulak sian aek Jordan, gabe diliathon Tondi i Ibana di halongonan.

²Opatpulu ari lelengna diunjuni sibolis i Ibana. Sandok ndang mangan Ibana manipat angka ari i; jadi dung marujung i, male ma dihilala.

³Gabe didok sibolis i ma tu Ibana: Anggo na tutu Ho Anak ni Debata, dokkon ma batu on gabe roti.

⁴Dialusi Jesus ma ibana: Tarsurat do: “Apala holan sipanganon hangoluan ni jolma; nasa hata ni Debata do.” [68†]

⁵Dung i ditogihon ma Ibana tu na huminsat, dipatuduhon ma tu Ibana sude harajaon na di tano on di bagasan sanghidop mata.

⁶Laos didok sibolis ma tu Ibana: Tu Ho ma lehononku sasudena on gomgomanmu ro di hasangaponna i, ai tu ahu dipasahat i, jala hulehon i tu silomo ni rohangku.

⁷Di Ho ma i saluhut, anggo olo Ho marsomba tu ahu.

⁸Jadi dialusi Jesus ma ibana: Tarsurat do: “Tuhan Debatam do sombaonmu, sasada Ibana do sioloanmu!” [69†]

⁹Gabe ditogihon do Ibana tu Jerusalem, dipajongjong ma Ibana tu palaspalas ni bagas joro, laos didok ma tu Ibana: Anggo Anak ni Debata Ho, dabuhon ma dirim sian on tu toru.

¹⁰Ai na tarsurat do: “Dohononna do angka surusuruanna taringot tu ho, asa diramoti ho,” [70†]

¹¹“jadi tangantanganonnasida do ho, asa unang tartuktuk patmu tu batu.”

¹²Alai dialusi Jesus ibana muse: Didok do: “Ndang jadi unjunanmu Tuhan Debatam!” [71†]

¹³Jadi dung dipaujung sibolis i sude pangunjunan i, ditadingkon ma Ibana, paima ro tingkina muse. [72†]

¹⁴Margogohon Tondi i ro Jesus muse tu Galilea, jadi sar ma baritana tu sude luat humaliang i.

¹⁵Mangajari do Ibana di angka parguruannasida, jala saluhut do mamuji Ibana. II.

¹⁶Jadi ro ma Ibana tu Nasaret, tu huta hagodanganna. Mangihuthon hasomalanna laho do Ibana tu parguruan i jumpa ari Sabbat; jadi jongjong ma Ibana, naeng manjaha.

¹⁷Gabe dilehon ma tu Ibana pustaha ni panurirang si Jesaya, diungkap ma i jadi dapot matana ma na tarsurat songon on: [73†]

¹⁸“Songgop do tu ahu Tondi ni Tuhan i, ai dimiahi do ahu, mamboan barita na uli tu angka na pogos.

¹⁹Disuru do ahu, mamaritahon tu angka na tarhurung asa malua, tu angka na mapitung asa marnida, paluahon angka na ginosagosa, mamaritahon taon parasinirohaon ni Tuhan i.” [74†]

²⁰Ditutup ma pustaha i, dipaulak ma tu parhobas; laos hundul ma, gabe nolnol ma dompak Ibana mata ni sude na di parguruan i.

²¹Jala dihatahon ma tu nasida: Sadari on do jumpang na tarsurat ondeng, di na binegemuna i.

²²Sasude do manohoi Ibana jala longang be do, umbege hata na tabo na hinatahonna, gabe ninna ma: Nda anak ni si Josep Ibana? [75†]

²³Jala didok Ibana ma tu nasida: Dohononmuna do nian tu Ahu hata ni umpama on: Pamalum ma dirim, ale datu! Angka na hubege hami na binahenmi di Kapernaum, laos bahen ma i dison, di huta hagodanganmon! [76†]

²⁴Jadi didok ma: Situtu do hatangkon tu hamu: Tung na so marsangap do panurirang anggo di luat hagodanganna. [77†]

²⁵Sintong do na hudok on tu hamu: Lan do nian boruboru na mabalu di bangso Israel di tingki ni si Elia di na manintak langit tolu taon onom bulan lelengna, uju masa haleon potir di sandok tano on. [78†]

²⁶Alai ndang tu manang ise nasida disuru si Elia, tung tu Sarpat do, na di luat Sidon, tu sada boruboru na mabalu.

²⁷Lan do nian na huliton di bangso Israel, di tingki ni panurirang si Elisa; alai ndang adong agia ise nasida dipamalum, holan si Naaman halak Siria i do. [79†]

²⁸Jadi gok rimas ma nasida sude na di parguruan i umbegesa.

²⁹Hehe do nasida, dipabali Ibana sian huta i, ditogu ma Ibana tu tolping ni dolok, ojahan ni hutanasida i, laho manggulangkon Ibana sian i.

³⁰Alai mamolus do Ibana sian tongatonganasida, laos laho sian i. III.

³¹Jadi tuat ma Ibana tu huta Kapernaum, na di Galilea; diajari ma nasida jumpa ari Sabbat. [80†]

³²Gabe longang do rohanasida umbege podana, ai marsahala do jamitana i. [81†]

³³Jala adong ma di parguruan i sada halak partondi na hodar; marsoara na gogo ma dianggukhon:

³⁴Oe Jesus na sian Nasaret, marhua Ho tu hami! Na ro do Ho hape mangago hami! Hutanda do Ho; na badia ni Debata do Ho!

³⁵Alai disonggahi Jesus do ibana, didok ma: Sip ho! Ruar ma ho sian ibana! Jala tu tongatonga i ma disampathon tondi na hodar i ibana, laho ruar; ndang mahua ibana dibahen.

³⁶Jadi longang ma rohanasida saluhutna, gabe masipandohan ma nasida: Na boha do on? Mardongan huaso dohot gogo dipaksa angka tondi na hodar, gabe ruar do.

³⁷Jala sar ma baritana tu nasa inganan humaliang.

³⁸Borhat ma Ibana sian parguruan i, gabe masuk ma tu jabu ni si Simon. Ia simatua boru ni si Simon, posa do panepanena, jala ditaringothon ma nasida tu Ibana.

³⁹Jadi dijonohi ma nasida, disonggahi ma panepane i, gabe laho ma i. Jala manigor hehe ma inaina i marhobasi di nasida.

⁴⁰Dung sundut mata ni ari, dipamboan be ma tu Ibana na marsahitna, na marragamragam niaena. Jala tu nasida sadasada diampehon Ibana tanganna, laho pamalum nasida!

⁴¹Sian torop nasida marruaran angka sibolis na manampiar, mandok: Anak ni Debata do Ho; gabe disonggahi do nasida, ndang diloas nasida paboahon, naung diboto, Kristus i Ibana. [82†]

⁴²Alai di torang ni arina i borhat Ibana laho tu halongonan. Ia natorop i dilului jala didapothon ma Ibana, laho mangambat Ibana nian, unang laho sian nasida.

⁴³Alai didok ma tu nasida: Ingkon dohot do tu angka huta na asing hubaritahon harajaon ni Debata, ai ala ni i do Ahu disuru. [83†]

⁴⁴Jala marjamitai do Ibana di angka parguruan na di luat Galilea. [84†]